Jiin. 27 - Yus Papí: Shuarja̱i̱ Yus Yamaram Chicham Najanamu

Yus áestutai̱ yaṉkú jiruja̱i̱ najanatin

¹ Yus áestutai̱ akasia numija̱i̱ nájankum esantí̱sha tura waṉkantí̱sha seṉku kuntu nuyá̱ yakiri̱ṉkia menaintiú kuntu jeá nekapmam najanata.

² Tura kuatru yantamén nú áchitrak kachuriarta. Nú túram yaṉkú jiruja̱i̱ eṉkekta.

³ Núnisaṉ áestutai̱niam takastincha yuṉkunim eṉkear ajaptai̱ ichiṉnasha shikitiáiri̱sha numpa jusar tsakirmamtiktai̱ piniṉsha namaṉ jutai̱sha núnisaṉ kaí̱ri̱ jutai̱sha aya yaṉkú jiruja̱i̱ṉ najankata.

⁴ Nuyá̱ ashí yantamén yaṉkú jiruja̱i̱ neka ánin najanam eṉkekta. Tura kuatru yantamén wearkatniuri̱sha tenté najatkata.

⁵ Kame neka ánin najanamua nuka namaṉ áestutai̱ ajapéri̱n eṉkekta.

⁶ Yus áestutai̱ wearkar yanakí̱ jutairi̱sha akasia numi najatkam yaṉkú jiruja̱i̱ eṉkekta.

⁷ Kame júakrikia mái̱ yantamen wearkatniuri̱ tenté iwiartukma nui̱ jímiar numi wearkar yanakir júkitniuiti.

⁸ Naint wajas iniakturmasma nuja̱i̱ métek Yusna áestutai̱ṉkia numi nakarmája̱i̱ wa̱a̱k najanata.

^9-15 Yus tau asamtai Je̱a̱ a̱a̱ri̱ esantí̱ṉkia sian kuntu átatui tura a̱a̱ri̱ waṉkantí̱ṉkia seṉkuintia kuntu najanata tura waatka átatui. Riniu tarach najanata túram páunam nenarta túram kuít jiruja̱i̱ seṉku kuntu aṉkant aṉkant ártatui.

^16-18 Wá̱i̱ti̱a̱i̱ri̱ á̱a̱ri̱ṉkia wiṉkia tí peṉker tarach yamákái, kapantin nuyá̱ riniu atantérmanum kuatru páunam nenaamu átatui.

¹⁹ Yus Shiir Awajtai̱ Je̱e̱n ashí takakmatai̱ ainia nuka á̱a̱ri̱n ajintrurma ainia nuka yaṉkú jiruja̱i̱ najankamu ártatui.

Ekemátai̱ asuiti

²⁰ Tura ekemátai̱ṉkia tuke kee pujut tusam uriwiu asuitiri̱ peṉké pachimprachma saaran itiarat tusam Israer shuar akupkarta.

²¹ Túrawarmatai Yus Shiir Awajtai̱ Je̱e̱n Yus Aentsja̱i̱ Chícham Najanamu Eṉketai̱ pujamunam naka tarach ejamunam á̱a̱nini̱ Uunt Yus íimmianum jú̱ ki̱arai̱ṉ juarki̱ keá keakua tsawai̱t tusar Araun ni uchirí̱ji̱a̱i̱ nui̱ apujsartatui. Kame jú̱ akupkámuka iniaṉnatsuk umiktin asamtai Israera uchirí̱ṉkia yamaisha tura ukunmasha tuke túrin ártiniaiti” Uunt Yus tímiayi.