Jrm. 14 - Yus Papí: Shuarja̱i̱ Yus Yamaram Chicham Najanamu

Uunt esat átatui tusar étserma

^1-6 Uunt esat átatui tusa Jirimíasan Uunt Yusa chichame̱ tarimiayi. Tura náakam ainia nuka takarniúri̱n entsan akuptuiniakui nuṉka tá̱i̱miunmasha wénawai. Túrasha entsan wáinkiachar natsa̱a̱r yumiri̱n aya wá̱a̱nak takaku waketainiawai. Núnisaṉ kampunniunmaya̱ su japasha petsak yurumke̱ atsakui uchirí̱n ajapa ikiuiniawai.

^7-9 Maa Uunt Yusru Ame naarmi aneṉkrattairmiji̱a̱i̱ túrata. Ti nekas ántichu ajasuitji núnisaṉ Aminí̱sha yajauch túraitji. Túmaitkiurnisha Ámeka iiji̱a̱i̱ pujame tura Ame náarmiji̱a̱i̱ anaikiamuitji. Tuma asamtai ajapa iniaikiartusaip.

^10-12 Uunt Yus ju̱ aentsun pachis “Ántar wekatan ti wakerin ásar nuní̱ wekasatniun peṉké suritiainiatsui. Tuma asamtai Uunt Yuska nin anturainiatsui. Antsu ni tunaari̱n enentáimtus asutiáwartatui.” Nuyá̱ Uunt Yus chichartak “Ju̱ aents péṉker matsamsarat tusam seatiaraip. Kame ijiarmáwar ántar surustinia nuna súruiniakuisha peṉké nakitrurartatjai. Túrawaran niṉkia mesetja̱i̱sha tsukaja̱i̱sha suṉkurja̱i̱sha amukártatjai” tawai Uunt Yus turutmiai.

¹³ Nuyá̱ chichaakun “Maa Ashí Uuntri̱ Uunt Yusá nekaata. Yúsnan etserin ainia nu chicharainiak ‘Mesetcha atsuttawai tsukasha atumínkia tarutrámchartatui antsu ju̱ nuṉkaka nekas aṉkant matsamsatniun suramsattarme’ ujak tuíniawai” tímiajai.

^14-16 Nuyá̱ Uunt Yus chichartak “Yúsnan etserin ainia nu Winia náarun ántar pachisar waitruá etserainiawai. Kame Wikia niṉkia akupkacharuitjiai. Ímiaja̱i̱k wainkiamuncha waitruá etserainiawai tura ni enentái̱ji̱a̱i̱ṉ waitruá chichartamainiak ju̱ nuṉká ju̱ka mesetcha tsukasha atsuttawai turamainiawai. Túrasha nú Yusnan etserniuka mesetja̱i̱sha tsukaja̱i̱sha amuukartatui. Tura yana ujakármia nu aentsuk jákarmatai Jerusaréṉ jintianam ajapnawartatui. Túrawarmatai yáakesh nin iwiarsatniuka atsuttawai. Nuní̱ túrawaran ní yajauch túrutai̱ji̱a̱i̱ṉ akikiártatjai.

¹⁷ Ame chicharainiakum ‘Káshisha tsawai̱sha iniaitsuk úttiarum. Warí Wi shuar natsa nawantrua núnis ti kakaram awatramu asa ni kuímiari̱sha ti najaimtikiawarmatai yajauch awajsamuiti.

¹⁸ Nuṉká jíinkiunka puya̱ja̱i̱ mámun wainjiai. Núnisaṉ péprunmaṉka waya̱n tsukái suṉkurmakarun wainjiai. Núnisaṉ Yúsnan etserin tura Yúsnan pujurniusha nékashtai̱ nuṉkanam wekainiawai’ tiartá.

^19-22 ¿Jutanmaya̱ṉka ashik ajapawaruitiam? ¿Ame wakanmikia Seúnnaka nakitrákait? ¿Nuiṉkia tsuámartin atsai̱sha urukamtai iinkia jú̱tikiartuamsha akaṉkartukmam? Umishtairi̱sha nekamji tura ii uuntri̱ yajauchiri̱sha Amiin yajauch túraitji. Ame aneṉkrattai̱ náarmiji̱a̱i̱ iin ajapkartuawaip. Ame wincharmi pujutái̱ri̱ji̱a̱i̱ nakitkiarturaip. Ame iiji̱a̱i̱ chícham najanamamna nu peṉké ántar awajsaip. ¿Yumí yútumtikiamnia chíkich áwak? ¿Nayaimpinmaya̱ níṉkiash yuta? Maa Uunt Yusá ii Yusri̱ṉkia Ámechukaitiam. Aminí̱ṉ enentáimsar naká pujaji. Warí Ámeka ashí irunainia ju̱ najankaitme” tímiayi.