Jrm. 18 - Yus Papí: Shuarja̱i̱ Yus Yamaram Chicham Najanamu

Ichiṉna najanniun nakumeamu

¹ Ataksha Jirimíasan Uunt Yus chicharuk

² “Nuweja̱i̱ takastinian unuimiátra nuna je̱e̱n wetá. Nui̱ Winia chichamprun ántumtikiattajme” tímiayi.

³ Tura wisha nuweja̱i̱ takastinian unuimiátra je̱e̱n wémajai. Tura tataṉnum takakmak pujan jearmiajai.

⁴ Kame piniṉᵏⁱ nájanmaitiat nuweja̱i̱ takastinian unuimiátra uweje̱ni̱ṉ yumpuntramai. Túrunamtai nuwe̱ja̱i̱ najanniuka itiur najanamak timiá péṉker aint tusa ni enentáimmia tímiatrus ataksha chíkich piniṉkian najanamai.

⁵ Nuya̱ṉka Uunt Yus chichartak

⁶ “Maa, Israer shuará, Wikia atumniaka nuweja̱i̱ takastinian unuimiátra túrana ¿nútikiachminkiaitjiarum? Wats íiskuana, Israer shuará, nuweja̱i̱ takastinian unuimiátra nuwen uwejnum takakna núnisaitrume átumka Winia uwejruí̱ṉkia.

⁷ Tura wárichik uunt nuṉka mátsatkamu ainia nuna nuíchuka nuṉka akupeamuri̱n ainia nuna tsurintran emestukaran tsai̱ tsai̱ awajsartaj tusan áujmattsattajai.

⁸ Túrasha uunt mátsatkamu ainia nuna Wi áujmattsajna nu ni yajauch túrutairi̱n iniaisarmataiṉkia Wisha asutiáwartatjai tiármajna núnaka núnisnak iniaisattajai.

⁹ Nuya̱ṉka wárichik chikichik uunt nuṉka mátsatkamun nuíchuka chikichik nuṉka akupeamun péṉker iwiarkan arakmaktaj tusan áujmattsattajai.

¹⁰ Tura Winia chichamprun umirtutsuk Wísha íimiai̱ṉ yajauchin túruiniakuiṉkia péṉker awajsattajrume tiármiaj núnaka Wisha túrachartatjai” turutmiai.

¹¹ Kame yamaikia Jutanam tura Jerusaréṉnum aents pujuiniana nu chicharainiakum Uunt Yus chichaak “Nekaatarum yajauchiji̱a̱i̱ átum wáitsatniun iwiarturan Wi tesarájrume. Tuma asamtai yamaikia aṉkant aṉkant atumí yajauch túrutairi̱ṉkia iniaisarum seertarum tawai tiartá” tímiayi.

¹² Túrasha chichainiak “Ame támena nuka peṉké túrachminiaitji. Antsu íi enentáimmiak werakur aṉkant aṉkant ii netse enentái̱ túrameaj nuke túrattaji” tiártatui.

¹³ Tuma asamtai Uunt Yus chichaak “Wats chíkich nuṉkanmasha ¿yaki tíniuncha antukuit? anintrústarum. Israerka nuwa̱ natsa áishmaṉja̱i̱ṉkia tsaniṉcha núniniaitiat mui̱jmiainian túraiti.

¹⁴ Kame Ríwianunam micha amúamu naint irunainiana nuyá̱ micha ¿aya méṉkakamniakait? Tura entsa micha yajaya̱ akainiana nusha ¿ku̱yu̱karminkiait?

¹⁵ Túrasha Wi shuarka Wíniaka kajinmátrukiar najankamu yus ainia nuna kuṉkuinian áestuiniawai. Kame nuna túruiniak yaunchu túrutairi̱nkia kajinmatkiar ti awajirar wekainiawai. Túmainiak jintia péṉker iwiarkamunam wekaatsuk yajauch jintianmaani̱ wekainiawai.

¹⁶ Ni túmainiamuja̱i̱ núṉkencha peṉké atsá aya jú̱nik awajsar tuke wishiktai̱ ajasártatui. Ashí aents nuní̱ naṉkaamainiak nuna wáinkiarka ‘¡Aaj, ju̱sha urukakua jú̱nikiuitia!’ tusar muuke̱ncha peakmaikia naṉkaamartatui.

¹⁷ Nuya̱ṉka nase etsa̱ jintiainmaya̱ winiana nútiksaran ni nemasri̱n íktusaran iniaisartatjai. Tura wáitsatin tsawant jeamtaisha apajá̱snasha íitsuk peṉké pachischartatjai” tímiayi Uunt Yus.

Yajauchin áujmatainiakui Jirimías Yusan seamu

¹⁸ Takui̱ chichainiak “Káunkatarum Jirimías chícham najatawarmi. Warí, Yúsnan takarniunka chícham jintíamuka taáttsashtatui tura chicharkatniusha neka ainia nunasha taáttsachartatui. Ántsaṉ Yúsnan etserniuncha chíchamka taáttsachartatui. Pai yamaikia winitiárum jiakarmi túrar ni chichame̱ṉka peṉké anturkachartai” tiármiayi.

¹⁹ Nuyá̱ Jirimías chichaak “Uunt Yusru anturtukta tura winia kajertuiniana nuna chichame̱sha anturkarta.

²⁰ ¿Warí, péṉker túramunam yajauchiji̱a̱i̱ akikmakminkiait? Kame winia iwiartustai tusar wa̱a̱ncha táutrurarai. Antsu wikia péṉker chichaman ujakáram Ame kajetáirmin wáinkiara̱i̱ṉ tusan Ámin atsaṉkrattsan Aminí̱ naka wajaschamkaj nu enentáimprakia.

²¹ Tuma asamtai ni uchirí̱ṉkia puya̱ja̱i̱ amuukarat tusam shuarnum surukaram iniaisarta. Túram ni nuwé̱ ainia nuka uchirtichu tura wajé̱ juákarti. Antsu ni áishri̱ṉkia jákatniunam wéarti ántsaṉ uchirí̱ natsa áiniana nuka mesetnum puya̱ja̱i̱ ijiumu ártí.

²² Tura áya aneachma suntar ni je̱e̱ní̱ káutkaram charaatum ajainiamu antuukati. Warí, winia achirkartai tusar wa̱a̱ncha táutruraruiti tura nawerui̱ eṉketkartai tusarsha ú̱kar ejatkan najatrukarai.

²³ Túrasha Ámeka Uunt Yusru, winia mantuatai tusar chichaman najatruinia nuka ashí nékame. Tuma asamtai ni tunáa túrawarmanumsha akikmatkaraip tura ni tunaarí̱sha Amiiya̱ṉka asakátraraip. Tura Ame kajetáiram jeattana nui̱ṉkia nu túrawarta antsu nui̱ṉkia Ámiji̱a̱i̱ nekapásarti” tímiayi Jirimías.