Ists. 4 - Yus Papí: Shuarja̱i̱ Yus Yamaram Chicham Najanamu

Uunt Yusa Je̱e̱n je̱a̱mara̱i̱ṉ tusa tsanumma

¹ Kame achirar yajá yaruakma káunkar Uunt Yusan Israera Yusri̱ Je̱e̱n je̱a̱mainiawai táman Jutá tura Piṉjiamín shuara nemasri̱ antukarmiayi.

² Tura Surupapíran núnisaṉ uunt armia nuna weriar chicharainiak “Iisha atumji̱a̱i̱ irunturar ju̱ je̱a̱ je̱a̱mtai. Warí iisha atumji̱a̱i̱ métek atumí Yusri̱ e̱a̱ji. Tura Asirianmaya̱ úunt akupin Esarjatún ju̱i̱ ikiatmakmiaj nuyá̱ juárkimiuk yamaiya̱ ju̱i̱sha enentáimtukir murikkia Ni áestukir winiaji” tiármiayi.

³ Túrasha Surupapír, Jesúa, núnisaṉ Israer shuara uuntri̱ armia nu chichainiak “Ii Yusri̱ Je̱e̱ṉka atumji̱a̱i̱ iruntrarkia je̱a̱rchatniuitji. Antsu Pírsianmaya̱ úunt akupin Siru akupkámuja̱i̱ métek Uunt Yus Israer shuara Yusri̱ Je̱e̱ṉka iik je̱a̱rtiniaitji” tiármiayi.

⁴ Túrasha Jutá shuar sapijmiainiak je̱a̱mcharat tusar nu nuṉkanmaya̱ aents itit awajiármiayi.

⁵ Ni túramun umikiara̱i̱ṉ tusar aentsu chicharniun akikiar Pírsianam úunt akupin Siru pujumia nuyá̱ juárkimiuk úunt akupin Taríu pujumia tímianaisha itit awajsarmiayi.

⁶ Núnisaṉ Asueru úunt akupin náamak yama juármanum Jutanmaya̱ tura Jerusaréṉnumia̱ aents matsatainia nuna yajauch túruiniawai tusar tsanumprurar papin najatawarmiayi.

Artajírjis takat Uunt iniaṉnakma

⁷ Núnisaṉ Artajírjis pujumia nu tsawantincha Pisram, Mitritiátis, Tawiir tura ni chíkich armia nusha Pírsianmaya̱ uunt akupin Artajírjisan papin áatrarmiayi. Nu papí áarmari̱ṉkia tura chichame̱sha Aram chichamauyayi.

⁸ Nuyá̱ uuntri̱ Rejum papí aintri̱ Semsai Jerusaréṉ shuaran kajerainiak tsanumprurar papin áarar úunt akupniu Artajírjisai̱ akuptúkarmiayi.

⁹ Nu tsawantin uuntri̱ Rejum tura papí ai̱ṉ Semsai tura ni chikichja̱i̱ sumamtikniusha pepru úuntri̱sha núnisan suntara úuntri̱sha tura Pírsianmaya̱sha Ereknumia̱ Papirúnianmaya̱sha Súsanmaya̱sha papin áarar akuptúkarmiayi. Kame nu aentska Iram shuar ármiayi.

¹⁰ Tura chíkich aentsuim uunt Asnapár páantin kakarmauya nu achir yaruak Samaria péprunam matsamia nu tura chíkich mátsatkamu entsa amaini̱ matsasármia nui̱m ju̱ papin áararmiayi.

¹¹ Ju̱i̱ti papin áarar akupkarmia nuna wakaní̱ jusamu “Úunt akupin Artajírjisan, ámin takartámin entsa amaini̱ pujuiniana nu amikmátmainiawai.

¹² Ju̱ úunt akupniu ame paant nekaamu atí. Israer shuar amiya̱ akupramamna nu Jerusaréṉnum iini̱i̱ káunkarai pepru umiktinian nakitín tura yajauch tura wenuken tura tépakmari̱n iwiartuiniawai.

