Jiin. 29 - Yus Papí: Shuarja̱i̱ Yus Yamaram Chicham Najanamu

Araun uchirtiuk Yusna ártí tusar íktusarma

^1-9 Waaka yamatskam chikichik tura jimiará murik achikta. Paṉ karin eṉketáchma jiá iniarámu chaṉkinium eṉkeata. Yus Shiir Awajtai̱ Je̱a̱ wá̱i̱ti̱a̱i̱ri̱n Araun nijiartatui. Araun pushí kunturtin takamtsuk entsatái̱ shíirmach kayaja̱i̱ uku̱jtiurma, aya netsepnum entsatái̱, akachumtairi̱sha Yus takarkur muuknum etseṉkrutai̱ etseṉkrumtikiata. Asuiti muuknum ukatkata. Ni uchirí̱sha pushí nuntuaru áentsrata. Araun uchirtiuk akachumtikiawarta. Tura Yúsnan pujurin ajas tuke iniaṉnatsuk pujusártatui.

^10-14 Yus Shiir Awajtai̱ Je̱a̱ wá̱i̱ti̱a̱i̱ri̱n waaka itiamu Araun uchirtiuk waaka muuke̱n uwejé̱n awantsamtai waaka maatá. Áestutai̱ kachurí̱ya nui̱ numpa ukatkata túram numpa tiárainia nuka áestutai̱ nawe̱ya nui̱ ukatkata. Ampuje̱n macha ana nusha, akapé̱sha, méri̱sha patakam áesata tura waaka namaṉke̱ṉka nuáptuk matsamkamunam arant jukim áesata. Kame yajauch túramunam áestuatniua nuiti.

^15-18 Araun uchirtiuk murikiu muuke̱n uwejé̱n awantsamtai murik maatá. Áestutai̱ ana nuna yantamén numpa ukatkata. Murikiu namaṉke̱ tsupirta, ampuje̱ nijiarta túram nawe̱sha muuke̱ja̱i̱ irurta túram patakam ashí áesata. Kame takamtsuk áestuatniua nuiti. Nuna kuṉkuntin Uunt Yus ti shiir nekapraiti.

^19-21 Núnismek chíkich muriksha maatá. Untsuur kuishi̱ni̱ untsuur uwejé̱ni̱ tura Araunna uchirí̱ji̱a̱i̱ uunt nawé̱ untsuurí̱ni̱ numpa ikiusta. Áestutai̱ya nuna yantamén numpa ukatkata. Áestutai̱ya nui̱ numpa tura kuṉkuin asuiti ana nu achikiam Araun uchirtiuk tura pushirtiuk ukatkata.

^22-28 Yusan shiir awajuk áestuatin ainia nuna takuir nu murik pe̱a̱tkatin susamuiti. Murik maamua nuna machari̱ tura untsuur makui̱ya̱ nui̱m achikta. Paṉsha tura iniarkámusha chaṉkinium achikta. Araun uchirí̱ji̱a̱i̱ ashí susata túram Yus susamun pe̱a̱ktatui. Nuyá̱ áestutai̱niam patak ashí áesattui. Murikiu netsepe̱ jusata ame yúatin. Núnismek chíkich netsepe makuiji̱a̱i̱ jusata Araun uchirí̱ji̱a̱i̱ yuáwarat. Yus susamu áiniana nuya̱ṉ Araunka ni uchirí̱ji̱a̱i̱ tuke yúawartin áiniawai.

^29-30 Araun Yúsnan takaruk entsauya núnaka ni uchirí̱ tura nuyá̱ uchirí̱sha Yus Shiir Awajtai̱ Je̱á̱ wénakka nunak entsartin áiniawai. Tura siati tsawant nunak tuke entsartin ártatui.

^31-34 Murikiu namaṉke̱ Araun uchirí̱ji̱a̱i̱ paṉja̱i̱ yuáwarat tusar Yus susamu aṉkant áestai̱niam iniaráta. Chíkichkia núnaka yucha ármiayi. Namaṉkesha páṉkesha tiárainia nuka áesata, warí Yus susamuiti.

^35-37 Muisaisá, Araun tura ni uchirí̱ji̱a̱i̱ siati tsawant imiatkímprachu awajsarta. Waaka tuke tsawant maam áesata. Yajauch túramun tsaṉkurturat tusam túrata. Imiatkímprachu ajasat tusa Yus áestutai̱nmasha asuiti ukatkata.

^38-41 Tuke tsawant murik chikichík uwí takaku jímiar murik aestiá. Káshik chikichík nuyá̱ chíkichkia kashi tura ishichik trikiu nekeṉmaja̱i̱ uriwiu asuitiri̱ nuyá̱ wíniuja̱i̱ aestiá. Nuna kuṉkuntin Uunt Yus ti shiir nekapraiti” Uunt Yus tímiayi.

⁴² Uunt Yus chichaak “Ju̱ takamtsuk áestuatniuka atum shuar matsamártatna nuiṉkia Wi ámiji̱a̱i̱ wainniaikiamaj nui̱ Yus Shiir Awajtai̱ Je̱a̱ wá̱i̱ti̱a̱i̱ri̱n Uunt Yus íimmianum iniaṉnatsuk tuke túritniuitrume.

⁴³ Nui̱ṉ Israer shuarja̱i̱sha wainniaikiartatjai. Tura nuka Winia wincharja̱i̱ imiatkímprachma awajsamu átatui.

⁴⁴ Yus Shiir Awajtai̱ Je̱a̱ncha tura áestutai̱ncha imiatkímprachma awajsartatjai. Núnisnak Yúsnan pujurin árat tusan Araunnasha uchirí̱ji̱a̱i̱ imiatkincha awajsartatjai.

⁴⁵ Wikia Israer shuar matsatainiamunam ajapén pujustatjai túrakun ni Yusri̱ átatjai.

⁴⁶ Túrunamtai nui̱ nekarawartatui Wikia Uunt Yus ni Yusri̱ Ejiptunam matsatainian ni pujuiniamunam ajapén pujursartaj tusan ji̱i̱rarmiajna nuka Witjiai Uunt Yus ni Yusri̱” tímiayi.