Jiin. 32 - Yus Papí: Shuarja̱i̱ Yus Yamaram Chicham Najanamu

Israer shuar kurí waakan najanawar tikishmátma

¹ Tura Muisais naint wakamia nuyá̱ wari taachkui Israer shuar Araunan irunturar chicharainiak “Muisais Ejiptunmaya̱ iin ji̱i̱rmarmiaj nú aishmaṉsha ¿urukayik? nékatsji. Tuma asamtai yamaikia iin juramkiartin yus najankata” tiármiayi.

² Nuyá̱ Israer shuar nuna tuíniakui Araun chicharainiak “Nuiṉkia atumí nua̱ri̱sha nawantri̱sha tura uchirí̱sha kurin akí̱a̱rainia nu jurusrum ikiatruktarum” tímiayi.

³ Araun nuna takui̱ ashí Israer shuar kuriji̱a̱i̱ najanamun akí̱a̱ru armia núnaka ímiatrusaṉ jurusar ikiatkarmiayi.

⁴ Tura súsaram Araun kuriji̱a̱i̱ waakan najana chicharainiak “Israer shuara, ju̱i̱ti atumí yusri̱ Ejiptunmaya̱ ji̱i̱rmarmiarumna nu” tiármiayi.

⁵ Nuyá̱ Araun nuna iis waaka kuriji̱a̱i̱ najanamu wajamia nuna nákari̱n kayá irumar áestutai̱n najana kakantar chicharainiak “Kashin Uunt Yus námper najatattaji” tímiayi.

⁶ Tura kashin káshik taṉkun maa áestuawar nuyá̱ tunaanumia̱ aṉkant ajaji támancha súsar iruntrar yurumá úmuiniak ti wararainiak jantsempruawarmiayi.

⁷ Nuyá̱ Uunt Yus Muisaisan chicharuk “Naintia wárik akaikitia. Ame shuarum Ejiptunmaya̱ jí̱i̱rmam nu tunaan túrawarai.

⁸ Kame Israer shuar wi akupkámu chichaman umitsuk kuriji̱a̱i̱ waakan nakumak najanawar nuna taṉkú maa áestuiniak ‘Israer shuara, ju̱i̱ti atumí yusri̱ Ejiptunmaya̱ ji̱i̱rmarmiarumna nu’ tusar tikishmátainiawai” tímiayi.

⁹ Núnisaṉ Uunt Yus Muisaisan chicharuk “Ju̱ aentsun ti paant nékainiajai. Nisha peṉké umichu áiniawai.

¹⁰ Tuma asamtai ju̱ aentsun kajerkan amuktaj tsaṉkatrukta. Túran amiiya̱n untsurí aents awajsattajme” tímiayi.

¹¹ Nuiṉkia Muisais Uunt Yusan ni Yusri̱n waitnentrarat tusa seak “Uunt Yusá, kakarmarmiji̱a̱i̱ tura tujintkiachu uwejmiji̱a̱i̱ ame shuarum ji̱i̱rariatmesha ¿urukamtai imiasha kajerkartatam?

¹² Warí Ejiptunmaya̱ aents chichainiak ‘Yuska Israer shuarnaka Ejiptunmaya̱ṉka nainnium yaruak amuktaj tusa ju̱ya̱ṉka jí̱i̱ruiti’ turamiartatui. Tuma asamtai amé shuar suir kaje̱ntukam amuktaj tu enentáimturum nuka iniaisata.

¹³ Kame ámin takartámin Aprajám, Isak, Israersha nekas tájame tusam amek pachimiasam chicharkum ‘Ame shuarumin yaa nayaimpiniam írunna imianú untsurí awajsattajai. Núnisnak atumí tiraṉki̱nkia anajmatramiaj nu nuṉkan ashí súsatniuitjiai túram nisha tuke nui̱ matsamsatin áiniawai’ tímiam nu enentáimturta” tímiayi Muisais.

¹⁴ Nuya̱ṉka Muisais tu seam Uunt Yus ni shuari̱n yajauch túrattajai timia núnaka iniaisámiayi.

¹⁵ Nuyá̱ Muisais Senainiumia̱ jimiará kaya pakamámunam akupkámu chicham ju̱í̱ni̱sha á̱a̱wini̱sha mai̱ paen áarman takukí̱ táamiayi.

¹⁶ Nu kayanka Yus najanauyayi tura áarmari̱sha Yusak áaruyayi.

¹⁷ Tura Jusuí Israer shuar charaatum ajainian antuk Muisaisan chicharuk “Mesetan matsamta núnis matsamkamunam charaatum ajainiawai” tímiayi.

¹⁸ Jusuí nuna takui̱ Muisais aya̱k “Wikia mesetnum nupetmakar tura nupetmakcharsha charaatum ajainianka ántatsjai antsu kantamáiniak charaatum ajainiamun ántajai” tímiayi.

