Jiin. 37 - Yus Papí: Shuarja̱i̱ Yus Yamaram Chicham Najanamu

Yus Aentsja̱i̱ Chícham Najanamu Eṉketai̱

^1-5 Núnisaṉ Pisaríirsha Yus Aentsja̱i̱ Chícham Najanamu Eṉketáin akasia numiji̱a̱i̱ najanamai. Esantí̱ṉkia jimiará kuntu nuyá̱ ajapén tura waṉkantí̱ṉkia chikichik kuntu nuyá̱ ajapén nuyá̱ yakiri̱ṉkia chikichik kuntu nuyá̱ ajapén jea kurimkiamu armai. Tura weaká júkitniun kuatru nawe̱ arma nui̱ kuri unuikmaja̱i̱ tenten kuátrun najatamai tura numin wearak apujsamai.

Tunaan Akikmatrukmatai Tsaṉkurnatai̱

^6-9 Núnisaṉ Tunaan Akikmatrukmatai Tsaṉkurnatai̱n aya kúriji̱a̱i̱n najanamiayi. Tura etektutai̱ri̱ mai̱ yantamén martiyuja̱i̱ nekear jimiará kirupínian kuriji̱a̱i̱ najanamai. Tura etektutai̱ri̱n yakini̱ kirupín yapa̱a̱r initiaani̱ íimkiar pujuarmai.

Yus Iiji̱a̱i̱ Pujawai tama paṉ awa̱tai̱

^10-16 Núnisaṉ Yus Iiji̱a̱i̱ Pujawai tama Paṉ awa̱tai̱ncha akasia numiji̱a̱i̱ esantí̱ṉkia jimiará kuntu tura waṉkantí̱ṉkia chikichik kuntu tura yakiri̱ṉkia chikichik kuntu nuyá̱ ajapén jean najanamai. Tura weaká júkitniuncha kuatru tenten najata kurimkiamai. Núnisaṉ yanakí̱ júkitniuri̱ncha numiji̱a̱i̱ najana nunasha kurimkiamai. Núnisaṉ awa̱tai̱niam takakmatai̱ncha aya kúriji̱a̱i̱ṉ piniṉkian, shikikiá ukatai̱n, amamkun tura ichiṉnan najankamai.

Ekemákar ekentai̱ kuriji̱a̱i̱ najanamu

^17-24 Núnisan ekemákar ekentai̱ncha martiyuja̱i̱ nekear aya kúriji̱a̱i̱ṉ najanamai. Sais kunturtin asa ju̱í̱ni̱sha menaint tura atuni̱sha menaint armai. Núnisaṉ shirikip eṉketái̱ncha aya kúriji̱a̱i̱ṉ siátin najatamai. Ekemákar ekentai̱n tura nui̱ takatai̱ ainia nunasha aya kúriji̱a̱i̱ṉ kijintri̱ṉkia chikichik tarentu jeaja̱i̱ najanamai.

Kuṉkuin Yus áestutai̱

^25-29 Núnisaṉ kuṉkuin áestai̱ncha akasia numiji̱a̱i̱ najanamai. Tura nuka ashí yantame̱ métekrak chikichik kuntu jeá armai antsu yakiri̱ṉkia jimiará kuntuyi. Kachurí̱sha nu numiji̱a̱i̱ṉ najatar kurimkiamuyi. Tura weakar júkitniuri̱sha kuatru tenté kúrik najatar yanaktintri̱sha akasiaja̱i̱ najanar kurimkiamuyi. Núnisaṉ ukattai̱ asuitincha tura kuṉkuinian najanin tí peṉker kuṉkuinniasha najanawarmai.