¹³ Núnisrik uunt akupin ju̱ nékamtikji jú̱ peprun awaiṉki̱ ataksha iwiarnakuiṉkia núnisaṉ wenuke̱sha iwiarnakmataiṉkia ju̱ aentska emetamu asar akikmaktinia nunasha tura nuṉke̱e̱n akikmaktinniasha núnisan surutmamunam akikmaktinniasha peṉké nakitrartatui. Tuma asa kuit irurar ikiutai̱ya̱ nusha amukáttawai.

¹⁴ Warí iisha úunt akupin waintiai̱ asar nuja̱i̱ ii úunt akupin umirchamu wáinkiatin péṉkerchaiti. Tuma asamtai úunt akupin iisha nekamtikji.

¹⁵ Nusha yaunchu naṉkaamasua nu nekaatin tusar túrunawarma papinium ame apa ainia nu aarma nui̱ iistá. Túram nu yaunchu naṉkaamasua nu papinium aarma wainkiattame umiktinian nakitín peprua nu, tuma asa akupin ainia nuna tura péprun itiurchat awajin ainia nu nekaattame. Tura yáunchuya̱n umiktinian nakitín ainia nu nekaattame. Tuma asa nu pepru emeskamuiti.

¹⁶ Jú̱ pepru wenuke̱sha ataksha iwiartukar awajair amunkamtainkia nuiṉkia nuṉka tépakma entsa amaini̱ṉkia áminiuka áchattawai tusar úunt akupin ju̱ nekamtikji.”

¹⁷ Tura úunt akupin áimiuk jú̱nis timiayi “Uuntri̱ Rejuman tura papí aintri̱ Semsain tura ame ai̱m chíkich Samarian pujuinian núnisan entsá amaini̱ pujuiniatiram: péṉker tura aṉkant pujustarum.

¹⁸ Papí áarum akupkámarmena nu wi antú pujamunam ti paant áujnasmai.

¹⁹ Tura wi akupeamu umiktarum tusan tsaṉkatkamjai chichaman apujtusaram papin e̱a̱kar wáinkiarmai. Kame nú pépruka yáunchusha úunt akupin ainia nuna kajerin umiktinia nakitín tura nuamtaksha itiurchatan najanin tama wainniakai.

²⁰ Tura Jerusaréṉnumsha úunt akupin ti kakaram ármiayi. Tuma ásar entsa amainia̱ nuna á̱a̱wini̱sha awakmakar pujuinia ásar akikmaktinniasha tura nuṉke̱e̱n akikmaktinniasha núnisan surutmamunam akikmaktinniasha akimtikin ármiayi.

²¹ Pai yamaikia ame nú áishmaṉ takakmatan iniaisarat tusam chícham ujakárta nu pepru ataksha iwiaramu áchati wi ataksha yamaram chichaman akupmam.

²² Nu túrakrumsha nui̱sha átum winia chichamur umirtukchairap warí nuja̱i̱ akupma nusha itiurchat awajsashtatrume.”

²³ Nuya̱ṉka úunt akupin Artajírjis chichakma áarman Rejum tura ni papí áakmauri̱ Semsai nuyá̱ ni ai̱sha matsatainiamunam áujsarmatai nuya̱ṉka ti wárik Jerusaréṉnum wear Israer shuar matsatmanum ni takatrí̱n kakarmaja̱i̱ tí itiurchat awajak tsuriṉkiarmiayi.

²⁴ Nuya̱ṉka Yusa Je̱e̱ je̱a̱mtinian Jerusaréṉnum naṉkamawarmia núnaka iniaisarmiayi. Tura núnasha Taríu Pirsia nuṉkanam úunt akupin ajasma jimiará uwí pujumia ímianai iniaisarmiayi.