Jir. 3 - Yus Papí: Shuarja̱i̱ Yus Yamaram Chicham Najanamu

Kristu nekaatin naṉkaamas péṉkeraiti

¹ Yatsurtiram warastarum, ii Uuntri̱ Kristu tí peṉker asamtai nuik áatramajrum nuna ataksha títiatjarme. Ataksha ujam yaintmakminiaitkiuiṉkia wíji̱a̱i̱ṉkia itiurchatchaiti atak enentáimtikratin.

² Ya̱wá̱ núni̱ṉ ainia nu shuarja̱i̱ tura péṉker takakmachuja̱i̱ aneartarum. Nu shuar Muisais timia núnis tuke yamaisha tsupirnaktiniaitrume tuíniawai.

³ Antsu iikia aya̱sh tsupirnakmaja̱i̱ péṉker átiniaitji tu enentáimtatsji. Iikia antsu ii wakaní̱ji̱a̱i̱ Yus shiir awajeaji tura Jesukrístunu asar Niṉki shiir wararji. Nu túrakur Muisais timia nu umintikia iitji.

⁴ Ju̱ nuṉkanam írunna nuja̱i̱ waantu enentáimpramniaitkiuiṉkia ashí shuarja̱i̱ naṉkaamas wikia waantu enentáimtumaraintjiai.

^5-6 Israer shuar asan Muisais timia núnisaṉ wi akiiniamtai uchu tsawant naṉkaamasmatai tsupirtukarmiayi. Israer shuarnum Piṉjiamín weaitjiai. Winia aparsha nukursha mai̱ Israer shuar áiniakui wi imiá Israer shuaraitjiai. Wisha Pariséu tuinia núnisan Muisais akupkámun ti umirin asamtai chíkichkia winia sumamtikiatniun tujintrin ármiayi. Tura Pariséu asan Kristu shuari̱n ti kajerkan áintramjai.

⁷ Ashí núja̱i̱ṉkia waantu enentáimtumauyajai. Antsu yamaikia Krístuja̱i̱ṉkia peṉké ántar áiniawai tajai.

⁸ Ashí enentáimpramnia ákuisha winia úuntur Jesukrístu shiir enentáimtustin nekas péṉkeraiti. Nu asamtai Krístunu ajakun wi takusmaj nu mui̱jmiai̱ ajasmatai núnaka iniaisámjai.

⁹ Nuna túran Niji̱a̱i̱ tsaniṉkian pujajai. Tura akupkámu umirkatniuja̱i̱ péṉker ajaschaitjiai antsu Krístun enentáimtakui Yus “péṉkeraitme” túrutui.

¹⁰ Tuma asamtai ashí naṉkaamas wakeraj nu ju̱i̱ti, Krístun péṉker nekaan nekas enentáimtustinniasha tura ni iniantkímiu kakarman takustinniasha wakerajai. Tura Niji̱a̱i̱ métek ajastinian wakerakun ni waitkiamunam tsaniṉtinniasha tura Ni jakamia núnisan jákatniuncha wakerajai.

¹¹ Túraknaka Krístuja̱i̱ métek jakamunmaya̱ nantaktiaj tusan wakerajai.

Krístun umiruk Papru kaka̱a̱rma

¹² Kame wakerukuitjiana nuna mash umirkachuitjiai. Krístuja̱i̱ métek nekas imiá péṉker shuar ajaschaitjiai. Túrasha Kristu Jesus “nui̱ ejetajam” emka túrutkui wisha nui̱ jeataj tusan kakaram ajasan pimpitsuk takaajai.

¹³ Yatsuru, wisha nui̱ jeajai tátsujai. Antsu yaunchu túrutai̱n kajinmátkin kakaram ajasan Kristu wakeramunam jeatniun takaajai.

¹⁴ Tura nuna umikmatai Yus untsurkamtai nayaimpiniam Jesukrístuja̱i̱ tsaniṉkian shiir pujustinian Yus surustatui.

¹⁵ Ashí shuar Yusja̱i̱ katsua̱ru ájinia nu wi tájana núnis “jeachuitjiai” tu enentáimpratniuitji. Tura “jeaitjiai” enentáimkiurminkia Yus nunasha atak enentáimtikramprattarme.

¹⁶ Tura aneartarum. Nakimtsuk jeajnia nuja̱i̱ métek umirkatin pimpitsuk takastiniaitji.

¹⁷ Yatsuru, wisha tura chikitcha wiji̱a̱i̱ métek péṉker túrajnia nu wáinkiuram atumsha núnisrumek túratarum.

¹⁸ Kame untsurí Kristu krusri̱ nemasri̱ ainia nu nui̱ṉ wekainiawai. Núnaka ataksha tura nuyá̱ yamaisha útkun ni aneartarum tusan ujakuitjiarme.

¹⁹ Tuma ásar emesratniunam akupnákartatui. Ni aya̱shí̱ wakeramun ni yusri̱ya áintsaṉ tuke umirainiawai. Natsanmainian túruiniayat wararainiawai. Tura ju̱ nuṉkanmaya̱nak enentáimtuiniawai.

²⁰ Antsu iikia nayaimpinmaya̱ shuar asar ii Uuntri̱ Jesukrístu iin uwemtikrampra asamtai nayaimpinmaya̱ tatí tusar nákaji.

²¹ Ni taa ii yajauch aya̱shi̱n yapaji̱á ni aya̱shí̱ji̱a̱i̱ métek ti shiir awajsattawai. Ashí úunt akupin ajas nu kakarmaja̱i̱ túrutmattaji.