Ists. 2 - Yus Papí: Shuarja̱i̱ Yus Yamaram Chicham Najanamu

Surupapírji̱a̱i̱ wáketma

¹ Uunt akupin Napukutunusúr Israer shuaran achirar Papirúnianam yaruakma waketkiarmia nuka ju̱ ármiayi. Nisha Jerusaréṉnum tura Jutanam aṉkant aṉkant ni nuṉke̱ni̱ṉ waketkiarmiayi.

² Kame ni uuntri̱ Surupapír tura Jesúa, Neemías, Serayás, Reerayás, Martukíu, Wírsan, Míspar, Wikwai, Reum nuyá̱ Páanaja̱i̱ iruntrar waketkiarmiayi.

^3-35 Kame Israer shuarnumka 24.144 áishmaṉ ármiayi.

^36-39 Tura Yúsnan pujurin armia nuka 4.289 áishmaṉ ármiayi.

^40-42 Nuyá̱ Riwí shuarnumia̱ṉka kantamniuja̱i̱ waiti wáinin mash iruram 341 aents ármiayi.

^43-58 Núnisaṉ Uunt Yusa Je̱e̱n takakma armia nusha tura Saramúṉka takarin armia nuna uchirí̱miak 392 áishmaṉ ármiayi.

^59-60 Núnisaṉ Israer shuarashit aparí̱sha yákit tura ya weanmaya̱it nuna nekaachar awakeararmia nuka 652 áishmaṉ ármiayi.

⁶¹ Yúsnan pujurin armia nuna uchirí̱ṉkia ju̱ áiniawai, Apayása uchirí̱sha tura Kusa uchirí̱sha nuyá̱ Parsirái uchirí̱sha ármiayi. Kame Parsirái nua̱ri̱nkia Karaatnumia̱ Parsirái nawantri̱yayi tura nua̱rí̱ shuari̱ náari̱niak anairamiayi.

⁶² Tura ju̱ aentska ni apachri̱ nuyá̱ shuari̱ naari̱ papinium áatkamun e̱a̱karmiayi túrasha peṉké wainkiacharmiayi. Kame apachri̱ nekarachma ásar Yúsnan pujurin Yusa Je̱e̱n takarmia nui̱ takakmastinian tujintkiarmiayi.

⁶³ Nuyá̱ uuntri̱ chicharuk “Yus susamua núnaka Yúsnan pujurin ajatskeka Urimian tura Tumimnasha ujatskeka yúacharti” tímiayi.

⁶⁴ Kame Jutanam waketkiarmia nuka ashí irurmaka 42.360 ármiayi.

⁶⁵ Ni takarniúri̱ áishmaṉsha nuwa̱sha nekapmatsuk 7.337 ármiayi. 200 kantamniun áishmaṉnasha nuwa̱ncha niṉkia takaku ármiayi.

⁶⁶ Ni kawairi̱sha 736 ármiayi. Ni umpururi̱sha 245,

⁶⁷ ni kamiyuri̱sha 435 tura ni umpururi̱sha 6.720 ármiayi.

⁶⁸ Úuntri̱sha súsatniun wakera armia nuke Jerusaréṉnum Uunt Yusa Je̱e̱n ataksha nui̱ṉ je̱a̱mtai tusar taar shiir enentái̱ji̱a̱i̱ Yusan súsarmiayi.

⁶⁹ Núnisaṉ Uunt Yusa je̱e̱ je̱a̱mtinniasha ni jeainia nuja̱i̱ métek súsarmiayi. Kame kurí kijintri̱ṉkia nekapmam 61.000 jean, nuyá̱ jirú kuitia kijintri̱ṉkia nekapmam 5.000 jean ántsaṉ Yúsnan pujurin entsatái̱ pushinkia 100 súsarmiayi.

⁷⁰ Núnisaṉ Yúsnan pujurin tura Riwí aentssha kantamniusha waiti wainniusha Yusa Je̱e̱n takáu áiniasha nuyá̱ ashí Israer shuar armia nusha ni nuṉke̱ni̱ṉ waketkiar matsamsarmiayi.