Jrm. 22 - Yus Papí: Shuarja̱i̱ Yus Yamaram Chicham Najanamu

Setekías Jerusaréṉkan mánaiktin ímiaja̱i̱k wainkiamu

^1-6 Uunt Yus chichaak jú̱nis tíniuiti “Jutanmaya̱ úunt akupniu shuari̱ akatuktia túram nekasa nuja̱i̱ métek túrutai̱n túrati. Wáitias pujutái̱nmaya̱ aṉkant ajasti iraran mitiaikian waje̱n itit awajcharti. Tura ju̱ nuṉka ju̱i̱ṉkia umitmákcha ainia nuna numpe̱n peṉké antar uputúrcharti. Jú̱ chicham umíakrumni̱ṉkia atumí shuari̱sha Tawitia pujutái̱ri̱n pujukí̱ wéartatui. Wi íismaka átumka Karaat pepru tura Ríwianu naintia tsakari̱ya núnisaitrume túrasha jú̱ chicham ántachkurmiṉkia ju̱ je̱a̱ka emeskan aya jú̱nik awajsartatjai” tiártatui.

⁷ Aṉkant aṉkant ni mánitiairi̱ji̱a̱i̱ ame emestamkatniun Wi iwiaramtai tí péṉker sétrurmin tsupirar jinium apeáwartatui.

⁸ Untsurí aents ju̱ peprunam naṉkamainiana nu ni tsaniakmari̱n chicharainiak “¿Urukamtai ju̱nasha Uunt Yus uunt pépruncha jútikiait?” tiártatui.

⁹ Tutai aimiainiak “Uunt Yus ni Yusri̱ chichaman najanamia nuna iniaisar chíkich yusan umirainiak tikishmátrarmai” tiártatui.

¹⁰ Jaka e̱a̱raip, jaka enentáimtusrum útirap, ni wéana nu yapá nekapratniua núnisrum enentáimtusrum úttiarum. Warí atakka waketki̱ peṉké táchattui tura akiiniamia nu nuṉkankesha íitniasha íischattui.

¹¹ Sarum Jusíasa uchirí̱ Jutá uunt akupniuri̱n Uunt Yus jú̱nis tíniuiti. Ni aparí̱ Jusías pujuya nui̱ akupin ajas pujusmai tura nu nuṉkanmaya̱ṉka jíinkimiai. Atakka ju̱i̱ṉkia peṉké waketkishtatui.

¹² Antsu achik junakmia nui̱ṉ jakattawai tura ju̱ nuṉkanka atakka peṉké waketrukchattui.

Juasim ímiaja̱i̱k wainkiamu

^13-17 Je̱a̱n je̱a̱muk nekasa nuja̱i̱ métek túrutsuk ni írutkamuri̱ takarmaitiat akikmatsna nuka anearti. ¿Kame ame apa Jusíaska atsumainian tura wáitkiatai armia nuna péṉker sumamtikiachmakia? ¿Nuna túrakchak nisha péṉker pujusmia? ¿Núchakait Winia nekaratniuka? tawai Uunt Yus. Túrasha ámeka áyatik waitruar kuit achiktiniak tura umitmákcha numpé upurturtiniak núnismek anaṉkar yajauch awajsatniuk enentáimtame.

¹⁸ Tuma asamtai Jutanmaya̱ úunt akupniun Jusíasa uchirí̱ Juasiman Uunt Yus chicharuk “Kúntuts nekapeakrum útkurmesha ‘Jaa winia yatsuchiruá.’ ‘Jaa winia umachiruá’ tíchattarme. Túrutskesha ‘Jaa uuntruá’ tura ‘jaa ni náatkamuri̱sha’ tuuka útchattarme.

¹⁹ Warí, kawain íwiarua núnis iwiarsartatui. Kame japikiár júkiar Jerusaréṉ pepru wá̱i̱ti̱a̱i̱ri̱ya̱ núna á̱a̱win ajapawartatui.

Juakinna ímiaja̱i̱k wainkiamu

²⁰ Ríwianunam wakam untsumkata tura Pasannumka ame chichamen ántumtikiarta núnismek Awarímnumia̱sha untsumkata. Warí, ame tsanirmeka ashí emesnakcharaik.

²¹ Ámeka taramkam pujumam nui̱ chicharkamjame túrasha chichartakum ‘Anturkashtatjame’ turutmiame. Warí, nátsanmaya̱n ámeka túmaki̱ winiakum winia chichampruka peṉké anturtukchaitme.

²² Ame murikrumin wáinniunka nase waitramkattawai tura ame tsanirumka achirar yajá yaruakma ártatui. Nekas natsa̱a̱rma tura ame yajauchirmini̱ṉ wishikramusha átatme.

²³ Ríwianunam pujumame túram sétrunam pasuṉmakmame. Kame nuwa̱ takustaj tusa jatemá urukawa núniakmesha urutmak úttiam najaimiakmesha.

²⁴ Wikia nekas iwiaaku asan” tawai Uunt Yus “Jutanmaya̱ úunt akupin Juasimia uchirí̱ Juakinkiá asaktai̱ aniyu winia untsuur uwejrui̱ní̱ ikiurtusuitkiumnisha nuya̱sha tsuriṉkiaintjiame.

²⁵ Ame iwiaakmarmin e̱a̱iniana nuna suan iniaisattajme. Kame Kartíu aents káunkara̱i̱ṉ tusamsha ashamainiamna nui̱ Papirúnianmaya̱ úunt akupin Napukutunusúra uwejé̱e̱n íktuan iniaisattajme.

²⁶ Amincha tura ame nuku ámin takurmasua nunasha nékashtai̱ átum akiiniachma nuṉkanam ajapan iniaisattajrume túram nui̱ jakattarme.

²⁷ Tura nuṉka waketruktiaj tusarun ti wakerarmena nui̱ṉkia waketkishtatrume.

²⁸ ¿Kame jú̱ aishmaṉkan Juakinkia mui̱jmiai̱ṉ najanamuit núja̱i̱nchuka jakurúkait? ¿Kame muits wakerukchamnia núninkiait? ¿Enta urukamtai nisha tura ní shuari̱sha nékashtai̱ yajá nuṉkanmasha utsaṉkarmait?

²⁹ Maa aentsu aentsu aentsu, Uunt Yusa chichame̱ antukta.”

³⁰ Kame Uunt Yus chichaak “Jú̱ aishmaṉka náari̱sha ni shuari̱ncha nútiksarum áatratarum. Kame iwiaaku pujuttana nui̱sha warinkisha wáitmachu átatui. Warí, ni weanmaya̱ṉka chikichik áishmaṉkesha úunt akupin Tawit pujutai̱nmaṉka ekemsashtatui tura úunt akupniuka atakka akupin peṉké ajaschartatui Jutanmaṉka” tawai Uunt Yus.