Ists. 3 - Yus Papí: Shuarja̱i̱ Yus Yamaram Chicham Najanamu

Ataksha Yus áestutai̱ najanar shiir awajsatin juarma

¹ Kame waketrar kaunak pujuiniamu siati nantu jeamunam chikichik enentáiniak júsar Jerusaréṉ péprunam iruntrarmiayi.

² Nuya̱ṉka Jusatáka uchirí̱ Jesúa ni yachi̱ Yúsnan pujurin armia nu, núnisaṉ Saratiára uchirí̱ Surupapír yachi̱miak yaunchu Muisais Yusa takarniúri̱ papinium aarmia nuna uminiak Israer shuar murik maar Yus áestutai̱n najanawarmiayi.

³ Kame nu nuṉkanmaya̱ aentsu ashamainiayat Yus áestutai̱n najanawarmiayi. Túrawarka káshiksha kí̱arai̱sha Uunt Yusan takamtsuk áestutai̱n áestiarmiayi.

⁴ Nuyá̱ aaka namperi̱ najatainiak Muisais akupkámu chicham áarmauya nuna uminiak tuke tsawant Uunt Yus áestutai̱nkia takamtsuk áestuiniak tsawant tesarámunka iniaṉkatsuk urutmá áestuatniuit núnaka tímiatrusaṉ áestiarmiayi.

⁵ Nuna tura umikiar Uunt Yus tuke áestutai̱ncha takamtsuk áestiarmiayi. Nunasha túruiniayat nantu yama takamtai áestutai̱ncha núnisaṉ ashí namper Uunt Yus enentáimtustin tesamu armia nui̱sha nuyá̱ ní enentái̱ji̱a̱i̱ṉ ashí Uunt Yusan suarmia nunasha áestiarmiayi.

⁶ Tura Uunt Yusa Je̱e̱n je̱a̱mtinkia tépakmari̱sha aepruntsa̱i̱ṉ nántuka siati yama naṉkammanum tsawantka chikichik ai̱ Uunt Yus takamtsuk áestuatniunka juárkiarmiayi.

⁷ Nuya̱ṉka Pírsianmaya̱ úunt akupin Siru akupkámia tímiatrusaṉ Tírunmaya̱ tura Setunnumia̱ aents kayá iwiarin nuyá̱ numiji̱a̱i̱ je̱a̱mtan unuimiátka armia nuna kuítian súsarmiayi. Núnisaṉ Ríwianunmaya̱n sétrun nayantsanmaṉ ajekiar Júpiniam ikiankarat tusar yurumkancha umutaincha tura asuitincha súsarmiayi.

Yusa Je̱e̱ je̱a̱mtin juarma

⁸ Kame Saratiára uchirí̱ Surupapír nuyá̱ Jusatáka uchirí̱ Jesúa ni yachi̱sha núnisaṉ ashí Yúsnan pujurin ántsaṉ Riwí shuar tura ashí achirar yajá yaruakma Jerusaréṉnum waketrar káunkarmia nuyá̱ chikichik uwí amukar chíkich uwí naṉkama jimiará nantu jeamunam Uunt Yusa je̱e̱n je̱a̱mtan naṉkamawarmiayi. Tura Riwí shuarsha painti uwí íniaṉkasaṉ takaku armia nu Uunt Yusa Je̱e̱n je̱a̱mtan juárkiarmiayi.

⁹ Tura Riwí shuar armia nu Jesúaka uchirí̱miak, yachi̱miak, ántsaṉ Enatát uchirí̱miak, Katmiar uchirí̱miak núnisaṉ Iniatátcha ni uchirí̱miak yachi̱miak, iruntrar chikichik enentai júsar Uunt Yusa Je̱e̱ je̱a̱mman iyarmiayi.

¹⁰ Nuya̱ṉka Uunt Yusa Je̱e̱ tépakmari̱n mash amukármatai Israer shuara úunt akupniuri̱ Tawit jintiamia tímiatrusaṉ uminiak Yúsnan pujurin armia nuka Yúsnan takarkur entsatái̱ pushin entsarar kachun takaru tura Riwí shuar Asapa uchirí̱sha tuntuitiai̱n takaru Uunt Yusan shiir awajsatai tusar wajararmiayi.

¹¹ Tura Uunt Yusan kantampruá shiir yumiṉkiainiak “Warí Niṉkia tí peṉkerchakait Israer shuarnaka tuke waitnenniuiti” tuíniakui ashí shuar Uunt Yusa Je̱e̱ je̱a̱mtan juárkiarai tusar Uunt Yusan shiir wararainiak charaatum ajarmiayi.

¹² Nuyá̱ Yúsnan pujurin tura Riwí shuarsha uuntri̱ armia nusha tura ti uunt armia nusha Uunt Yusa Je̱e̱ je̱a̱mtin juarma yamái wainji tusar ti kakantar útiarmiayi. Túmainiamunam chíkichkia warainiak charaatun ajarmiayi.

¹³ Túmainiak warainiasha útainiasha nekaachmin charaatun ajainiak yajá antumtikiarmiayi.