Jiin. 14 - Yus Papí: Shuarja̱i̱ Yus Yamaram Chicham Najanamu

Kapantin Nayants katitkiarma

¹ Uunt Yus Muisaisan chicharuk

² “Israer shuar waketkiar Miktur tura nayants ámanum núnisaṉ Paarsepúnka naka iirka ámanum Piajirútnum ápatnik nayants yantam matsamkarti tiartá.

³ Túrunawarmatai Parauṉka nuna wainiak ní enentáimsaṉ auka Israer shuarka kampuntin atsunum nui̱ naṉkaamaktinian tujintkiar waak yujainiawai. Tu enentáimprattawai.

⁴ Tura pataatukarat tusan Wi Parauṉka enentái̱n ikiatsuátrattajai túran Parauṉkan suntari̱ntiuk winia kakarmarun iniaktustatjai. Nuna nekaawar Ejiptunmaya̱ aents Wi Úunt Yusaitjiana nuna nekaawartatui” takui̱ ni timia núnis túrawarmiayi.

⁵ Tura Ejiptunmaya̱ úunt akupin Israer shuarka pisainiawai táman antukmiayi. Tura úunt akupin Parauṉ tura ni iniamniuri̱ armia nusha nuna nekaawar aentsri̱n kajerkar chicharainiak “Takatan ajapa iin ikiurtámkiaratⁱ tusarsha ¿urukamtaik Israer shuar ii iniatairi̱ armia nu wéarti tiármajⁱ?” tunaiyarmiayi.

⁶ Nuiṉkia Parauṉ ti wárichik mesetnum mánaitiai̱ káruri̱n iwiarak ni suntari̱n yaruak wémiayi.

⁷ Nuyá̱ mesetnum mánaitiai̱ saisiantu karu aya péṉkerak juurma armia nuna tura Ejiptunam ashí karu irunmia nunasha júkiarmiayi. Nui̱sha aṉkant aṉkant suntara uuntri̱ eṉketra eem wéarmiayi.

⁸ Ejiptunmaya̱ akupin Parauṉka Uunt Yus ántichu awajsamu asa Israer shuaran pataatukarmiayi. Túrasha Israer shuarka sapijmiatsuk waraki̱ wéarmiayi.

⁹ Ejiptunmaya̱ aents ní suntari̱ji̱a̱i̱ tura Parauṉka káruri̱sha núnisaṉ kawainiumsha eketra pataatukarmiayi. Túrawar Piajirút ayamach Paarsepún íṉkiuasmak nayants yantam Israer shuarka matsamkattsa ajainian amayá̱ṉkarmiayi.

¹⁰ Tura Parauṉ tíjiu̱ch ajasún Israer shuar úkumur íimiaj tukamá Ejiptunmaya̱ aents pataatuiniamun wáinkiar ti sapijmiakar Uunt Yusan seawarmiayi.

¹¹ Nuya̱sha Muisaisan Israer shuar chicharainiak “Kame Ejiptunmaṉka wa̱a̱ iwiarnasmin atsuinia asamtaik ju̱i̱ kampuntin atsunum kaji̱nkiarat ¿tusamek jukartukmiam. Warí urukamtai Ejiptunmaya̱sha jukartukmisha jú̱tikiartam?

¹² Ejiptunam matsamsar ái̱chuk chichaakur tímiajⁱ ‘Israer shuartikia Ejiptu aentsu iniatairi̱ matsatkurnisha iinkia pachikrattsaip.’ Warí kampuntin atsunum pujusár jákatniuja̱i̱ṉkia naṉkaamas íiji̱a̱i̱ṉkia Ejiptunmaya̱ aentsu iniatairi̱ átinkia péṉkeraiti tíchamkajⁱ” tiármiayi.

¹³ Tura nuna tuíniakui Muisais Israer shuaran chicharainiak “Sapijmiakairap antsu kakaram ajastarum. Uunt Yus iin waitnentramar uwemtikrampratajnia nu yamái wainkiattarme. Tura Ejiptu aents yamái wáintrumna nuka atakka peṉké wáinkiashtatrume.

¹⁴ Yamái Uunt Yus atumín ayamprutmak mánaiktatui. Tura átumka mitia ajasrum pujustatrume” tímiayi.

¹⁵ Tura Uunt Yus Muisaisan chicharuk “¿Urukamtia Winiasha untsuram? Antsu áyatik Israer shuar éstarum tiartá.

¹⁶ Túram ámeka wái̱ram nayantsanmaani̱ iwiaiṉkiata. Túrawakmin nayants jímiapetek kanaktatui. Túrunamtai Israer shuarka nayants ju̱jú̱kmánum katia̱rarat” tímiayi.

¹⁷ Nuyá̱ Uunt Yus chichaak “Israer shuaran pataaturkutak utsanawarat tusan Ejiptunmaya̱ aentsu enentái̱nkia ikiajtiúkartatjai. Túran Parauṉnasha ni suntari̱ncha núnisaṉ káruri̱ncha nuyá̱ kawainium eketka ainia nunasha winia kakarmarun iniaktusartatjai.

