Jiin. 4 - Yus Papí: Shuarja̱i̱ Yus Yamaram Chicham Najanamu

Yus kakarmari̱n Muisaisan súamu

¹ Nuya̱ṉka Muisais aya̱k “Warí Uunt Yuska wantintiurmakcha antra tame turutainiak wi ujamsha wáitrakum tu wekaam tusa aya kákantrichartatuak” takui̱

² Uunt Yus anintrak “Achíakmena nusha ¿warimpiait?” tutai “Wai̱n achíakjai” tímiayi.

³ Nuyá̱ Uunt Yus chicharuk “Nuṉká aju̱a̱nta” takui̱ nu wai̱ nuṉká aju̱a̱ntam napi najanarmiayi. Túrunamtai Muisais ashamak úkumur waketmiayi.

⁴ Nuya̱ṉka Uunt Yus Muisaisan chicharuk “Uwejé̱m iwiaintiukam napi ujuknum achikta” tímiayi. Tutai napi ujuknum achikiam nápitiat ataksha ni uwejé̱n wai̱ najanarmiayi.

⁵ Ataksha Uunt Yus Muisaisan chicharuk “Nuní̱ túrakmin nuiṉkia ‘Uunt Yus ame Úuntrumin Aprajáma Yusri̱ tura Isaka Yusri̱ nuyá̱ Jakupa Yusri̱ nekas wantintiurmakúme’ turamartatui” tímiayi.

⁶ Nu arant Uunt Yus chicharuk “Ame netsepmea nui̱ uwejé̱m pushirmin awayá̱ta” takui̱ awayá̱miayi. Tura jusa iyaj tukamá kuchaprukmiayi. Tura nu kuchapsha micha timianú puju ajasún wáinmiayi.

⁷ Nu arantcha chicharuk “Ataksha túrata” takui̱ netsepnum ni uwejé̱n pushiri̱n awayá̱ jusa iyaj tukamá mash tímiatrusaṉ péṉker kuchaprukcha ajasún wáinmamkamiayi.

⁸ Tura nu túrakum emka iniakmastatmena nui̱ nekasaiti turamainiachkuisha antsu ataksha túrakum iniaktusartatmena nui̱ nekas tame turamartatui.

⁹ Nuyá̱ nu arant jimiará túramu iniaktusartatmena nuna nekasaiti tiar anturtamainiachkuiṉkia antsu nui̱ṉkia Niru entsanmaya̱ shikikiam nu entsa nuṉka ju̱ju̱ptinnium ukarta. Tura Niru entsa shikikiam nuṉka ju̱ju̱ptinnium ukartatmena nuke numpa ajastatui.

¹⁰ Nuya̱ṉka Muisais Uunt Yusan aya̱k “¡Maa Uuntá! Wikia yáunchusha tura yamái Ámin takartámin áujeamna ju̱i̱sha unuushím chicháu asan paant chichachuitjiai” tímiayi.

¹¹ Nuna takui̱ Uunt Yus aya̱k “¿Yaki aentsu wene̱ncha najatamia tura múutnasha, empekúncha, kusurúncha tura wáinmancha, ya najankamia. Kame Wiki Úunt Yuschakaitiaj?

¹² Tuma asamtai yamaikia wetá. Ame warí títiatam núnaka Wi jintintrattajme” tímiayi.

¹³ Nuyá̱ Muisais chichaak “Uuntá, waitneasam chíkich aents akupkata” tímiayi.

¹⁴ Nuya̱ṉka Uunt Yus Muisaisan kajerak chicharuk “¿Wi ame yatsumin Araunan Riwí shuar péṉker chichamtinia nuna nékatsjak? Kame nusha ámiji̱a̱i̱ iṉkiukataj tusa winiawai. Tura ámin wáitmak warastatui.

¹⁵ Tura ámeka Wi títiatjamna ímiatrusmek jintin wetá. Kame Wikia atumji̱a̱i̱ pujuttajai. Túmakun átum túrattarmena nuna jintintratjarme.

