Ists. 9 - Yus Papí: Shuarja̱i̱ Yus Yamaram Chicham Najanamu

Chíkich nuṉkanmaya̱ nuatramuja̱i̱ itiurchat wainma

¹ Nu naṉkaamasmatai uuntri̱ ainia nu taruti chichartuiniak “Israer shuarsha núnisaṉ Yúsnan pujurin tura Riwí shuarsha chíkich nuṉkanmaya̱ aentsu túrutairi̱ ainia nuya̱ṉka kanakcharuiti. Tura Kanaan, Jet, Píris, Jípius, Amun, Muap, Ejiptu, Amur aentsun túrutairi̱ji̱a̱i̱ métek mui̱jmiain túruiniawai.

² Warí nisha tura ni uchirí̱ncha nuyá̱ aentsu nawantri̱ji̱a̱i̱ nuatmamtikiaruiti. Nuna túruiniak péṉker shuar Yus akantúkma nu nuṉkanmaya̱ja̱i̱ pachimpraruiti. Tura pepru uuntri̱ núnisaṉ akupin ainia nusha nú yajauch túratniunka niá niá emká naṉkamawaru áiniawai” tiármiayi.

³ Nuya̱ṉka nuna antukan winia pushirun tura awaṉkémpruncha já̱a̱kmajai tura winia muukruiniancha intiashrun tura susurnasha uweran ti itiurchat nekapran nuṉká pujusmajai.

⁴ Nuyá̱ ashí shuar Israera Yusri̱ chichame̱n ashamin arma nu Israer shuar achirar yaruakma yajauch túramuri̱n kúntuts enentáimiainiak wi pujamunam iruntrarmai. Kame aaṉku taṉku maar aestutai̱ ura jeamam wi tí kuntuts nekapran wáitsan pujumjai.

⁵ Tura taṉku maar aestuatin ura jeamunam ti kúntuts enentáimpran pujamunmaya̱ wajaki̱n winia pushirun tura awaṉkémpruncha já̱a̱rmartuk tikishmaran Jiuwan winia Yúsrun uwejrun takurmiajai.

⁶ Tura chichareakun “Winia Yusru páchim enentáimpran paṉkain Ámin íistinniasha natsa̱a̱ran pujajai. Warí ii yajauch túrutai̱ iincha tí piak amutmá nayaimpinmasha jeayi.

⁷ Ii uuntri̱ matsamin armia ímiania̱ṉ juárkirik ti uunt tunaaja̱i̱ matsatji. Tuma asar ii yajauchiri̱ji̱a̱i̱ imiá iiksha ii akupniúri̱sha ii Yusri̱n pujurniusha chíkich nuṉkanmaya̱ úunt akupniu uwejé̱e̱n íktusar iniaisámuitji. Tura mantamnatniunam kasarar yarurkatniunam tura achirar yajá yaruakma pujustin nu natsanmai̱ ajaktinniumiasha yamaiya̱ tímiaja̱i̱sha kanaatsji.

⁸ Tura yamaikia Jiuwá ii Yusri̱ waitnenkartutai̱ ishichik tsawant awai. Tuma asam Ame akantúkma nuṉkanam aṉkant itiurchat awajsachma pujusat tusam ishichik aents juákaru tsaṉkatkaitme. Kame ii Yusri̱ iin tsáapin awajtúrmakrin nuja̱i̱ paant nekaar iniatai̱ pujuiniayatrik ishichkikia iwiaaku pujustinniasha tsaṉkatramkaitji.

⁹ Warí iikia iniatai̱ pujaji túrasha nui̱ pujarni̱sha Yuska ajapanka iniaitiámsachuitji. Tura ni waitnenkartutairi̱ji̱a̱i̱ Pírsianmaya̱ úunt akupniusha iwiaaku pujustinian tsaṉkatramak ii Yusri̱ Je̱e̱ emeskamu atak awaiṉki̱ je̱a̱mtinniasha tura Jutanam tura Jerusaréṉnumsha iin waitmakat tusa tsaṉkatramkaitji.

¹⁰ Túrasha yamaisha ii Yusri̱sha ju̱ túramunmasha ¿warí títiajik? Warí iikia Ame akupkámu ajapa iniaisaitji.

¹¹ Ámin takartámin Yúsnan etserin ainia nuní̱ akupkámiame. Ame chichaakum ‘Nui matsainia nu aentska Yusan enentáimtichu ásar ni mui̱jmiai̱ túrutairi̱n ashí nu nuṉkanmaṉka jamakaruiti tuma ásar aentscha ti netse ásarmatai waya̱rum nérentin ajastatrum nu nuṉkasha mui̱jmiai̱ ajasuíti tukartichmakam.

¹² Núnismek chichaakum atumí nawantri̱sha ni uchirí̱ji̱a̱i̱ṉkia nuatmamtikiairap nútiksarmek atumí uchirí̱sha ni nawantri̱ji̱a̱i̱ṉkia nuatnaikiati tusarum tsaṉkamkashtiniatrume. Ántsarmek péṉker kakaram ajasár pujusmí tusarum aṉkant shiir tura peṉker pujusárat tusarmesha tsaṉkatkairap. Nu túrakrumka nu nuṉkanmaṉka tí peṉker matsamsarum atumnia nusha atumí uchirí̱ nérentin ajasarat tusarum tuke ikiurkittiarme.’

¹³ Ashí yajauch ii tunáa ti túramuja̱i̱ iik makuntrajnia nuka ii Yusri̱yá nekas ii asutniátniua nuja̱i̱ métekka asutkiártuachume antsu iinkia ishichik aentska iwiaaku pujusárat tusam sukartusume.

¹⁴ Tuma asar ataksha Ame akupkámuram umitskek ¿pujustatajⁱ? Chíkich péprunmaya̱ tí yajauchin túrin ainia núja̱i̱ṉ ¿iruntrattajⁱ? Nu túrakriṉkia Ame kajekam iin amutskeash ¿iniaikiartusaintiam? Nu túrakriṉkia amukratkam ishichik aents iwiaaku juákarat tusamka iniaisachaintme.

¹⁵ Maa Jiuwá, Israera Yusri̱yá, Ámeka nekas péṉker naka túriniaitme. Maa iiṉkia ámeka ishichik awajkartusam tuke yamaiya̱ tímiaja̱i̱sha iwiaaku amaame. Ame íimmianum ii tunaarí̱ paant nekaamar paant awajeaji. Warí ju̱ yajauchin túrakka Aminí̱ṉkia pujuschamniaiti” Ístras Yusan tímiayi.