Jrm. 19 - Yus Papí: Shuarja̱i̱ Yus Yamaram Chicham Najanamu

Muits yumpuntra nakumea nu

¹ Nuyá̱ Uunt Yus chichartak “Nuweja̱i̱ takastinian unuimiátra je̱e̱n weme muits najanamu sumakta. Túram Israernumia̱ uunt tura Yúsnan pujurniu peṉkeri̱ áiniana nuja̱i̱ yaruakarta.

² Túram Piṉjiniúma pakari̱n wa̱i̱ti̱a̱i̱ Jakach waiti tutaiya nui̱ wajasam Wi ámin títiatjamna nu ujakártatme.

³ Tura chicharainiakum ‘Jutanmaya̱ úunt akupniutiram núnisrumek Jerusaréṉnum pujatirmesha ashí antuktarum. Ashí Akupin Uunt Yus Israera Yusri̱ chichaak “Nekaatarum, ju̱ nuṉkanam tí waitsatniun Wi akupeajai. Tura ya ju̱na ántawa nuka áya nunak antittiawai.

⁴ Warí Israer shuarka Wíniaka iniaitiusaruiti. Tura ju̱ nuṉkanam mui̱jmiainian túrawaruiti núnisaraṉ nuiṉ najankamu yusan nisha nékainiachiat tura ni úuntri̱sha tura Jutanmaya̱ úunt akupin armia nusha nekaacharman kuṉkuinian áestuawaruiti. Ántsaṉ umitmákcharu numpe̱ncha nuiṉ tsuatmatkaruiti.

⁵ Nu arantcha ántar yus áestutai̱n Páaran najatkar ni uchirí̱n takamtsuk Páaran áestuiniawai. Wikia túrutkesha túratarum tíchamun tura áujmattankesha áujmattsachman núnisnak Wikia enentáimtankesha enentáimsachman túrawarai.

⁶ Tuma asamtai yamaikia Uunt Yus jú̱nis tawai. Iisiana, tsawant jeamtai nuka Tupit nuíchuka Piṉjiniúma pakarí̱ tunashtatui. Antsu maṉkartutai paka tunattawai.

⁷ Tura Jerusaréṉ nuyá̱ Jutanmaya̱ shuara enentáimmiari̱nkia ju̱i̱ ashí emestuktatjai. Núnisnak ni iwiaakmari̱n e̱a̱tainia nuna uwejé̱n íktusaran ni nemasri̱ puya̱ja̱i̱ amukarat tusan tsaṉkatkartatjai. Kame nu aentsu aya̱shí̱nkia yakiya̱ nanamtin yukartin tura nuṉkaya̱ yajasma yukartin ainia nuna yumaṉke̱ ajasártatui.

⁸ Tura nu péprunka ashí emeskaran mui̱jmiai̱ wishiktai̱ awajsartatjai. Tura ashí shuar nuní̱ naṉkaamainiaka nuna wáinkiar ¡Aaj, ju̱sha! ¿Urukakua jú̱nikiuitia? tusar tí untsurí ajas araknasha tura shuarnasha emesin ju̱i̱ ashí naṉkaamasua nuna enentáimias ujujmiákiar naṉkaamartatui.

⁹ Tura ní uchirí̱ namaṉké̱nak núnisnak ní nawantri̱ namaṉké̱ncha ayurawartatjai. Nuka ni nemasri̱ tura ni iwiaakmari̱n e̱a̱tainia nu áreṉkam matsamás wáitiainiak jakamnia enentáimsar nuamtak yunaiyawartatui” tajai.’

¹⁰ Tura nu ujakáram aents ámiji̱a̱i̱ winiartatna nu iimiainiamunam muits ijiakrata.

¹¹ Nu túram chichaakum ‘Ashí Akupin Uunt Yus chichaak muits nuweja̱i̱ najamun ijiakrar ataksha iwiaramniakaitⁱ. Nuja̱i̱ métek jú̱ aentsnaka tura pépruncha emeskattajai. Tura ikiusártin chíkich nuṉka atsá asamtai tsuat utsatai̱ Tupitnium iwiarnasartatui.

¹² Kame jú̱ nuṉkanka shuári̱ntiuk núnisan túrattajai Uunt Yus tawai. Tura jú̱ peprunka tsuat utsatai̱ Tupitia núnin awajsattsan túrattajai.

¹³ Tura je̱a̱ Jerusaréṉnum núnisaraṉ Jutanmaya̱ úunt akupniu je̱e̱ ainia nusha ántsaṉ nayaimpinmaya̱ suntar ashí irunainiana nuna enentáimtuiniak je̱á̱ taṉkiri̱ pakarí̱n kuṉkuinian áestuawarua nú je̱a̱ka ashí tura chíkich yus irunainia nuna umutai̱n ukatrarusha Tupitia núnisar mui̱jmiai̱ ajakártatui’ tajai” tímiayi.

¹⁴ Tura Jirimíaska Tupitnium jú̱ etserkat tusa Uunt Yus akupkámia nuyá̱ waketki̱ támiayi. Nuyá̱ Uunt Yusa Je̱e̱n wá̱i̱ti̱a̱i̱ri̱n naka wajas ashí shuar iruntrarun chicharainiak

¹⁵ “Ashí Akupin Uunt Yus Israera Yusri̱ chichaak ‘Nekaatarum, tí wáitsatniuja̱i̱ asutiáttajrume tímiajrumna nuna yamaikia ju̱ péprunam tura ashí niji̱a̱i̱ írutra matsatainia nui̱ akupeajai. Wari, ni enentái̱ ti kátsuram ajasármatai Winia chichamprun antuktinniasha peṉké nakitiáiniawai’ tawai Israera Yusri̱” tímiayi Jirimías.