Ists. 6 - Yus Papí: Shuarja̱i̱ Yus Yamaram Chicham Najanamu

Siru chícham najanamun Taríu étserma

¹ Papirúnianam papí aakma ikiutai̱niam warinkisha émamkesar péṉkerak ainia nu ikiutai̱niam úunt akupin Taríu e̱a̱ktarum tusa akupkámiayi.

² Tura Akmitianam úunt akupniu je̱e̱n Mítianam nuṉka tesarmánum pujana nui̱, papinium jú̱nis áarmauyi: Enentáimtusta tu áarman wainkiamai.

³ “Siru úunt akupin ajasma emka uwí yama juármanum imia niṉki úunt akupin Síruk Yusa Uunt Je̱e̱ Jerusaréṉnum ana nu ataksha iwiarkarum je̱a̱mkatarum aestuatai̱ ati tusa akupkámiayi. Pauri̱sha wewe ukurtarum tura ni yakiri̱sha paintisiáti mitru núnisaṉ waṉkantí̱sha paintisiáti mítruk najanatarum.

⁴ Kaya uuntja̱i̱ iwiarkamu menaintiú pekakrum tura áitkiasrumek numi yamarmaka chikichik pekakmaji̱a̱i̱n najanatarum. Tura nu takakur kuit ajapamusha takamtsuk úunt akupniu kuítri̱ji̱a̱i̱ akikmatkattawai.

⁵ Núnisaṉ Yusa Je̱e̱n takatai̱ kuriji̱a̱i̱ tura winchá jiruja̱i̱ najankamu Napukutunusúr Jerusaréṉnum Yusa Uunt Je̱e̱ya̱n yaruak Papirúnianam ikiusmia nú Jerusaréṉnum awakearam Yusa Uunt Je̱e̱n ikiuntsati.”

⁶ “Pai yamaikia entsa amaini̱ matsatainia nuna uuntri̱ Tatnai tura Sétarpusnai nuyá̱ atumí a̱i̱ uuntri̱ amaini̱ matsatainia nuí̱miak nuya̱ṉka arant wetarum.

⁷ Nu je̱a̱n Yusa Uunt Je̱e̱n iwiarkar ataksha je̱a̱mkarat itit awajsairap. Jutanmaya̱ anaikiamu tura ni uuntri̱ ainia nu Yusa Uunt Je̱e̱n yaunchu amia nui̱ṉᵏ ataksha iwiarkar je̱a̱mkarat iniaisatarum.

⁸ Yusa Uunt Je̱e̱ iwiarnak ataksha je̱a̱mnakat tusarum Jutanmaya̱ uunt ainia nu warí itiurnakartiniait nuna wi akupeajai: uunt akupniu kuítri̱n entsa amaini̱ matsatainia akikmainia nú kuitji̱a̱i̱ aents takakmainia nuka táamtsuk akiktarum takat naṉkankaiṉ.

⁹ Núnisrumek waaka uchichisha muriksha tura murik yamatskamnasha máwar takamtsuk aestuawar nayaimpinmaya̱ Yusan shiir awajsatniun atsumainiakuisha núnisaṉ tríkiusha wíniusha weesha tura asuitisha nuyá̱ Jerusaréṉnum Yúsnan pujurin ainia nu tuke tsawant ni seamainia nuja̱i̱ métek atsumamuri̱ surittsuk sunasarti.

¹⁰ Nayaimpinmaya̱ Yusan wakerú ajamainian aestuiniak úunt akupniu iwiaakmari̱n tura ni uchirí̱ Yusan seatiarti.

¹¹ Núnisnak ju̱nasha wi akupeajai, yaaksha ju̱ akupkámun yapaji̱a̱kka ni je̱e̱nia̱ wiyaṉk jurunás yakí̱ takuni̱ nui̱ nenamu átatui nuya̱ṉka nuna tura asa ní je̱e̱nka muwa matsamtai̱ awajnásti.

