Ists. 7 - Yus Papí: Shuarja̱i̱ Yus Yamaram Chicham Najanamu

Ístras Jerusaréṉnum taama

¹ Nuyá̱ Pírsianmaya̱ úunt akupin Artajírjis akupmia nu tsawantai̱ nui̱ áishmaṉ ni naari̱ Ístras pujumiayi. Nisha Serayás, Asarías, Irkías,

² Sarum, Satuk, Ajitiúp,

³ Amarías, Asarías, Meriut,

⁴ Seraías, Usi, Puki,

⁵ Awisúa, Pinias tura Iriasára uchirí̱ ármiayi. Ashí nu weaka Israernum emka Yúsnan pujurin Araun wea ármiayi.

⁶ Jú̱ Ístras papin ain tura Muisais akupkámu umiktin chichaman tí unuimiátrauya nu Papirúnianmaya̱ Jerusaréṉnum támiayi. Kame Uunt Yus ni Yusri̱ Ístrasan pujuru asamtai ni seammia núnaka úunt akupin ashí susamiayi.

⁷ Núnisaṉ úunt akupin Artajírjis akupin ajas siati uwí pujái̱ Israernumia̱ Riwí shuar kantamniusha tura Yúsnan pujurniusha waiti wainniusha nuyá̱ Yusa Je̱e̱n takakma áiniasha wárumchik Jerusaréṉnum wéarmiayi.

Jerusaréṉnum wáketma Ístrasja̱i̱ irunar

⁸ Artajírjis úunt akupin ajasmaka siati uwí tura nantusha seṉku jeamunam Ístras Jerusaréṉnum jeamiayi.

⁹ Tura emka nantu juármanum tsawantka chikichik tsawa̱rmanum Papirúnianmaya̱ waketkitniun naṉkamamiayi. Túruna seṉku nantu juarma tsawantin Jerusaréṉnum jeamiayi. Warí ni Yusri̱ waitnenkartutairi̱ niji̱a̱i̱ pujumiayi.

¹⁰ Warí Ístraska Uunt Yus akupkámu chichaman émamkesan unuimiátran péṉker nekaan umíakun Israer shuaran Yusa Chichame̱n tura akupkámuri̱ncha jintintiáwartaj tusa ni enentái̱ncha iwiarnaruyayi.

Artajírjis Ístrasan papí súamu

¹¹ Ju̱i̱ti papin aar chikichnasha núninniak Yúsnan pujurniun tura papí ain Uunt Yusa chichame̱ncha unuimiátra núnisaṉ Yusa chichame̱n Israer shuara jintinniuri̱n Ístrasan úunt akupin Artajírjis áatar susamu.

¹² “Artajírjis, úunt akupniu akupniúri̱, nayaimpinmaya̱ Yusa akupkámu papiri̱ áatniuri̱ Ístras. Péṉker aṉkant pujusti. Tura yamaikia

¹³ yaaksha Israer shuarnumia̱ ákuṉka Yúsnan pujurin áiniasha tura Riwí shuar ainia nusha ámiji̱a̱i̱ Jerusaréṉnum wéartaj tuíniakka wéarti tusan akupeajai.

¹⁴ Warí ame Yúsrum akupkámu ame takakma tana nuja̱i̱ métek Jutaja̱i̱ Jerusaréṉ iyutarum tusa úunt akupin tura ni yaintri̱ siati ainia nu akuptámainiawai.

¹⁵ Núnisrumek Israera Yusri̱ pujutái̱ri̱nkia Jerusaréṉ asamtai úunt akupin ni yaintri̱ ainia nuja̱i̱ kuít jiruncha tura kurincha ántar suíniamusha jukit tusan akupeajme.

¹⁶ Nútiksarmek Papirúnianmaya̱ kurisha núnisaṉ kuitcha irurtatrumna nusha tura shuar Yusan ántar súsarmasha nuyá̱ Yúsnan pujurin ni wakeramuja̱i̱ métek ni Yusri̱ Je̱e̱ Jerusaréṉnum pujana núnan súsarmasha ashí yaruaktiniaitrume.

