Jns. 3 - Yus Papí: Shuarja̱i̱ Yus Yamaram Chicham Najanamu

Níniwinmaya̱ aents enentáimpramu

¹ Nuyá̱ Uunt Yus ataksha Junasan chicharuk

² “Uunt pepru Níniwiniam wetá. Túram nuyá̱ aents Wi títiatjamna nú chicham etseruuta” tímiayi.

³ Tutai Junassha Uunt Yus akupkámia nuna umirak Níniwi péprunam wémiayi. Níniwisha ti uunt pepru asamtai menaintiú tsawant wekasar téntakminiuyayi.

⁴ Tura Junassha nui̱ jeá emka tsawant wekas étseruk “Uunt Yus chichaak ‘Ju̱ya̱ṉka kuaraintia tsawant jeamtai Níniwi péprunka emesrattajai’ tawai” tímiayi.

⁵ Nuna antukar nu péprunmaya̱ ashí shuar úuntnumia̱ juárkiar uchichimiak Yus nekas túrattawai tusar ni tunaari̱n nekaamawar ti kúntuts enentáimprar ijiarmáwar suí̱r pushin entsararmiayi.

⁶ Núnisaṉ Níniwi pepru akupniuri̱sha nu chichaman antuk niṉki enentáimtumas akupin pujutái̱nmaya̱ akaikí̱ entsatái̱ri̱ncha áimiar suí̱r pushin entsar yuṉkunim ajaptai̱niam pujusmiayi.

⁷ Kame akupniúka tura peṉkeri̱ armia nuja̱i̱ Níniwiniam chichaman akupénak “Ashí aentstiram ijiarmátarum. Núnisaṉ atumí waakari̱sha murikrísha ayurawairap tura entsaksha áarairap.

⁸ Túrarum ashí aentstiram suí̱r pushí entsarum núnisaṉ atumí taṉkuri̱sha nukukrum aṉkant aṉkant átum yajauch túrarmena nuka iniaisarum nekas enentáiji̱a̱i̱ Yus seatarum.

⁹ Kame ¿ya neka? Nu túrawakrinkia Yus atak enentáimiar ti kajertamkamun tsaṉkurtámpraṉka amutmakchaintiajti” tiármiayi.

¹⁰ Nui̱ṉkia Níniwinmaya̱ aents ni tunaari̱n enentáimtusar túrunawarmia nuna Yus wainiak asutiáwartatjai timia núnaka túrachmiayi.