Jiin. 13 - Yus Papí: Shuarja̱i̱ Yus Yamaram Chicham Najanamu

Iwia̱i̱ri̱ Uunt Yus súsatin

¹ Uunt Yus Muisaisan chicharuk

² “Israera uchirí̱ iwia̱i̱ri̱ áishmaṉ akiiniawaru ainia nuka núnisaṉ taṉku eem petsakma ainia nusha akantúrkatarum. Nuka winia áiniawai” tímiayi.

³ Ni írutkamuri̱n Muisais chicharuk “Enentáimpratarum Ejiptu nuṉkanam íniakur wáitkiatai pujuarmajnia nuyá̱ Uunt Yus ni kakarmari̱ji̱a̱i̱ juramsaji. Tuma asamtai karin eṉketámu paṉ yuáwairap.

⁴ Átumka ju̱ tsawantai̱ Awip nantutin jíintrume.

⁵ Tuma asamtai Kanaan, Jet, Amur, Jep núnisaṉ Jípius aentsu nuṉke̱n Uunt Yus atumí aparí̱n nekas amastiniaitjiarme timia nú nuṉkan atá̱i̱ ukunam apujtamsakrumni̱ṉkia tí peṉker nuṉka ashí arak tsapáu asamtai muntsu míshkiji̱a̱i̱ entsa núnis akamunmasha nuṉkanam apujsamu asarum ju̱ nantutini̱ṉ tuke nampermatniuitrume.

⁶ Siati tsawantin karin eṉketáchma paṉ yuu átatrume. Tura siatia nu tsawantka Uunt Yus wararkuram nampermatarum.

⁷ Kame nu siati tsawantin karin eṉketáchma paṉ yuu wétatrume. Nu tumiṉchik amiincha tura atumí ashí nuṉke̱ncha kari̱nkia peṉké atsutniuiti.

⁸ Ukunam atumí uchirí̱ ujaakrum ‘Ju̱ nampermamuka Ejiptunmaya̱ ii Yusri̱ ji̱i̱rmakin asakrin wararkur nampermaji’ títiniaitrume.

⁹ Warí Uunt Yus Ejiptunmaya̱ ni naṉkamantu kakarmari̱ji̱a̱i̱ ji̱i̱rmakchamkuram. Tuma asamtai atumí uwejé̱ncha tura nijia̱i̱ncha aarma áintsaṉ Yus akupkámu áujmateakrum tuke enentáimtin atarum.

¹⁰ Tsawant tesamua nui̱ṉ uwir uwir tuke nampermá pujutniuitrume.

¹¹ Uunt Yus atumíin tura atumí we̱a̱trí̱n Kanaan nuṉkan nekas súsartiniaitjiai timia nui̱ ejetamiakrumnisha

¹² atumí uchirí̱ ashí iwia̱i̱ri̱ áishmaṉkach núnisaṉ atumí taṉkuri̱ áishmaṉ emka petsakma ainia nusha akantúkrum Uunt Yus susatarum. Tura áishmaṉ ainia nuka Uunt Yusna ártatui.

¹³ Antsu umpuru emka petsakma nuka murikji̱a̱i̱ yapaji̱átarum. Nu túrachkurmeka umpuru uchirí̱ṉkia kuntuje̱ kupirkarum mátarum. Tura atumí uchirí̱ iwia̱i̱ri̱sha murikji̱a̱i̱ yapaji̱átarum.

¹⁴ Nuyá̱ kashin ame uchiram aninmak ‘¿urukamtai jútikiam?’ túramkuisha ‘Ii Yusri̱ Uunt Yus Ejiptunam iniatai̱ wait ajá pujarin ni kakarmari̱ji̱a̱i̱ aṉkant awajtámas ji̱i̱rmarmiaji.

¹⁵ Kame Parauṉ ántichu ajas nu nuṉkanmaya̱ akuptámkatniun nakitramakrin, Uunt Yus Ejiptu aentsu uchirí̱ iwia̱i̱ri̱n áishmaṉkan nuya̱sha ashí ni taṉkuri̱ eem petsakma áishmaṉnaka mash mantuawarmiayi. Tuma asamtai ashí taṉku uchirí̱ eem petsakma áishmaṉka nuka Yus áestuatnuitji. Núnisaṉ ii uchirí̱ iwia̱i̱ri̱ áishmaṉka uwemtikiur murik súaji’ tu titiarum.

¹⁶ Tuma asamtai Uunt Yus ni kakarmari̱ji̱a̱i̱ Ejiptu nuṉkanmaya̱ ji̱i̱rmarmiaj nuka peṉké kajinmatkichmin ame kunturmin tura ame nijia̱i̱mincha aarma takakua nútiksarum tuke enentáimtustiniaitrume” tímiayi Muisais.

Kapantin nayantsanmaani̱ wétin jintia achikma

¹⁷ Tura Parauṉ Israer shuaran akuprámia nui̱ṉkia Yuska Jiristíu nuṉke̱ni̱ wétinkia tíjiu̱ch ai̱ṉ nuni̱ṉkia yaruakcharmiayi. Kame mánaiktinian nakitiáiniak ataksha Ejiptunam waketkiara̱i̱ṉ tusa Uunt Yus túramiayi.

¹⁸ Antsu Yuska Israer shuaran naka júutsuk jintia téntakir wetai kampuntin atsunum Kapantin nayantsanmaani̱ yaruakarmiayi. Tura Israer shuarsha Ejiptunmaya̱ jíintrar mesetnum wénak iwiarnakarua tímiatrus ashinkiarmiayi.

Jusé ukunchí̱ Ejiptunmaya̱ jukimiu

¹⁹ Tura Muisaissha Jusée ukunchí̱n jukimiayi. Warí Jusé tíchamkia “Yus nekas ji̱i̱rmartatrumna núnaka nékajai. Nu tsawant jeamtai winia ukunchur jukitiarum. Túrachkurminkia Yus iirmastarum” tutai Israer shuarka “nekas jukittiaji” tiniu ásar júkiarmiayi.

Tsawai̱sha tura káshisha Israer shuaran Yus júkiarma

²⁰ Tura Sukut péprunmaya̱ jíinkiar kampuntin atsú nuṉka juarna nui̱ Etamnum matsamkarmiayi.

²¹ Israer shuar wénakui tsawai̱kia yuraṉkim wajaimiunam Uunt Yus eem we wémiayi. Tura káshikia ji keek wajái̱ tsáapin awajtúsam tsawai̱sha káshisha tuke wekasamnia ármiayi.

²² Tura tsawai̱kia Israer shuar wénamunam yuraṉkim tuke eem we wémiayi. Núnisaṉ káshikia ji kee wémiayi. Túmak ikiucharmiayi.