Jiin. 25 - Yus Papí: Shuarja̱i̱ Yus Yamaram Chicham Najanamu

Yus Shiir Awajtai̱ Je̱a̱ je̱a̱mkur súsatin

¹ Uunt Yus Muisaisan chicharuk

² “Israer shuar chicharainiakum ‘Winia surusartinia nuna ikiankarti tawai’ tiartá. Tura ashí aents nekas enentái̱ji̱a̱i̱ súruinia nu achikta.

³ Tura ni súruiniakui achiktatmena nuka ju̱ áiniawai, kuri, kuit, yaṉkú jiru,

⁴ kiṉkia tarach, yamákái tarach, kapantin tarach, riniu tarach, chipiu uré̱,

⁵ murikiú nuapé̱ kapanniuja̱i̱ eṉkerma, péṉker nuapsha, akasia numisha,

⁶ tura ekemátai̱ asuitisha, uunt anaiyakur ukattai̱sha, ekemátai̱ kuṉkuincha,

⁷ tura únise kaya nuyá̱ kaya shíirmach Yúsnan pujurin aya netsepnum petai̱ awaṉkéman ashí nuna surusarti.

⁸ Nuyá̱ Wi shiir pujutai̱n je̱a̱rtiarti. Túrawarmatai nui̱ Wi niin pujursartatjai.

⁹ Tura Wi jintintiáttajmena nuka ímiatrusmek Yus Shiir Awajtai̱ Je̱a̱sha je̱a̱mta. Núnismek init iruniartatna nusha ímiatrusmek iwiarkata.

Yus Aentsja̱i̱ Chícham Najanamu Eṉketai̱

¹⁰ Tura Eṉketai̱ akasia numiji̱a̱i̱ nájankum esantíṉkia jimiará kuntu nuyá̱ ajapén jea tura waṉkantí̱ṉkia chikichik kuntu ajapén jea nuyá̱ yakiri̱sha chikichik kuntu ajapén nekapmam najanata.

¹¹ Túram initiani̱sha pátatkesha kúrik awajsam yantaméncha aya kúriji̱a̱i̱ṉ kurimpramu awajsata.

¹² Tura wearkatniuri̱sha kuatru aya kúrik najatata túram mai̱ yantamén jímiar jímiar neturta.

¹³ Nuyá̱ wearka júkitniuri̱sha akasia numik najatkam kuriji̱a̱i̱ ukatkata.

¹⁴ Nui̱ yanakí̱ junaktin asamtai wearkatniuri̱ iwiartukma nui̱ wearkarta.

¹⁵ Túramka jurutsuk nui̱ṉ iniaisata.

¹⁶ Akupkámu Umiktin Chichaman Wi áarman amastatjana nú Eṉketainiam eṉkesta.

Tunaan Akikmatrukmatai Tsaṉkurnatai̱ najanatin jintinma

¹⁷ Núnismek etektutai̱ri̱sha Tunaan Akikmatrukmatai Tsaṉkurnatai̱ aya kúrik najatam nuyá̱ esantí̱ṉkia jimiará kuntu nuyá̱ kuntu ajapén nekapmam tura waṉkantí̱ṉkia chikichkí kuntu nuyá̱ íniaṉkasmek ajapén najatata.

¹⁸ Nu túram aya kúriji̱a̱i̱ṉ Tsaṉkurnatai̱niam áchitkiak mái̱ yantamen Yusa suntari̱ kirupín martiyuja̱i̱ nekearam jímiar najanata.

¹⁹ Núnisaṉ Tsaṉkurnatai̱niam takamtsuk áchitkia kirupín najanata.

²⁰ Nuyá̱ kirupín yapa̱a̱r Tsaṉkurnatai̱n mash nukukártatui. Tura Tsaṉkurnatai̱niam iṉkiunaisar pujusár etektutain naka iiniai pujuinia najanata.

²¹ Túram Akupkámu Umiktin Chichaman áarman Wi amastatjana nu Yus Aentsja̱i̱ Chícham Najanamu Eṉketáiniam eṉkeam Tsaṉkurnatai̱ji̱a̱i̱ etektukta.