¹² Ashí akupin tura aentskesha ju̱na yapaji̱áttsa núja̱i̱nchuka nu je̱a̱n Yusa Uunt Je̱e̱ Jerusaréṉnum ana nuna emesrattsa uwejé̱n takua ajakuiṉkia Ni náari̱n nui̱ apujsa nú Yus emesrati. Jú̱naka wi Taríu warik uminkiati tusan akupeajai.”

Yusa Je̱e̱ je̱a̱mar umikma

¹³ Nuya̱ṉka Yúpratis entsa amaini̱ matsatkamu uuntri̱ Tatnai tura Sétarpusnai ni írutramuri̱ji̱a̱i̱ úunt akupin Taríu chichaman akupkámia núnaka tímiatrusaṉ umikiarmiayi.

¹⁴ Tura Israer shuara uuntri̱ armia nusha Yúsnan etserin Ajíu tura Itiu uchirí̱ Sakarías túrunattawai tusa etserkarmia ímiatrusaṉ takainiak núkap kuakarmiayi. Núnisaṉ Israer shuara Yusri̱ timia nuja̱i̱ métek Siru, Taríu, nuyá̱ Artajírjis Pírsianmaya̱ úunt akupin armia nuna chichame̱ja̱i̱ métek je̱a̱mar amukármiayi.

¹⁵ Tura úunt akupin Taríu sais uwí náamak Pírsianam pujái̱ uwí amúamu nantu menaintiú tsawantai̱ Uunt Yusa Je̱e̱n amukármiayi.

¹⁶ Núnisaṉ Israer shuarsha tura Yúsnan pujurniusha Riwí shuarsha ántsaṉ yajá yaruakma káunkarmia nu Uunt Yusa Je̱e̱ amukman ti shiir wararainiak jú̱ Je̱a̱ Yusna atí tusar Yusan yumiṉsar yurumáwarmiayi.

¹⁷ Tura Yusa Je̱e̱ amukma iruntramunam sian waaka áishmaṉkan tusiantu murik áishmaṉkan tura kuatrusiántu murik yamatskaman súsarmiayi. Nuyá̱ ni tunaarí̱ tsaṉkurnarartinniasha Israer shuar tuse wea armia nuja̱i̱ métek tuse chípiun Yusan áestuawarmiayi.

¹⁸ Nuna tura umikiar Jerusaréṉnum Yúsnan takarsarat tusar Muisais aarmia tímiatrusaraṉ Yúsnan pujurniuncha ní takatri̱ni̱ṉ tura Riwí shuarnasha ni takatrí̱ji̱a̱i̱ métek akantrar aṉkant aṉkant apujsarmiayi.

¹⁹ Núnisaṉ achirar yajá yaruakma káunkarmia nusha emka nantu tsawant katurse jeamtai paṉ karin eṉketáchma Paskua namperan najanawarmiayi.

²⁰ Tura Yúsnan pujurin nuyá̱ Riwí shuar imiatkincha ajasáru ásar Paskua namperan najanainiak achirar yajá yaruakma káunkarununcha tura ni yachi̱ Yúsnan pujurin armia núnanuncha núnisaraṉ ímia niniuncha murikiun mantuawar Yusan áestuawarmiayi.

²¹ Tura Israer shuar achirar yajá yaruakma káunkarusha núnisaṉ nui̱ pujuarmia nú aentssha nú nuṉkanmaya̱ aentsu yajauch túrutairi̱n iniaisar Israer shuara Uunt Yusri̱n umirkar shiir enentáimtustai tusar pachinkiarusha iruntrar yurumáwarmiayi.

²² Nuya̱ṉka ti shiir warasar paṉ karin eṉketáchma namperan siati tsawant pujursarmiayi. Warí ti shiir warainiak Israer shuara Yusri̱ Je̱e̱n takainiakuisha Pírsianmaya̱ úunt akupniusha Israer shuarnaka shiir enentáimtusarat tusa Uunt Yuska úunt akupniu enentái̱ncha iwiarturmiayi.