Jiin. 1 - Yus Papí: Shuarja̱i̱ Yus Yamaram Chicham Najanamu

Ejiptunam Israer shuar wáitsamu

¹ Israer shuar aṉkant aṉkant uchirtiuk ni aparí̱ Jakupja̱i̱ Ejiptunam jeawarmia nuka ju̱ áiniawai,

² Ruwin, Semiun, Riwí, Jutá,

³ Isakár, Sapurún, Piṉjiamín,

⁴ Tan, Neptarí, Kaat, tura Aser.

⁵ Kame Jakupu shuari̱ ashí iruram sataintia shuar ármiayi. Antsu Juseka Ejiptu nuṉkanam pujumiayi.

⁶ Nuyá̱ Jusesha tura ni yachi̱sha núnisaṉ nu tsawantin matsamármia nusha ashí amuukarmiayi.

⁷ Tura Israer shuarsha ti pampaṉkar ti kakaram ajasármiayi. Túrunawar Ejiptunmaṉka piákarmiayi.

⁸ Tura nú ukunam Ejiptunam chíkich akupin Jusen nékachu náamkamiayi. Tura nisha ni shuari̱n chicharainiak

⁹ “Iiskua, Israer shuar íiji̱a̱i̱ṉkia naṉkaamas ti untsurí ajasárai tura iiji̱a̱i̱ naṉkaamas kakaram áiniawai.

¹⁰ Kame yamaikia enentáimpratai. Meset akui nisha ii nemasri̱ji̱a̱i̱ iruntrar iin nupettamkar pisarchartatuak. Nu asamtai ti pampaṉka̱i̱ṉ tusar nekaamainiachuk suritniákarti” tímiayi.

¹¹ Nuya̱ṉka Israer shuaran ti kakaram takamtiksarat tusa iniamniun anaikiarmiayi. Tura Parauṉkan yurumak irumtai̱ je̱a̱ je̱a̱mkarum jimiará pepru najanatarum tusar takamtiksarmiayi. Nu pepru náari̱ṉkia Pitiun tura Ramisés ármiayi.

¹² Kame Israer shuarka tí waitkiainiamaitiat ti untsurí pampaṉkarmiayi. Túmainiakui Ejiptunmaya̱ aentska Israer shuaran ashamiarmiayi.

¹³ Imianú untsurí ajasármatai Ejiptunmaya̱ aents Israer shuaran nuna kakaram takamtikiarmiayi.

¹⁴ Tura naṉkaamas takamtikiainiak, nuwe pachimkiatniuncha tura iniarkatniuncha, chíkich takat irunmia nunasha mái̱ takamtik awajénam tí waitiarmiayi.

¹⁵ Núnisaṉ Israernumia̱ṉ jimiará nuwa̱ uchin takumtikin ni naari̱ Sepra tura Púa ármiayi. Nú nuwa̱n Ejiptunmaya̱ akupin chicharainiak

¹⁶ “Israer nuwa̱ uchin takakuiṉkia átum iistarum. Tura áishmaṉkaitkiuiṉkia mátarum antsu núwa̱itkiuiṉkia máwairap” tiármiayi.

¹⁷ Túrasha uchin takumtikin armia nuka Yusan ashamainiak akupniu chichame̱nka umirtsuk uchi áishmaṉchincha mácharmiayi.

¹⁸ Nuna túruiniakui ataksha Ejiptunmaya̱ akupin uchin takumtikniun untsukar chicharainiak “¿Warí urukamtai wi tímiajna nuka umitsuk uchi áishmaṉ máatskesha iniaisarum?” tímiayi.

¹⁹ Nu tutai uchin takumtikin aimiainiak “Israer nuwa̱ka Ejiptunmaya̱ nuwá̱ ániuchu áiniawai. Antsu apu ásar iikia jeatsrini̱ṉ takusu jear wéaji” tiármiayi.

²⁰ Nuna tura ásarmatai uchí takumtikniun Yus yaiṉkiarmiayi. Tura Israer shuarsha pampaṉkar ti kakaram ajasármiayi.

²¹ Tura uchin takumtikin armia nu Yusan ashamkaru ásarmatai Yus nu nuwa̱n yain ni shuari̱ncha ipiampármiayi.

²² Nuyá̱ Parauṉ ashí Ejiptunmaya̱ aentsun chicharainiak “Ashí Israer uchi áishmaṉ akiiniainia nuka Niru entsanam ajaptiarum. Antsu nuwa̱ akiiniamtaiṉkia máwairap” tímiayi.