Jiin. 38 - Yus Papí: Shuarja̱i̱ Yus Yamaram Chicham Najanamu

Yus súakur taṉku takamtsuk áestutai̱

^1-7 Núnisaṉ Yus súakur taṉku takamtsuk áestutai̱ akasia numiji̱a̱i̱ najanamai. Esantí̱sha waṉkantí̱ji̱a̱i̱ métek seṉku kuntuyi antsu yakiri̱ṉkia menaintiú kuntu jeá najanar yaṉkú jiruja̱i̱ eṉkekmauyi. Kame ashí takakmatai̱ armia nuka nijiamatai̱sha shikitiái̱sha amamkusha ijiú jutai̱sha entsa shikitiái̱sha yaṉkú jiruja̱i̱ najankamu armai. Núnisaṉ yaṉkú jiruja̱i̱ neka ánin najanamuja̱i̱ Yus áestutai̱ yantamén wakenmaani̱ ájapeni̱ṉ nukukarmai. Tura numiji̱a̱i̱ weakar júkitniun kuatru tsukiakmari̱n yaṉkú jiru unuikmaja̱i̱ kuatru tenten najatkamai. Numi yanaktinkia akasiaja̱i̱ najanar yaṉkú jiruja̱i̱ eṉkekmauyi. Numi nakarár najanamu asa Yus áestutai̱ṉkia initiaani̱ṉkia wa̱u̱yi.

Nijiamatai̱ yaṉkú jiruja̱i̱ najanamu

⁸ Núnisaṉ nijiamatai̱sha tura nawe̱ṉsha Yus Shiir Awajtai̱ Je̱a̱ wá̱i̱ti̱a̱i̱ri̱n nuwa̱ takakmarmia nuna íspikri̱ yaṉkú jiruja̱i̱ najankamu armia nuja̱i̱ najanawarmai.

Yus Shiir Awajtai̱ Je̱a̱ a̱a̱ri̱

^9-20 Núnisaṉ á̱a̱ri̱ṉkia arakaani̱sha tura nuṉkaani̱sha riniu yaraṉmarmaja̱i̱ sian kuntu jean najanamai. Ashí yantamén painti pau núnisaṉ ekempratniuri̱sha yaṉkú jiruja̱i̱ painti najatamuyi. Pauri̱n tséṉken tura chíkich nui̱ najatkamu arma nuka kuít jiru armai. Tura etsa̱ akatainmaani̱ṉkia seṉkuintia kuntu tura pauri̱sha ekempratniuri̱sha tias armai. Núnisaṉ nákari̱i̱ṉcha seṉkuintia túrasha chikichik yantaméni̱ṉ kinse kinse nakakma tura nui̱sha menaintiú pau ekempratniuri̱ji̱a̱i̱ armai. Tura a̱a̱ri̱ wá̱i̱ti̱a̱i̱ri̱ṉkia nenamu tarach ríniuja̱i̱ najanamu tura wiṉkia yamákáiji̱a̱i̱ nuyá̱ tí peṉker kapanniuja̱i̱ náimpramuyi. Esantí̱ṉkia painti kuntuyi tura waṉkantí̱ṉkia séṉkuyi tura pauri̱sha ekempratniuri̱ji̱a̱i̱ kuatru armai. Yus Shiir Awajtai̱ Je̱a̱ ajintrutairi̱ tura á̱a̱ri̱ṉkia ajintrutairi̱sha yaṉkú jiruja̱i̱ najanamu armai.

Ashí takakmatai̱ imianú kuit jeaiti timia

^21-31 Yus Shiir Awajtai̱ Je̱a̱n je̱a̱mainiakka wariṉkish takasárman Muisais aartarum tutai Arauna uchirí̱ Itiamár urutmá kuitia ajapnama nuna áararmiayi. Jutá shuarnumia̱ Pirsaríir Tan shuarnumia̱ Uriapja̱i̱ Uunt Yus Muisaisan akupkámia núnaka ashí túramiayi. Kame takakmasarmia nu ashí irumpramka paintinuíwi tarentu tura siatisiántu traintia sikru jeá kúrinkia ikiusármiayi. Tura kuít jiruka sian tarentu tura mir siatisiántu sataintia seṉku sikru jean ikiusármiayi. Kame aents nekapmarma painti uwí takaku yakini̱ armia nuka chikichik síkruka jeatsuk ájapeni̱n akikma armia nuja̱i̱ métek jeamiayi. Nuka saisiantutráis mir kiniantu seṉkuintia jeá amai. Antsu yaṉkú jiruka sataintia tarentu nuyá̱ tus mir kuatrusiántu sikru jeá amai.