¹⁸ Tura Parauṉnasha ni káruri̱ncha nuyá̱ kawainium eketka ainia nunasha winia kakarmarun iniaktusartatjana nuja̱i̱ Ejiptunmaya̱ aents Wi Úunt Yusaitjiana ju̱na nekarawartatui” tímiayi.

¹⁹ Nuya̱ṉka Yusa suntarí̱sha Israer shuar matsamkamunam eem wemia nuka uku juak pataatiarmiayi. Tura yuraṉmisha iruna eem wemia nusha núnisaṉ uku juákmiayi.

²⁰ Tura Parauṉka suntari̱ nuyá̱ Israer shuar matsamkamunam ajapén yuraṉmikia wajá Ejiptunmaya̱ aentsnaka tee awajtúsmiayi. Antsu Israer aentsnaka káshisha tsáapin awajtimiayi. Tuma asamtai Israer shuar Ejiptunmaya̱ aentsja̱i̱ nú kashikia peṉké weantúnaikcharmiayi.

²¹ Nuya̱ṉka Muisais uwejé̱n nayantsanmaani̱ takuimiayi. Nuna túramtai Uunt Yus nasen etsa̱ jintiainmaani̱ya̱n kakaram násentkat tusa akupkámiayi. Tura nu kashi takamtsuk násentak nayants jímiapetek kanak kukach ajasat tusa ti násenmamtikiamiayi.

²² Tura Uunt Yus nayantsan kukach ju̱ju̱ptin awajsam untsuurnumaani̱sha menanmaani̱sha peeṉkramua núnikmatai Israer shuar katiṉkiarmiayi.

²³ Núnisaṉ Ejiptunmaya̱sha tura Parauṉka ashí káruri̱ armia nusha kawainium eketkainiasha Israer shuaran úkuri̱ni̱ṉ pataatukiar nayantsanam utsanawarmiayi.

²⁴ Tura tsawa̱a̱na nui̱ yuramkim wea keek tsáapnin ajas amia tímianaiya̱ Uunt Yus Parauṉka suntari̱ urukainiawak tusa íismiayi. Tura Ejiptunmaya̱ suntaran imiamtikrarmiayi.

²⁵ Tura Parauṉka káruri̱sha mesenak nawe̱sha akaarar tepetar wáinkiarmatai mai̱ japi awajiármiayi. Túrunawar Ejiptunmaya̱ aents chichainiak “Yamaikia Israer shuar pujuinia ju̱yá̱ pisartai. Warí Uunt Yus Israer shuaran ayamprak iin ashí amutmaktatji” tiármiayi.

²⁶ Nuyá̱ Uunt Yus Muisaisan chicharuk “Ame uwejém nayantsanmaani̱ takuitia. Nu túrawakmin Ejiptunmaya̱ aentsun káruri̱ncha tura kawainium eketkainia nunasha nayants ukatak amuukarat” tímiayi.

²⁷ Nuya̱ṉka Muisais ni uwejé̱n nayantsanmaani̱ takuimtai tsawa̱a̱na nui̱ nayantsaka ataksha ímiatrusaṉ awamsamiayi. Tura Ejiptunmaya̱ aents pisainiak nayants apaaki̱ winian aya tukumprarmiayi. Túrawar ashí amukármiayi. Nuní̱ tura Ejiptunmaya̱ aentsun Uunt Yus nayantsanam amukármiayi.

²⁸ Tura nayants ataksha ímiatrusaṉ ajak Parauṉka suntari̱n kárurtiuk tura kawainium eketra Israer shuaran úkuri̱ni̱ṉ pataatukiar nayantsanam utsanawarmia núnaka mash amuk chikichkiṉkisha ujukachmiayi.

²⁹ Kame yámankamtaik Uunt Yus nayantsan kukach awajás ju̱ju̱ptin awajsámiayi. Tura untsuurnumaani̱ núnisaṉ menanmaani̱sha péṉkramua núnikmatai Israer shuar wekasar katia̱rarmiayi.

³⁰ Nu tsawantin Uunt Yus Ejiptumaya̱ aents, Israer shuaran pataatiarmia nuyá̱ uwemtikrarmiayi. Núnisaṉ Israer shuar Ejiptunmaya̱ aents jakekaru aya̱shi̱n nayantsa yantamén tepenan wáinkiarmiayi.

³¹ Tura Uunt Yus ni kakarmari̱ji̱a̱i̱ Ejiptunmaya̱ aentsun amukármia nuna Israer shuarka ti paant nekaawarmiayi. Nuna nekaawar Israer shuar Uunt Yusan ashamkarmiayi. Túrawar Uunt Yusan tura Yusa takarniúri̱ Muisaisnasha nekasaiti tu enentáimtusarmiayi.