²² Nui̱ ámiji̱a̱i̱ṉkia wainniaikiattaji. Tura Yus Aentsja̱i̱ Chícham Najanamu Eṉketáiniam pátatek jimiará kirupín pujuiniana nui̱ ajapén Tsaṉkurnatai̱niam yakini̱ pujusam ámiji̱a̱i̱ṉkia chichastatjai. Tura Israer shuar warinia túrawartiniait núnaka nui̱ ashí jintintiáttajme.

Yus Iiji̱a̱i̱ Pujawai tama Paṉ awa̱tai̱ najanatin

²³ Núnismek paṉ awa̱tai̱sha akasia numiji̱a̱i̱ najankum esantí̱ṉkia jimiará kuntu nuyá̱ waṉkantí̱ṉkia chikichik kuntu núnisaṉ yakiri̱sha chikichik kuntu íniaṉkasmek najanata.

²⁴ Túram aya kúrik awajsata nuyá̱ yantamenka kuriji̱a̱i̱ aremkam maju̱kta.

²⁵ Núnismek yantamén uwejmi waṉkantí̱ji̱a̱i̱ métek iwiatukta. Túram iwiatukma yantamenka aya kúriji̱a̱i̱ṉ péṉker aremkata.

²⁶ Tura mai̱ yantamén kuatru tenté aya kúriji̱a̱i̱ṉ najankamu neturta.

²⁷ Núnismek wearká júkitniuri̱ yantamén iwiatukma ainia nui̱ wakenmaani̱ ikiursarta.

²⁸ Nuyá̱ weaká yanakí̱ júkitniuri̱sha akasia numik najatkata túram kuriji̱a̱i̱ yakarta.

²⁹ Ántsamek piniṉsha ichiṉnasha amamkusha shikikiá ukatai̱sha aya kúriji̱a̱i̱ṉ najankarta.

³⁰ Tura Wi nui̱ pujá asamtai nu paṉ najanattamna nuka nui̱ tuke awa̱ntritia.

Ekemákar ekentai̱ nájanma

³¹ Tura ajintrutai̱ji̱a̱i̱ nekeara takasam aya kúriji̱a̱i̱ṉ ekemákar ekentai̱ najanata. Nájankum pújakmari̱sha tura wájakmari̱sha núnisaṉ piniṉkrí̱sha tura turuj ekenkamunam kuku̱j nakumpram íkiatsuk takamtsuk najanata.

³² Núnismek tseṉkearmari̱sha mai̱ yantamén menaintiú tseṉkearu awantám máshikia sais najanata.

³³ Tura turuj ekentramunam armintru kuku̱jⁱ nakumkam ju̱ní̱ yantamén menaint najanata. Tura chíkich yantaméntkia menaint tura máshikia sais nájankum tímiatrusmek takamtsuk najankata.

³⁴ Núnisaṉ wájakmari̱nkia kuatru turujnum armintru kuku̱jⁱ nakumpram najatkarta.

³⁵ Emka tseṉkearma juarna nui̱ wakenmaani̱ turuj eketkam najanata tura atak tseṉkearma juármanum wakenmaani̱ṉkia turuj eketkata. Nuyá̱ menaint tseṉkearmanumka nui̱sha turuj eketka najanata. Nuní̱ túram sais tseṉkearmanum turuj nútiksar najanamu átatui.

³⁶ Tseṉkeakmari̱nkia tura turuj eketrámusha wájakmari̱n íkiatsuk takamtsuk aya kúrik martiyuja̱i̱ nekeṉkar najanamu átatui.

³⁷ Áintsamek nui̱ uwaar ekemárar tseṉkearmari̱n ekentratin siati najankata. Túram kéenak ashí tsáapin awajiártatui.

³⁸ Núnisaṉ tsaurtairi̱sha nuyá̱ tsaurar eṉketáiri̱sha aya kúrik ártiniaiti.

³⁹ Nu ashí najankattam nusha aya kúrik kijintri̱ṉkia chikichik tarentu jeaja̱i̱ najankattame.

⁴⁰ Nainnium jintintramajmena nuja̱i̱ métek najankata.