Jiin. 16 - Yus Papí: Shuarja̱i̱ Yus Yamaram Chicham Najanamu

Uunt Yus Israeran maná yurumkan súsarma

¹ Nuyá̱ ashí Israer shuar Irim nuṉkanmaya̱ jíinkiar kampuntin atsunum Sen nuṉkanam jeawarmiayi. Nusha Irimji̱a̱i̱ tura Senái naint ajapén étenkamunmaiti. Tura Ejiptunmaya̱ Israer shuar jíinkiarmia nuya̱ṉka chikichkí nantu kinse tsawant naṉkaamasmanum jeawarmiayi.

² Tura ashí Israer shuarsha kampuntin atsú nuṉkanam pujusár Muisaisan tura Araunnasha yajauch chichariarmiayi.

³ Tura jú̱nis chicharainiak “Iincha Ejiptunmaṉ pujumiajⁱ nui̱ṉ Uunt Yus mantamaitkiurni̱ṉkia maak. Warí nui̱ṉkia yurumkasha namaṉsha tí nukap yurumár ejemarar nútsumiaji. ¿Antsu imiá nukapettajnia jú̱tin atsamunam tsukái kaji̱nkiarat tusarmechuk jukartukniuitrum?” tiármiayi.

⁴ Nuyá̱ Uunt Yus Muisaisan chicharuk “Yurumkan nayaimpinmaya̱n akuptúktatjarme. Nu yurumkan Israer shuar tuke tsawant a̱a̱ jíinkiar aya chikichik tsawantin yúatniunak juurmakarti. Nuní̱ túran Wi akupkámun uminiawash tura uminiatsuash nuna paant nekaattajai.

⁵ Túrasha sais tsawantiṉkia jimiará tsawant yúatin jean júurmakar ikiurmástinian iwiartumprarti” tímiayi.

⁶ Tura Muisais Araunja̱i̱ Israer shuaran ujainiak “Jú̱ ki̱arai̱ṉkia nekas Uunt Yus atumín Ejiptunmaya̱ ji̱i̱rmakiarmia nu nekaattarme.

⁷ Nuyá̱ kashin káshik Yusa peṉkeri̱ wainkiattarme. Tura Uunt Yus átum yajauch áujmattsamarmena nuna anturtamkaruiti. Warí ¿ii yáitiajⁱ ántrarum yajauch áujmatkartiartincha?”

⁸ Tura Muisais nu arant chicharainiak “Urum kí̱arai̱ṉkia namaṉke̱n suramsattarme tura káshikkia yurumak nútsurminian suramsattarme. Átum Uunt Yus yajauch chicharmiarmena nuna anturtamka asa túrattawai. ¿Warí iisha yáitiajⁱ? Átumka iiṉkia yajauchikia áujmatkartukchaitrume antsu Uunt Yus yajauch áujmatsaitrume” tú tiarmiayi Muisais.

⁹ Nuya̱ṉka Muisais ni yachi̱n Araunan chicharuk “Israer shuar chicharainiakum ‘Uunt Yusai̱ ashí kaunkarum weankátarum. Warí átum tímiarmena nuna Uunt Yus antukai tiartá’ tímiayi.”

¹⁰ Tura Arauncha ashí Israer shuaran chicharu wajái̱ kampuntin atsunumaani̱ íimsataj tukamá Yusa winchari̱ yuraṉminiam wantiniun wáinkiarmiayi.

¹¹ Nuya̱ṉka Uunt Yus Muisaisan chicharuk

¹² “Wisha Israer shuar yajauch áujmatruinian antukjai. Tuma asamtai Muisaisá Israer shuar chicharainiakum ‘Urum kí̱arai̱ namaṉ yuáttarme tura kashinkia yurumak yuárum nútsurtatrume. Tura nui̱ṉkia Wi atumí Yusri̱ntjiana nu nekarattarme Uunt Yus túramprume’ tiartá” tímiayi Muisaisan.

¹³ Nuya̱ṉka kí̱ana nui̱ waawaya ánin tí nukap káunkar matsamkamunam piákarmiayi. Tura kashin káshik matsamkamu yantamén sana téntak ukatkamiayi.

¹⁴ Tura sana kampuntin atsú nuṉkan ukatak ju̱juak tenté puju namaka saepe̱ya núnin juákarmiayi.

¹⁵ Tura Israer shuar nuna wáinkiar nékachu ásar nuamtak chichainiak “¿ju̱sha wariṉkít?” tuíniakui Muisais Israer shuaran chicharainiak “Uunt Yus ii yúatniun yurumkan amaajnia nuiti.

¹⁶ Ju̱i̱ti Uunt Yus yurumkan akuptúrmajnia nu. Tuma asamtai átum yúatin atsumarmena nuja̱i̱ métek juuktarum. Túrasha chikichík shuarak atumí je̱e̱n urutmá nukapea pujarum nuja̱i̱ métek aṉkant aṉkant chikichík kumir jeá juurmaktarum” tímiayi.

