Jrm. 16 - Yus Papí: Shuarja̱i̱ Yus Yamaram Chicham Najanamu

Yus Jirimíasan nuatkaip timia

¹ Nuyá̱ Uunt Yus winia chichartak

² “Nuatkaip tura ju̱i̱ pujusmeka yajutmatcha yajutmakaip” turutmiai.

³ Warí Uunt Yus chichartak “Ju̱ nuṉkanam uchi áishmaṉ nuwa̱chisha akiiniawartatna nuyá̱ nuku uchin takusartatna tura apa yajutmarartatna nusha

⁴ tí najamin suṉkurja̱i̱ kajinkiartatui. Túrasha e̱a̱tcha e̱a̱rchamu núnisaṉ iwiartasha iwiarsachma ártatui. Antsu arakan péṉker neremtikin nuṉká matsasma núnisar juákartatui. Kame mesetja̱i̱ tura tsukaja̱i̱ amunkartatui. Nuyá̱ ni aya̱shi̱nkia nanamtin yukartin tura nuṉkaya̱ yajasma yukartin ainia nuna yumaṉke̱ ajasártatui” turutmiai.

⁵ Nú arantcha Uunt Yus chichaak “Ajakmáru útainia nuna je̱e̱ncha kúntuts enentáimkiun shiir enentáimtikrartaj tusamsha waya̱waip. Warí aṉkant pujustinniasha aneṉkrattairnasha tura waitnenkartutairnasha ju̱ shuarnumia̱ṉka Wikia júsaitjiai.

⁶ Tura nu nuṉkanam uuntcha uchisha jákartatui túrasha iwiarnaschartatui núnisaṉ úttancha útchartatui. Nin enentáimtusar aya̱shnium akamatnaksha akamakchartatui. Tura piniu awamatnasha awamarchartatui.

⁷ Núnisaṉ ni aparí̱ nukurí̱sha jákarmatai kúntuts pujuiniancha atsaṉkrataj tusa ayurtaṉkesh ayurachartatui tura umartinniaksha súsachartatui.

⁸ Núnismek namperan najanainia nu je̱a̱nam niji̱a̱i̱ tsaniṉkian yurumátaj tura umartaj tusam waya̱waip” tíniuiti.

⁹ Warí jú̱naka Ashí Akupin Uunt Yus Israer shuara Yusri̱ chichaak “Tuma asamtai ju̱ nuṉkanam warakur shiir enentáimsar kantamtai̱ncha núnisaṉ áishmaṉ nuwa̱ja̱i̱ nuatnaiyak kantamáiniancha atumsha íimprumni̱ṉ emeṉkátraran mitia awajsartatjai.

¹⁰ Ju̱ chicham aents ujaam chichartamainiak turamartatui ¿urukamtai Uunt Yussha iincha asutiá amutmaktaj turamajⁱ? ¿Tuit ii tunaarí̱sha tura ii Yúsri̱ji̱a̱i̱ yajauch túramusha tuit? turamartatui.

¹¹ Nui̱ṉkia chichaakum ‘Warí atumí uuntri̱ armia nu Winia iniaitiusar chíkich yusan umirkar tikishmátrarmai. Túrawar wi akupkámiaj nuna umirkacharmai’ tawai Uunt Yus títiatme.

¹² Tura átumka atumí uuntri̱ túrin armia núja̱i̱sha naṉkaamas túraitrume. Nekaata átumka atumíya̱ aṉkant aṉkant yajauch enentái̱ achikrum Wíniaka anturtutsuk wéarme.

¹³ Tuma asakrumin ju̱ nuṉkanmaya̱ṉka jí̱i̱rtatjarme. Túran atumsha tura atumí úuntri̱sha nékashtai̱ nuṉkanam ajapan iniaisattajrume. Nuiṉkia chíkich yus ainia nu tsawai̱sha tura káshisha tikishmátiattrume. Nuiṉkia Wikia peṉké waitnentrashtatjarme.

¹⁴ Tuma asamtai yamaikia nekaatarum, tsawant jeattawai. Kame nú tsawantinkia nekas tajai tusar ‘¡Iwiaakui Uunt Yus Israer shuaran Ejiptunam matsatun ji̱i̱rmia nuka!’ támaka atakka peṉké antuukashtatui, tawai Uunt Yus.

¹⁵ Nuka tútsuk antsu ‘¡Iwiaakui Uunt Yus Israer shuar arakaani̱ matsatun tura chíkich nuṉkanam achira yajá yaruakma matsatun awakear ikiankarmia nuka!’ títiatrume. Túram ní nuṉke̱ni̱n awakeararan ni úuntri̱n nuṉkan súsarmiaj nui̱ṉ matsasártatjai.

¹⁶ Nekaata Uunt Yus ju̱na tawai. Namakan achin ainia nuna Wi ti untsurí akupeajai túram achikiártatui. Núnisnak untsurí e̱a̱mniun akuprattajai tura ashí naint ainia nui̱sha tura ashí naint tépepranmasha tura kaya wa̱a̱ ainia ímianaisha wekasar e̱a̱mkartatui.

¹⁷ Warí Winia jí̱ruka ashí ni wekaamuri̱nkia wainiainiawai tura Wini̱i̱ya̱ṉka peṉké úmkachminiaiti tura Winia ji̱rui̱ya̱ṉka ni yajauchiri̱sha u̱mainiatsui.

¹⁸ Tura yajauch túrutainiam nuyá̱ tunáa túrutainmasha nuyá̱ patakan akikiártatjai. Tura jakaa ainia nú yus mui̱jmiai̱ ainia nuja̱i̱ Winia nuṉkarun tí yajauch awajsaruiti tura Winia nuṉkarka mui̱jmiai̱ ainia nuja̱i̱ piákarai” tawai Uunt Yus.

Jirimías seamu

¹⁹ Maa, winia kakarmar tura utúachmin asa itiurchat ákuisha winia ejamtair Uunt Yusru. Nuṉka náṉkatramunmaya̱ uunt nuṉka mátsatkamu ainia nusha Ámin káutramiartatui tura chichartamainiak “Ti nekas ii úuntri̱ṉkia yaintmakchamnia ántar wait áiniana nuna ikiurtámkiaruitji” turamartatui.

²⁰ ¿Kame shuar ní yusri̱niak najankamniakait? Túrasha nuka yuska áiniatsui.

²¹ Tuma asamtai yamaikia Wi nékamtikiajrume. Antsu yamaikia Winia kakarmarun tura Winia kakarmar nupetkachminia nuna iniaktustatjarme. Tura Winia naarka Uunt Yusa nu nekaattarme.