Jrm. 21 - Yus Papí: Shuarja̱i̱ Yus Yamaram Chicham Najanamu

Setekíassha Jerusaréṉsha itiur átata nuna ujamu

¹ Markíasa uchirí̱ Páshuran tura Masíasa uchirí̱ Yúsnan pujurin Supuníasan úunt akupin Setekías Jirimíasan akupkarmatai Uunt Yusa chichame̱ Jirimíasan tarimiayi. Kame akatrámu ainia nu chichainiak

² “Papirúnianmaya̱ úunt akupin Napukutunusúr mesetan iin najatramji. Nu waitneasam iin Uunt Yusai̱ chichamkartukchaintmeash. Kame Uunt Yus aents túrachminian yaunchu ashí túramia núnisaṉ yamaisha iincha túrutmawaintiajtí. Nuna túramtai ii nemasri̱ṉkia iinia̱ṉka kanakiárainti” tímiayi.

³ Nuna takui̱ Jirimías aya̱k “Setekías chicharkuram

⁴ ‘Israera Yusri̱ Uunt Yus jú̱nis tawai “Mesetnum mánitiai takakrumna nunak atumniak Wi ipijmiamtikiatajrume. Papirúnianmaya̱ úunt akupniuja̱i̱ mániarmena núnaka Kartíu aentsnasha tanishnum a̱a̱ áreṉka matsatrumna nui̱ Wi jú̱ pepru ajapéri̱n irurtatjai.

⁵ Atumji̱a̱i̱ kakaram kunturja̱i̱ tura uwejrun iwiaintiukan tura suira kaje̱ntkan ti kajekan mánaiktatjai.

⁶ Jú̱ peprunam matsatainia nú aentsnaka amukártatjai. Aentsush yajasmash kakaram suṉkur iniantram jákartatui.”

⁷ Uunt Yus chichaak “Nuyá̱ Jutanmaya̱ úunt akupin Setekíasnaka Papirúnianmaya̱ úunt akupin Napukutunusúra uwejé̱n íktusan iniaisattajai. Nuyá̱ takarniúrtiuk aentsush suṉkursha mesetcha tura tsuka amuumam péprunam juákarma núnaka ni nemasri̱ mátaj tusa e̱a̱inia nuna uwejé̱n íktusan iniaisartatjai. Túramtai puya̱ja̱i̱ máwartatui tura waitnentratniuka peṉké atsuttawai” titiá.’

⁸ Ju̱ péprunmaya̱ aents chicharainiakum ‘Uunt Yus chichaak: Wats nekaatarum, átum íimmianum iwiaaku átin jintiancha tura jákatniunmaani̱ jukartin jintiancha paant awajtajrume.

⁹ Kame ju̱ péprunam juákartatna nuka puya̱ja̱i̱ mantamnawartatui. Ántsaṉ tsukaja̱i̱sha suṉkurja̱i̱sha jákartatui. Túrasha Papirúnianmaya̱ aents akintrutmakar matsamprutmakarainia nui̱ junakim pachiniamka ni atarartatna nu yurumkum iwiaaku átatme.’

¹⁰ Warí Uunt Yus chichaak ‘Ju̱ pépruka péṉker túrawarti tátsujai antsu yajauch túrawarat tusan kajerkarjai. Tuma asamtai Papirúnianmaya̱ úunt akupin ekemakti tusan íktusjai.’

¹¹ Tura Jutanmaya̱ úunt akupniu shuari̱sha ‘Uunt Yusa chichame̱n antukarti’ titiá.

¹² Tawit shuartirmesha Uunt Yus ju̱na tiniua nu antuktarum. ‘Nékaskea nuja̱i̱ métek péṉker súmamtikiuram achikiar jukimiu wáitkiasma nusha wárik aṉkant awajsatarum. Nuíchuka atumí yajauchiri̱n Winia kajetair ji keek aesa mash awajniua núnis kéekmataisha yaki ikiajnátramkatarum.’

¹³ Wats antuktarum, átum pakanam pujú, pakanmaya̱ kayatirmin atumín yamaikia kajerkajrume. Warí, átumka chichakrum ‘¿Iincha yaki káutramkartajⁱ núja̱i̱nchuka yaki ii je̱e̱ncha utsanturmawartajⁱ?’ tau asakrumin atumín Uunt Yus chichartamuk

¹⁴ Átum túraitrumna nuja̱i̱ métek asutiáttajrume. Túran atumí nuṉké̱ kampunniuri̱ ekemátkattajrume. Tura nui̱ írunna nuna ashí áeskattajai titiá” tímiayi.