Jrm. 13 - Yus Papí: Shuarja̱i̱ Yus Yamaram Chicham Najanamu

Akachumtai̱ ríniuja̱i̱ najanamu

¹ Uunt Yus jú̱nis turutmiai. Weme akachumtai̱ ríniuja̱i̱ najanamu sumakam akachumata túrasha entsaṉka aju̱ṉkaip.

² Túrutkui Uunt Yus turutmia tímiatrusnak akachumtai̱n sumakan akachumamjai.

³ Nuya̱ṉka ataksháa Uunt Yusa chichame̱ tarutmiai. Tura chichartak

⁴ “Akachumtai̱ sumakma akachumamna nu achikiam weme Yúpratis entsanam kaya nákakamunam u̱ktá” turutmiai.

⁵ Nuya̱ṉka wena Uunt Yus turutmia tímiatrusnak Yúpratis entsanam ú̱kmajai.

⁶ Tura untsurí tsawant naṉkaamasu ai̱ Uunt Yus chichartak “Yúpratis entsanam akachumtai̱ u̱ktá tímiajmena nu werim jusata” turutmiai.

⁷ Nuya̱ṉka Yúpratis wena akachumtai̱ ú̱kman táuran jusamjai túrasha ashí mamuru asa wariṉkish itiurkachminiuyi.

⁸ Nui̱ ataksha Uunt Yusa chichame̱ winia tarutmiai.

⁹ Tura Uunt Yus chichartak “Akachumtai̱ mamurua nútiksaran Jutá waantu enentáimtumatairi̱n tura Jerusaréṉ ti naṉkamantu enentáimtumatairi̱ncha emestukartatjai.

¹⁰ Yajauch aents Winia chichamprun umiktinian nakitiáiniak ní enentái̱ji̱a̱i̱ṉ chíkich yus áiniana nuna shiir awajainiak tikishmátainia ju̱ aentsnaka akachumtai̱ mamurua núnis peṉké ántar awajsartatjai.

¹¹ Kame akachumtai̱ akachumamu aentsu aya̱shí̱i̱n péṉker ana tímiatrusar Israer shuarka Jutá shuari̱ja̱i̱ takamtsuk Winí̱ iruntrar Winia náarun pachisar shiir páantin awajtuiniak tí uunt naṉkamakuitme turutiarat tusaran irurarmajai. Túrasha anturtukcharmai” tawai Uunt Yus.

Israer péejchach awajsar yajá yaruakma

^12-14 Nuiṉkia chichaakum Uunt Yus Israera Yusri̱ jú̱nis tawai tiartá. Nekaatarum. Wi ju̱ nuṉkanam úunt akupniuncha nuyá̱ Yúsnan pujurniuncha tura Yúsnan etserniuncha núnisaṉ ashí Jerusaréṉnum matsatainia jú̱naka namperarua núnis awajsartatjai. Kame nuamtaksha tura chikichji̱a̱i̱ núnisaṉ apasha uchirí̱ji̱a̱i̱ nemasmanaikiarmatai tsaṉkurtsuk tura waitnentsuk emeskartatjai.

^15-22 Antuktarum naṉkamantu enentáimtuma áirap. Uunt Yus chichakuiti. Atumí Yusri̱ tukumtikramtsa̱i̱ṉ shiir awajsatarum. Tura támaitiatrum ántachkurminkia kúntuts enentáimsan úttiatjai. Uunt Yusa murikrí̱ Israer shuara nu achirmaiti. Uunt akupin nua̱rtiuk chicharkuram péejchach ajastarum túrunarum nuṉká pujustarum. Warí atumí tawaspari̱ṉkia iniarai túrunamtai Jutan ashí akintrukarai. Aneamu aents amasármania nusha ¿tui̱ pujuinia? Ame enentáimji̱a̱i̱ chichaakum ¿urukamtai ju̱sha taruti? Kame yajauch núkap túrutairmiji̱a̱i̱ ame pushiram yakiini̱ takunmiai túrunam saṉkanim misú ajasármai.

²³ Mukusa aentssha ¿puju ajasminkiait? Tura yampiṉkiasha ni áamaṉke̱n ¿yapaji̱ámniakait? Atumsha núnisrum aya yájauchik túratin unuimiátkatirmesha ¿itiurak péṉkersha túratarum?

^24-27 Tuma ásarmatai tsakiṉmakartatjai. Puusmach wáinmena nuka Wini̱ya̱ wainme tura wáitian chichainia nu enentáimtakum Wíniaka kajinmátrukniuitme. Tuma asakmin pushirminkia yápimia tímianai takurtiatjame túram natsanmai̱ ajaktatme. Ame tsanirmatairmeka peṉké yajauchiti. ¡Jerusaréṉká anearta! ¿Urutáik Winia enentáimturkumsha imiatkincha ajasmesh pujustam?