¹⁹ Nuya̱ṉka Muisaissha matsamkamunam támiayi. Nui̱ taa Israer shuar waakan kuriji̱a̱i̱ nakumak najanawar jantsempru matsamtuinian wainiak ti kajekmiayi. Tura jimiará kaya Akupkámu Chicham áarman takakuya núnaka Senái táritkiamuri̱n aji̱a̱r tsáirmiayi.

²⁰ Tura waakan nakumkar najanawarmia nuna jukí̱ jinium áesamiayi. Tura nekeṉ ju̱yu̱mak entsá utsamiayi. Nuyá̱ Israer shuaran áararmiayi.

²¹ Tura Muisais Araunan chicharuk “Ju̱ aentssha ¿warí itiurtámkarmatai imiá naṉkaamas tunaasha túrumtikiawarum?” tímiayi.

²² Tutai Araun áimiuk “Winia uuntru kajertukaip. Ju̱ aents aya yajauchiniak túratniun enentáimin ainia nu, paant nékame.

²³ Warí ni chichartuiniak ‘Iin yarurmaktin ii yusri̱ najankata. Muisais Ejiptunmaya̱ iin ji̱i̱rmarmiaj nú aishmaṉsha ¿urukayik? nékatsji’

²⁴ tuíniakui wi chicharainiakun ‘Nuiṉkia ya kurin takaka nu ikiankatarum’ tutai ikiankarmayi. Túrawarmatai kuri jinium epeam waaka nakumnak najanar jiinkimiai” tímiayi.

²⁵ Tura Israer shuarka náṉkamas tunaan túrattsa wakeruiniakui Araun enentáimtsuk tsaṉkatkaram náṉkamas tunaan túruiniak nemasri̱ wishiktai̱ natsanmai̱ ajasárun Muisais wainiak

²⁶ matsamkamu wá̱i̱ti̱a̱i̱ri̱n wajas Israer shuaran chicharainiak “¿Ya Uunt Yusan nekas umirkatniun wakera? nu wiji̱a̱i̱ wajastarum” tímiayi. Takui̱ Riwí uchirí̱ armia nuke Muisais wajamunam weantkarmiayi.

²⁷ Tura nui̱ chicharainiak “Uunt Yus Israer shuara Yusri̱ jú̱nis tawai ‘Aṉkant aṉkant puyá̱ achikrum matsamkamu wá̱i̱ti̱a̱i̱ri̱n wayá̱ wekaatusrum nui̱ waya̱rum atumí yachi̱ṉsha, amikrí̱ṉsha tura írutramurmeksha mátarum’ túramprume” tímiayi Muisais.

²⁸ Nu tutai Riwí shuarka Muisais timia nuna uminiak, nu tsawantini̱ṉ menaintiú mir aentsun máwarmiayi.

²⁹ Nuyá̱ Muisais Riwí aentsun chicharainiak “Yamaikia Uunt Yus timia nu umikiu asarum Uunt Yusna atai tusarum surumakuitrume. Atumí uchirí̱ji̱a̱i̱ tura yachi̱ji̱a̱i̱sha Yus umirkatin tura asarum yamaikia shiir pujutnum yumiṉkramuitrume” tímiayi.

³⁰ Nuya̱ṉka Muisais kashin tsawa̱r Israer shuaran chicharainiak “Átum tunáa ti túrarme. Tuma asamtai Uunt Yusai̱ wéajai seattiajrum tusan. Túrasha nuja̱i̱ Uunt Yus ‘máakete’ títiatuak” tímiayi.

³¹ Tura Muisais Uunt Yusai̱ ataksha waketki̱ jearí chicharuk “Maj, Israer shuar kuriji̱a̱i̱ ántar yusan najankaru asar tunaan ti túrawarai.

³² Túrasha yamái Israer shuara tunaarí̱ tsaṉkurarta. Tura tsaṉkurartin nakitiakmeka waitneasam winia naar ame papirumin aarma nu japirturta” tímiayi.

³³ Tutai Uunt Yus Muisaisan aya̱k “Aents Winí̱ tunáa túrana nunak winia papirui̱ ni naari̱ aarma nuna japiriajai.

³⁴ Pai, yamaikia waketkitia. Túram Wi tímiajmena nui̱ Israer shuar yaruakta. Tura ame wéakmin winia nayaimpinmaya̱ suntar amiin eem wétatui. Nuyá̱ wi asutiátin tsawant jeattana nui̱ ni tunaari̱n asutiáwartatjai” tímiayi.

³⁵ Kame Israer shuar Araun waaká kuriji̱a̱i̱ najanamun tikishmátainiakui Uunt Yus suṉkurja̱i̱ asutiáwarmiayi.