Jiin. 12 - Yus Papí: Shuarja̱i̱ Yus Yamaram Chicham Najanamu

Paskua namper

¹ Ejiptunam Muisais Araunja̱i̱ pujuinian Uunt Yus chicharainiak

² “Jú̱ nantuka nekapmat náṉkamma nantuiti. Atumíinkia ju̱ nantuja̱i̱ uwikia náṉkamui.

³ Ashí Israer shuar iruraram ujainiakum ju̱ nantu tias tsawantin chikichik apa urutmá pamparuit nuja̱i̱ jea aṉkant aṉkant atumí murikrí̱ apujtumsatarum tiartá.

⁴ Tura tí nukap pampaṉchaitkiuṉka murikiu namaṉke̱ amukchamnia asa ni shuari̱ ayamach pujuinia nuna ipiá chikichkiniak irunturar yuáwarti.

⁵ Tura muriksha chípiuksha peṉké tunamárcha áishmaṉ chikichík uwí achíaku enetratarum.

⁶ Tura jú̱ nantutini̱ṉ tsawant katurse jeat tusarum nákastarum. Túrarum nú tsawantinkia kí̱ana ai̱ aṉkant aṉkant Israer shuartiram murik sué̱nam tsupikrum máattarme.

⁷ Nuna numpé̱ achikrum yurumáttarmena nú je̱a̱ wáitiri̱ mái̱ pauri̱n tataṉkri̱ntiuk yakartarum.

⁸ Tura nu káshikia namaṉ weaka iniarámu nuyá̱ yapá nupa̱sha núnisaṉ karin eṉketáchma paṉ najanamu yuátarum.

⁹ Nu namaṉ yúakrumsha páiṉkiarmeka tura eneka yuáwairap. Tura muuke̱sha makui̱sha ampuje̱sha yúakrum aya weaka iniarámuk yuátarum.

¹⁰ Tura kashin yuamí tusarum ampirá ikiusairap. Ampiniármataiṉkia áesatarum.

¹¹ Tura atumí pushirí̱sha entsá entsasrum akachumarum ántsaṉ sapatcha awerarum tura wai̱sha ushukrusrum iwiarnasrum wárichik yurumátarum. Uunt Yusa namperi̱ Paskua tutainti.

¹² Tuma asamtai nu kashi Ejiptu nuṉkanam naṉkaamaktiatjai. Túran Ejiptunmaya̱ aentsu uchirí̱ iwia̱i̱ri̱n núnisaṉ yajasma ainia núnanuncha mantuawartatjai. Tura aents najanamu yusan Ejiptunmaya̱ aents tikishmátainia nunasha asutiuáwaran emesturartatjai. Wi Uunt Yus asan tajai.

¹³ Wáitiniam numpa yakarma átatna nuja̱i̱ atumniaka nekaattajrume. Nu numpa yakarman wainkianka nákak naṉkaamaktiatjai. Tura Wi Ejiptunmaya̱ aentsun máwartatjana nuiṉkia atumí uchirí̱nkia máchartatjai.

¹⁴ Ju̱ tsawantka tuke enentáimtutai̱ átatui. Atumí uchirí̱sha, tiraṉki̱sha nuyá̱ tiraṉki̱sha aarma ana nuna umiiniak Uunt Yus enentáimtutai̱ namperan tuke najatin ártatui.

¹⁵ Siati tsawant paṉ karin eṉketáchma yuáttarme. Yama juarma tsawantiya̱ṉ atumí je̱e̱nkia karin takusairap. Warí yama juarma tsawanta nuyá̱ juarki̱ siati tsawant jeamam paṉ karin eṉketámun yaaksha yúakka Israernumia̱ṉka ji̱i̱ki̱ aju̱i̱miu átatui.

¹⁶ Emka tsawantin iruntratin átatna áintsaṉ siati tsawantincha Winia enentáimtursatai tusarum iruntiattrume. Tura nú tsawantinkia takakmasairap. Antsu áyatik atumí yurumátniuri̱ iwiaratniunak tsaṉkateajrume.

¹⁷ Ashí uwitin atumsha paṉka karin eṉketáchma namperi̱ najantiatrumna nui̱ nu tsawantin Wi Ejiptu nuṉkanmaya̱n Israera suntari̱n ji̱i̱rarmajna nu enentáimtittiarme. Tuma asamtai atumí tiraṉki̱sha tuke túrin ártiniaiti.