¹⁷ Jú̱ kuitji̱a̱i̱ ame Yúsrumi Je̱e̱ Jerusaréṉnum pujana nu Yus aestuatin waaka uchirí̱sha, muriksha, murik yamatskamsha, tríkiusha, umartin súsatniusha émamkesrum sumaktarum.

¹⁸ Tura kuit jiru tura kuri tiáruja̱i̱ṉkia atumí Yusri̱ túratarum túramprumna nuja̱i̱ métek ame yátsum túa péṉker iyarum nu túratarum.

¹⁹ Tura Yusa Je̱e̱n takakmatai̱ ainia nu ataksamu árumna nusha Jerusaréṉnum Yus pujamunam awakeartatrume.

²⁰ Tura ame Yúsrumi Je̱e̱n wariṉkish atsumnakuiṉkia úunt akupniu kuitri̱ ikiutai̱nmaya̱ nuyá̱ susatarum.

²¹ Tura wi úunt akupin Artajírjis ashí kuítian wáinin entsa amaini̱ pujarmena nútirmin júana akupeajrume, Yúsnan pujurin Ístras, Nayaimpinmaya̱ Yus akupkámu chichamprin ai̱ṉ warinia seatmarum nuka wárikmasrum ashí susatarum tájarme.

²² Kuít jiruka 72,6 kintiar tríkiusha 22.000 ritru nuyá̱ wíniusha 2.000 ritru ántsarmek asuitisha 2.000 ritru antsu weeka nekapmatsuk susamniaitrume.

²³ Ashí nayaimpinmaya̱ Yus akupkámuka tí wárikmasrum Yusa Je̱e̱ amuktárum. Warí núja̱i̱nchuka úunt akupniu akupeamuri̱n tura ni uchirí̱n Yus kajerkara̱i̱ṉ tusarum túratarum.

²⁴ Tura atumniasha ju̱ nékamtikji ashí Yúsnan pujurniunka nuyá̱ Riwí shuarnasha kantamniuncha waiti wainniuncha, Yusa Je̱e̱n yaintri̱ pujuiniana núnisaraṉ Yusa Uunt Je̱e̱n takakma ainia núnaka tura kuit akikmaktinniasha akikmaktarum yaaksha tíchatniuiti.

²⁵ Tura ámeka Ístrasá, Yus nekatairi̱n amasua nuja̱i̱ aents entsa amaini̱ matsatainia nuna sumamtikniusha tura úuntri̱sha ame Yusrum akupkámun ashí nékainia nu anairarta. Tura Yusrum akupkámun nékainiatsna nuka jintintiáwarta.

²⁶ Antsu ashí Yusa akupkámuri̱n tura akupin akupkámun umíachuka ti wárik ni túramuri̱ji̱a̱i̱ métek sumamtiknati, mantamnatniuja̱i̱ṉsha nuṉké̱ atantrámu nuí̱chuka akikmaktinji̱a̱i̱ṉsha sepunam eṉkeamuksha ártatui” tímiayi.

²⁷ ¡Ii apachri̱ Yusri̱ Uunt Yus shiir awajsamu atí. Warí Níṉkichuk Uunt Yusa Je̱e̱ Jerusaréṉnum pujana nu páantin awajnásti tusa úunt akupniun tú enentáimtikra!

²⁸ Warí Niṉki úunt akupniuncha tura akupniu takarniúri̱ncha núnisaṉ ni yaintri̱ tí kakaram pujuarmia nunasha winia waitnentrurarat tusa enentáincha yapajtiuáwarmai. Túramtai winia Uunt Yusur wiji̱a̱i̱ pujá asamtai kakarmaja̱i̱ nuya̱ṉka wiji̱a̱i̱ waketkiarat tusan Israer shuara peṉkeri̱ arma nuna irurarmajai.