Jiin. 30 - Yus Papí: Shuarja̱i̱ Yus Yamaram Chicham Najanamu

Kuṉkuin aestai̱ najanamu

¹ Uunt Yus chichaak “Núnismek kuṉkuin áestai̱sha akasia numiji̱a̱i̱ najanata.

² Nuna esantí̱sha tura waṉkantí̱sha chikichik kuntu jea nuyá̱ yakiri̱ṉkia jimiará kuntu jeá najanata. Núnisaṉ kachurí̱sha nui̱ṉ áchitra najatata.

³ Tura pátatkesha yantaméncha nuyá̱ kachurí̱sha kúriji̱a̱i̱ṉ ukatkata, túram nakumprukmari̱ ainia nusha aya kúrik awajsata.

⁴ Núnisaṉ numiji̱a̱i̱ wearkar júkitin nakumkamu waatka najatamua nui̱ nuṉkaani̱ya̱ mái̱ yantamen kuriji̱a̱i̱ tenté jímiar najatkam neturta.

⁵ Wearkar júkitniusha jímiar akasia numi iwiaram aya kúrik awajsata.

⁶ Túram Yus Aentsja̱i̱ Chícham Najanamu Eṉketai̱ pujana nui̱ ayamach tarach nenamunam eem tura Tunaan Akikmatrukmatai Tsaṉkurnatai̱niam Ámiji̱a̱i̱ wainniaittiajnia nui̱ eem Yus áestutai̱ṉkia apujsata.

⁷ Tura Araun tuke káshik ekemátai̱n iwiaruk tí peṉker kuṉkuinian áestitiawai.

⁸ Tura kí̱akui̱ Arauncha ekemátai̱n ekemár Uunt Yus íimmianum kuṉkuinian áestitiawai. Núnaka ukunmasha atumí tiraṉki̱sha tuke túrin ártatui.

⁹ Kuṉkuin áestai̱nmaṉka náṉkamas kuṉkuinkia tura takamtsuk áestai̱sha núnisaṉ ántar surusármasha áesturashtiniaitrume. Núnisaṉ umutai̱ ainia nusha ukatrashtiniaitrume.

¹⁰ Arauncha ashí uwitin chikichkí wayá̱ tunáa tsaṉkurnartinian numpan kuṉkuin aestai̱ kachuri̱n ukattiatui. Ashí uwitin chikichkí yajauch túratin tsaṉkurnartinian taṉku maamu numpe̱n nu kachunam ukattiatna núnaka ukunam pujuartatna nusha tuke túrin ártatui. Nu túramuja̱i̱ Uunt Yusai̱ ti shiir imiatkímprachu átatui” tímiayi Yus.

Yajauch túramunam akikmakma

¹¹ Uunt Yus Muisaisan chicharuk

¹² “Israer shuar urutmakit tusa nekapmantrattana nuiṉkia aṉkant aṉkant Yus suir enentáimmian atsaṉkar aṉkant ajasarat tusar Uunt Yusan akikiártatui. Tura nekapmantrarainia nuiṉkia jatai̱ suṉkurka iniarchattawai.

¹³ Tura nekapmarmatirmeka Yus Shiir Awajtai̱ Je̱e̱n kuit súarmena nuja̱i̱ métek susattarme. Chikichik kuítiak painti kuit jeaiti. Nuyá̱ jímiapetek akantúkma nú kuit Uunt Yus susattarme.

¹⁴ Painti uwí takaku nuyá̱ nuna iniaṉkas takakainia nekapmarma ainia nusha Uunt Yusan kuítian súsatniuiti.

¹⁵ Yus suir enentáimmian atsaṉkratin aṉkant ajasat tusa Uunt Yus súsatin akantúkma núnaka kuítrinniusha iwiaak súsashti. Núnisaṉ kuítrinchasha nuna nuṉkach súsashti.

¹⁶ Israer shuar Yus suir enentáimmian atsaṉkratin aṉkant ajasat tusar kuit susamua nú kuitji̱a̱i̱ṉkia Yus Shiir Awajtai̱ Je̱a̱ wainniakti. Tura Uunt Yus suir enentáimmian atsaṉkratin aṉkant ajasat Israer shuar akikmakman tuke enentáimtittiawai” tímiayi.

Yaṉkú jiruja̱i̱ nijiamatai̱ najanamu

¹⁷ Uunt Yus Muisaisan chicharuk

¹⁸ “Nijiamatai̱sha yaṉkú jiruja̱i̱ núnismek apujtairi̱sha nú jiruja̱i̱ṉ najanata. Nu najanam Yus Shiir Awajtai̱ Je̱a̱ nui̱ tura Yus áestutai̱ pujana nui̱ ajapén apujsata. Túram nui̱ entsa yarakam áimkiata.

¹⁹ Tura Araun ni uchirí̱ji̱a̱i̱ nui̱ ikijmiárartatui tura nawe̱ncha nijiarartatui.

²⁰ Áintsaṉ Yus Shiir Awajtai̱ Je̱a̱n wainiak jáka̱i̱j tusar nijiamarartatui. Núnisaṉ Uunt Yusan aestua suíniak tura Niin takarsatai tusar Yus áestutai̱niam weanainiak

²¹ jáka̱i̱j tusar ikijmiárar tura nawe̱ncha nijiamartatui. Núnaka nisha tura ukunam ni wea ártatna nu ju̱ akupkámu tuke umiktinian takusartatui” Yus tímiayi.

^22-38 Nuya̱ṉka Uunt Yus asuiti Yusna akantúkma awajsamu ukattai̱ itiur najanatniuit nunasha mash Muisaisan jintintrámiayi. Tura nuja̱i̱ Yus Shiir Awajtai̱ Je̱a̱sha núnisaṉ nu je̱a̱nam wariṉkish Yúsnan pujurin takatai̱ iruniartatna nunasha ukatkartin ármiayi. Núnisaṉ Araunnasha ni uchirí̱ji̱a̱i̱ Yusna árat tusar ukatkar íktusma ármiayi. Tura ju̱ asuitikia Yusna akantúkar imiatkincha awajsamu asa ukunmasha tuke átiniaiti Uunt Yus Muisaisan jintintrámiayi. Nuya̱sha kuṉkuin chíkich kuṉkuinji̱a̱i̱ pachimpra Yus áestutai̱ najanatniuncha Uunt Yus Muisaisan jintintrámiayi. Tura nu kuṉkuin pachimpramu núnisaṉ nu kuṉkuin Yus áestutai̱ncha náṉkamas aentska najanashtin ármiayi.