¹⁶ Ámeka Wi tájamna núnismek Araun jintintiatme tura Arauncha ame chichammin aentsun ujakártatui. Tura Araunja̱i̱ Yusa núnis átatme.

¹⁷ Tura wai̱ takakmena nuka takusta. Nuja̱i̱ aents túrachmin túramu paant iniakmastatme” Yus tímiayi.

Muisais Ejiptu nuṉkanam wéamu

¹⁸ Nuya̱ṉka Muisais ni we̱a̱rí̱ Jitru pujamunam waketki̱ chicharuk “Ejiptunam wi shuar túkeash iwiaaku pujuinia nuna waketkin iyuwartaj tsaṉkatrukta.” Takui̱ Jitru chicharuk “Aṉkantaitme wetá” tímiayi.

¹⁹ Núnisaṉ Uunt Yus Muisaisan Matiannum pujan chicharuk “Pai yamaikia, Ejiptunam waketkitia, ámin mantamataj turamarmia nuka jákaruiti” tímiayi.

²⁰ Nuya̱ṉka Muisais ni nua̱ri̱n tura uchirí̱ armia nunasha umpurunam ekenkar Ejiptu nuṉkanam wéak Yusa wai̱ri̱ncha jukimiayi.

²¹ Nuyá̱ Uunt Yus Muisaisan chicharuk “Ejiptunam waketkim aents túrachmin túrata tájam nuka Parauṉ íimmianum ashí túrata. Tuma ai̱ṉsha ni enentái̱n ikiatsuátrattajai, Israer shuaran akupkacharat tusan.

²² Tura Parauṉ chicharkum ‘Uunt Yus chichartamuk “Israerka winia uchir iwia̱i̱ri̱nti.

²³ Winia uchir jíinkiar wéar tikishmátrurarat iniaisarta tájame. Tura wétin tsaṉkateachkumni̱ṉkia ame uchirmi iwia̱i̱ri̱n mantuawartatjai” Yus túramui titiá’” tímiayi.

²⁴ Tura jintiá kánuiniamunam Uunt Yus Muisaisan jiintiuki̱ iṉkiuṉ nui̱ṉ mátaj tu enentáimtusmiayi.

²⁵ Túrasha Sépura kaya iwiarar atsakamuja̱i̱ ni uchirí̱ shunirí̱ nuapchiri̱n tsupirak Muisaisa nawe̱n naṉkía tukú chicharuk “Ámeka winia nekas numparuí̱ya̱ áishruitme” tímiayi.

²⁶ Tura nuna túramtai Yus Muisaisan mátaj tu enentáimtimia núnaka iniaisámiayi. Kame Sépura “Winia nekas numparuí̱ya̱ áishruitme” timia nuka ni uchirí̱ tsupirnakmanum núnaka tímiayi.

Muisais Araunja̱i̱ Israer shuar chicharma

²⁷ Nuya̱ṉka Uunt Yus Araunan chicharuk “Kampuntin atsamunam Muisais iṉkiuṉtaj tusam wetá” tutai Arauncha we Muisaisja̱i̱ Yusa náintri̱n iṉkiunaik miniaknaikiar yapin mukutnaiyawarmiayi.

²⁸ Tura nui̱ Muisais Araunan ashí Yus ni chichame̱ etserkatniun tura aents túrachminian túratniun kakarman Yus susamia nuna mash ujarmiayi.

²⁹ Nuyá̱ Muisais Araunja̱i̱ waketkiar Israer shuara uuntri̱ armia nuna irurarmiayi.

³⁰ Tura Uunt Yus Muisaisan ujakmia nuna Arauncha ashí etserkamiayi. Nuya̱ṉka ashí Israernumia̱ iimiainiamunam aents túrachmianian túrak iniaktusarmiayi.

³¹ Nuna iisar ashí Israernumia̱ shuar “nekasaiti, Yus Israer shuartin íirmainiaitji núnisaṉ ii wáitiamuncha nekaawiti” tusar Yusan enentáimtuiniak tikishmátrar shiir awajsarmiayi.