Jrm. 17 - Yus Papí: Shuarja̱i̱ Yus Yamaram Chicham Najanamu

¿Ya nekassha enentáimtustiniait?

¹ Jutá tunaari̱ṉkia aatai̱ jiruja̱i̱ tura tiamanti tsakari̱ji̱a̱i̱ ni enentái̱nkia tura aestai̱ kachurí̱ncha nuja̱i̱ áarmaiti.

² Ni uchirí̱sha nuna wáinkiar enentáimtiarti tusar túraiti. Kame Asera áestai̱ri̱ nuyá̱ Asera yus najankamu ainia nusha tura Asera enentáimtutai̱ numisha ukatkat numia nui̱sha Asera yus enentáimtutai̱ naintcha mash wáinkiar nékainiawai.

³ Nainniumsha tura pakarí̱ncha ni áestutairi̱ irunainiawai. Kame átumka naint írunna nui̱ ashí atumí nuṉke̱n tikishmátin asakrumin atumí kuítri̱nkia atantramar ashí yarurkarti tusan súsartatjai.

⁴ Winia kajetair átum atumí tunaari̱ji̱a̱i̱ ji ikiapárurmena nu keek tuke kapa̱a̱na núniktatui. Kame atumí nuṉke̱ncha Wi susamajrumna nu atumí tunaari̱ji̱a̱i̱ nuka emeṉkákuitrume. Tura nékashtai̱ nuṉkanam atumí nemasri̱n takamtiksattajrume.

⁵ Uunt Yus chichaak “Aents aentsnum enentáimiuk tura aents túramu yaintkiattawai tusa Uunt Yusan enentáimtatsna nuka yajauchiji̱a̱i̱ yumiṉkramuiti.

⁶ Kame tuma asa Arapá nuṉkanam numich ukatkatin wajana núnin átatui. Túmak kampuntin atsú aya káyanmaṉ tura nuṉkasha jeakú pujuschamnianum pujak péṉker tátatna núnaka wáinkiashtatui.

⁷ Aents Uunt Yusan enentáimtana nuka shiir awajsamuiti tura ni nekas enentáimtamuka Úunt Yusaiti.

⁸ Antsu numi entsá yantam wajá kaṉkapé̱sha entsá ajapén áchitra núnin átatui. Tura esatái̱ tsue̱r ajakuisha itiurchatka nekapchattawai tura nuke̱sha sámekak ártatui. Núnisaṉ esatái̱ entsa ku̱yu̱tái̱ uwitincha wariṉkish túmatsuk tuke neré wajattawai.

⁹ Aentsu enentái̱ṉkia ashí írunna núja̱i̱sha naṉkaamas ti anaṉmawiti. Tuma asa eseerachminiaiti. ¿Nunasha yaki nekaatⁱ?

¹⁰ Wikia Uunt Yus aentsu enentáinkia émamkesan iirainiajai. Tura enentáimtairi̱nkia nekapsan iirainiajai. Tura asan ni wekasarmaja̱i̱ tura ni túramu urukuit nuja̱i̱ métek aṉkant aṉkant akiktiniaitjiai.

¹¹ Kame anaṉma kuítrintin ajana nuka wa jurerchiat chikicha nujintrí̱n teketa tepana núnisaiti. Túrasha tsawantri̱ṉkia jeatsa̱i̱ṉ ájapeni̱ṉ kuítri̱ṉkia ikiuktiatui. Tura náṉkamas enentáimniua nusha tsawantri̱ amúamunam nekanattawai” tímiayi.

¹² Akupkur pujutai̱ tí shiira nu yámankamtaikniumia̱ juarki̱ tí naṉkamantuiti. Nuka ii Yus Shiir Awajtai̱ Je̱a̱iti.

¹³ Uunt Yusru, Israer shuar péṉker átinia nákamuri̱ntme. Tuma asakmin ashí shuar Ámin iniaitiámas kanainia nuka natsa̱a̱rartatui. Warí Úunt Yusai̱ya̱ iwiaaku entsa nuyá̱ kanakiaru ásar ni náari̱ṉkia nuṉká ju̱yu̱ri̱n aarma ártatui.

^14-18 Uunt Yusru uwemtikrurta túrutawakmin uwemprattajai. Warí Ámeka wi shiir awajtaintme. Kame aents chichartuiniak “¿Uunt Yusa chichame̱sha tui̱ aa?” ¿Urukamtai uminiatsu? turutainiawai. Túrasha ashamtikrukaip, Ámeka wi ú̱mtaintme. Antsu niṉkia yajauch tsawant itiariarta.

Sáwartin kijin júkishtin

^19-27 Uunt Yus chichartak “Jerusaréṉka wá̱i̱ti̱a̱i̱ri̱n wajasta túram úunt akupin ainia nusha tura ashí shuar pepru wá̱i̱ti̱a̱i̱ri̱ni̱ wá̱i̱niana nu chicharainiakum ‘Sáwartinkia kijin entsaaku waya̱shtiniaiti tura takatásh takaschatniuitrume tiartá’ turutmiai. Atumí aparí̱n tinia akupkámia núnisrum Sáwarka shiir enentáimtustarum. Támaitiat antutnash antukcharmiayi tura sunatnasha sunascharmiayi. Sáwarna akupkámu átum umíakrumni̱ṉkia péprusha péṉker átatui tura úunt akupin ainia nusha Tawitia pujutái̱ri̱n tuke pujusártatui. Tura Yusan yumiṉkiainiak Yus áestuatai tusar ashí nuṉkanmaya̱ aents káunkartatui. Tura Sáwarka Yúsnaiti tusarum shiir enentáimtachkurmiṉkia jiji̱a̱i̱ wá̱i̱ti̱a̱i̱ri̱nkia akattajai. Jerusaréṉnum úunt akupniu je̱e̱ írunna nusha esakártatui túrasha kajinkiachartatui” turutmiayi.