¹⁸ Yama naṉkamma nantutin tsawant katursenam kí̱arai̱ juárkirum tsawant paintiúnutin aṉkuantainia ímianai karin eṉketáchma paṉ yuáttarme.

¹⁹ Kame nu siati tsawantin karin atumí je̱e̱n peṉké atsutniuiti. Tura nu nuṉkanam tuke pujuusha nuyá̱ yajaya̱ aentskesha karinji̱a̱i̱ najanamun yúakka Israer shuarnumia̱ṉka ji̱i̱kmia átatui.

²⁰ Tuma asamtai karinji̱a̱i̱ najanamuka peṉké yuáwairap. Tura tui̱ pujuttarum nui̱sha paṉ karin eṉketáchma najanamu yuátarum” tímiayi Uunt Yus.

²¹ Tura Muisaiska Israer shuara uuntri̱ armia nuna irurar chicharainiak “Atumí shuari̱ aṉkant aṉkant murikiu itiar máwar Paskua namperan najanawarti.

²² Nuna numpé̱ ichiṉnanam jusarum uruchia ániuja̱i̱ numpa ejamprarum waiti tataṉkri̱ntiuk yakartarum. Tura káshikia chikichkisha ni jé̱e̱ya̱ṉka tsawa̱a̱mam jíinkicharti.

²³ Warí Uunt Yus Ejiptu aentsun amukí̱ wéak waiti mái̱ pauri̱n tataṉkri̱ntiuk numpaja̱i̱ yakarman wainkiaṉka Uunt Yuska nákak naṉkaamak atumí je̱e̱ṉkia maṉkartinniaka awa̱intiurmashtatrume.

²⁴ Nekaatarum, ju̱ akupkámuka átum tura atumí uchirí̱sha tuke enentáimtin ártatui.

²⁵ Tura Uunt Yus nuṉkan nekas susattajrume turamiarmena nui̱ jearmesha ju̱ namperka tuke najantiatrume.

²⁶ Tura atumí uchirí̱ chichartamainiak ‘¿Warí urukamtai ju̱sha áitkiarum?’ turamainiakuisha

²⁷ aya̱krum ‘Ju̱ taṉku majnia ju̱sha peṉké ántrar jú̱tikiatsji. Antsu Uunt Yusna Paskua namperi̱nti. Ejiptunmaya̱ aentsun amukí̱ wéak Israer shuartinkia uwemtikrampramiaji. Nui̱ Israer shuar tsuntsumawar shiir awajsarmiayi’ titiarum” tímiayi.

²⁸ Uunt Yus Muisaisan Araunja̱i̱ Israer shuar jú̱nis túrawarti tiarmia núnaka ímiatrusaṉ umikiarmiayi.

Uchi iwia̱i̱ri̱ jákarma

²⁹ Kame jú̱nis túrunamiayi. Uunt Yus Ejiptunmaya̱ aentsu uchirí̱ iwia̱i̱ri̱n kashi ajapéantu ai̱ máwarmiayi. Parauṉka uchirí̱ iwia̱i̱ri̱ úunt akuptainiam pujumia nuyá̱ juárkin sepunam pujuarmia nuna uchirí̱ncha tura taṉku eem petsakma armia nunasha ashí mantuawarmiayi.

³⁰ Nu túrunamtai Parauṉsha tura ni takarin armia nusha ashí Ejiptunmaya̱ aentssha nú nuṉkanmaṉka uchi iwia̱i̱ri̱ chikichik je̱a̱nmaṉsha iwiaaku juakcha ásarmatai kashi nantarar charaatum ajainiak peṉké kuntuts uur ajarmiayi.

³¹ Nuyá̱ Parauṉ Muisaisan Araunja̱i̱ nu kashi untsukar táarmatai chicharainiak “Wí shuarai̱ya̱ṉka jíintratarum. Ashí Israer shuartirmeka wetarum. Túrarum tímiarmena nútiksarmek atumí Uunt Yusri̱ umirutarum.

³² Yamaikia tímiarmena nútiksarmek atumí waakari̱sha murikrí̱sha yaruakrum wetarum. Tura winiasha seatritiarum” Parauṉ tímiayi.