¹⁷ Túrawar Israer shuarsha chíkichkia núkap tura chíkichkia ishichik juurmakarmiayi.

¹⁸ Kumirja̱i̱ nekapma iismasha núkap júukarmia nusha peṉké tiarcharmiayi tura ishichik júukarmia nusha peṉké táatsacharmiayi. Aṉkant aṉkant ní yúatniun atsumiarmia nuja̱i̱ métek juukarmiayi.

¹⁹ Túrawarmatai Muisais chicharainiak “Kashin yuamí tusarun ampirmásairap” tiármiayi.

²⁰ Túrasha Muisaisnaka umirtsuk chíkichkia kashin yuamí tusa ikiurmásarmiayi túram akarak meje̱niarmiayi. Nuna túrawarmatai Muisais ti kajerkarmiayi.

²¹ Tura ni yúatniuja̱i̱ métek tuke káshik jintiukiar aṉkant aṉkant juurmarmiayi. Antsu etsa̱ jíinmiatai̱ṉkia miniakar mash meṉkainiarmiayi.

²² Tura sais tsawantiṉkia juwarmiania núnaka íniaṉkasaram jimiará kumir aṉkant aṉkant júukarmiayi. Túrawar Israer shuara uuntri̱ armia nu Muisaisan ujakármiayi.

²³ Tutai nisha chichaak “Kashinkia ayampratin tsawant asa Uunt Yus ti shiir awajsatin tsawant akantúkmaiti. Tuma asamtai yamaik iniarkatniua nuka iniarkatarum antsu tiárainia nuka kashin yúatin ikiustarum Uunt Yus tawai” tímiayi.

²⁴ Muisais timia nuja̱i̱ métek umikiar kashin yuamí tusa ikiusármia nuka akarkacharmiayi núnisaṉ meje̱charmiayi.

²⁵ Tura Muisais chicharainiak “Yamaikia juukma yuátarum. Ju̱ka Uunt Yus shiir awajkur ayamtai̱ tsawantaiti. Tuma asamtai ju̱ tsawantinkia manasha a̱a̱ atsuttawai.

²⁶ Aya sais tsawantchik júuktatrume túrasha siati tsawantka ayamtai̱ tsawantaiti. Kame nu tsawantinkia nuna júuktin atsuttawai” tímiayi.

²⁷ Túrasha núnaka nékainiayataṉ chíkichkia ayampratin tsawantin juuktai tusar jiintiukiarsha peṉké wáinkiacharmiayi.

²⁸ Nuya̱ṉka Uunt Yus Muisaisan chicharuk “Wi akupkámu umiktin chicham tura jintíamursha ¿urutáiṉ umirtuktarum?

²⁹ Wi Uunt Yus asan chikichkí tsawant ayampratniun súsaitjiarmena nu nekaatarum. Tuma asamtai sais tsawantin yurumkan jimiará tsawant jean amaajrume. Tuma asamtai tsawant siatia nu aṉkant aṉkant atumí pujutái̱ri̱ni̱ṉ jíintsuk pujustarum” tímiayi.

³⁰ Nu tutai tsawant siatia nu tsawantinkia Israer shuarsha ayamprarmiayi.

³¹ Kame Israer shuarka nu yurumkanka “maná” anaikiarmiayi. Nu yurumkasha kurantru jiṉkiaiya núnin pújuyayi. Túrasha míshkiji̱a̱i̱ pachimpramua núnin yuu ajamniauyayi.

³² Tura Muisais chichaak “Uunt Yus akupkámu ju̱i̱ti. Wi Ejiptunmaya̱ atumín Israer shuartirmin ji̱i̱ran kampuntin atsunum matsasan maná yurumkan ayuramiajrumna nuna atumí tiraṉki̱ ártatna nu ukunam iisar nekaawarmi tusarum chikichkí kumir áimkiarum ikiustarum tawai” tímiayi.

³³ Núnisaṉ Muisais Araunnasha chicharuk “Maná chikichkí kumir nekapmam ichiṉnanam eṉkeam áimkiata. Túram Uunt Yusai̱ naka apujsata. Nuna iisar atumí tiraṉki̱ nekaawarmi” tímiayi.

³⁴ Tura Arauncha Uunt Yus Muisaisan timia nuja̱i̱ métek Yus Aentsja̱i̱ Chícham Najanamu Eṉketai̱ pujumia nui̱ ayamach atí tusa apujsamiayi.

³⁵ Tura Israer shuarsha Kanaan nuṉka náṉkatkamunam jeamam kuaraintia uwí maná yurumkan yurumáwarmiayi.

³⁶ Chikichik kumir nekapmamka jimiará ritru náṉkamasaṉ jeawai.