³³ Kame Ejiptunmaya̱ aentsti ashí jákartatji tusar Israer shuaran ni nuṉke̱ya̱n wárik ji̱i̱rtai tusar wáurtiarmiayi.

³⁴ Nuyá̱ Israer shuarsha paṉ najanatin nanekman karin eṉketáchman eṉketái̱niam eṉkeawar ni awaṉkémpri̱ji̱a̱i̱ nukukar yakainium awaṉkekar júkiarmiayi.

³⁵ Israer shuarsha Muisais timia tímiatrusaṉ Ejiptunmaya̱ aentsun kurin tura kuít jiruncha, pushincha seawarmiayi.

³⁶ Nuyá̱ Israer shuaran waitnentrar seamainia nuna súsarat tusa Uunt Yus Ejiptunmaya̱ aentsun waitnenkartin awajsaram tí nukap súsarmiayi. Nuní̱ túrawarmatai Ejiptunmaya̱ aentsun mash atantrarmiayi.

Israer shuar Ejiptunmaya̱ jiintramu

³⁷ Tura Israer shuarsha Ramisés nuṉkanmaya̱ Sukutnum wénak uchinkia nekapmatsuk aya úuntak nekapmaram saisiantu mir náwek wéarmiayi.

³⁸ Jíiniar wénak ti untsurí náṉkamas shuaraimiak muriknasha waakari̱ncha tí untsurí yaruakar wéarmiayi.

³⁹ Kame Israer shuarsha Ejiptunmaya̱ wárik ji̱i̱ra akupénamu ásar yurumkancha iwiartumkacharmiayi. Tura Ejiptunmaya̱ karin eṉketáchman iwiarkamun júkiarmia nuna páṉkan najankar iniarkarmiayi.

⁴⁰ Tura Israer shuarsha kuatrusiántu traintia uwí Ejiptunmaṉka pujusármiayi.

⁴¹ Nuyá̱ kuatrusiántu traintia uwí jeamunam nu tsawantini̱ṉ Uunt Yusa shuari̱ Ejiptunmaya̱ṉka mash jíintrarmiayi

⁴² Kame Ejiptunmaya̱ atumín ji̱i̱rmaru asamtai jú̱ kashikia Uunt Yusna átiniaiti. Tura nú kashitin atumsha nuyá̱ atumí uchirí̱sha Uunt Yusan enentáimtusartin áiniawai.

Paskua nájankur umiktin chicham

⁴³ Nuyá̱ Uunt Yus Muisaisan Araunja̱i̱ chicharuk “Ju̱i̱ti Paskua namper nájankur umiktin chicham. Yajaya̱ aentska peṉké yúashtiniaiti.

⁴⁴ Antsu ashí iniatai̱ kuitji̱a̱i̱ sumakma ainia nuka túrasha tsupirnakmaitkiuṉka yuatí. Naṉ. 17:10-14

⁴⁵ Antsu yajaya̱ aentssha tura takakmak wekaasha nú Paskua murikiu namanké̱nka yuashti.

⁴⁶ Túrasha chikichkí je̱a̱nmaṉ yunati. Núnisaṉ nu je̱a̱nmaya̱ṉka namaṉka junakchati tura ukunchísha kupirnakchati.

⁴⁷ Kame ashí Israer shuar núnaka túrawartatui.

⁴⁸ Kame yajaya̱ aentssha ámiji̱a̱i̱ pujá asa Uunt Yusa Páskuari̱n najatataj tákuṉka nu aentsnumia̱ ashí áishmaṉ ainia nuka tsupirnakarti. Tura tuke nuṉke̱nniua núnis ajas nampernaka najatati. Antsu tsupirnakchaka núnaka peṉké yuashti.

⁴⁹ Tuma asamtai ashí Israer shuartirmesha núnisaṉ yajaya̱ atumji̱a̱i̱ matsatainia nusha ju̱ akupkámunak umikiartatui” tímiayi.

⁵⁰ Uunt Yus Muisaisan Araunja̱i̱ umiktarum tusa akupkámia núnaka ashí Israer shuarsha tímiatrusaraṉ umirkarmiayi.

⁵¹ Tura Uunt Yus Israer shuaran nu tsawantai̱k Ejiptunmaya̱nka ni suntarí̱ya nútikias ji̱i̱rarmiayi.