Ists. 10 - Yus Papí: Shuarja̱i̱ Yus Yamaram Chicham Najanamu

Chíkich nuṉkanmaya̱ nuwa̱ ji̱i̱ra akuprarma

¹ Tura Ístraska Yusa Je̱e̱n eem tikishmar Yusan áujeak útkamaikia ni tunaari̱n Yusan ujak pujurai̱ Israer shuar áishmaṉsha, nuwa̱sha tura uchisha ti kuntuts jakamnia nekapáiniak uutkamaitiak ti untsurí niin iruntrarmiayi.

² Nuya̱ṉka Iram weanmaya̱ Jejiera uchirí̱ Sekanías Ístrasan iis chicharuk “Ii Yusri̱n tunáa iikia túrawaruitji, warí, yajaya̱ nuwa̱ Yusan enentáimtichu ainia nu nuṉkanmaya̱ nuatraruitji. Túmaitkiusha Israer shuarnaka péṉker átin nákamuka tuke awai.

³ Wats yamaikia ii Yusri̱ji̱a̱i̱ chícham najanatai, ame támena nuja̱i̱ tura ii Yusri̱ akupkámun ashamainiak nu nuwa̱nka núnisaṉ nu nuwa̱nmaya̱ akiiniawaru ainia nuka jirarar ashí akuprarti. ¡Umiktin Chicham akupkámu ana nuja̱i̱ métek ashí uminkiati!

⁴ Wajaktia, warí ju̱ka ame umiktintrumete. Iikia ámiji̱a̱i̱ pujustatji kakaram ajasam takat túratin túrata” tiármiayi.

⁵ Nuya̱ṉka Ístras wajaki̱ Yúsnan pujurniun tura Riwí shuara úuntri̱ncha núnisan ashí Israer shuarnasha tájinia nuka tí nekasar tímiatrusrik umiktatji tumamtikiarmiayi tura iisha nekas tímiatrusrik umiktatji tiármiayi.

⁶ Ístras Yusa Je̱e̱ya wajaki̱ Iriasípia uchirí̱ Jujanánnumia̱ je̱e̱n wémiayi. Nui̱ we kúntuts enentáimiar apatkuncha yurumáchmiayi tura entsancha peṉké umarchamiayi. Nisha achirar yaruakma tunaari̱n enentáimtus túrunamiayi.

⁷ Nuya̱ṉka achirar yajá yaruakarma waketrar káunkaru Jerusaréṉnum ashí iruntrarti tusa Jutanmasha tura Jerusaréṉnumsha chichamam akupkarmiayi.

⁸ Tura yaaksha menaintiú tsawantin ju̱i̱ táchamtaiṉkia nui̱ṉkia anaikiarma tura uuntri̱ iwiararua nuja̱i̱ métek ni nuṉke̱nka atannákiartatui tura achirar yaruakarma matsatainia nuya̱sha jí̱i̱kir aju̱i̱miu ártatui.

⁹ Tura ashí Jutá nuyá̱ Piṉjiamín weanmaya̱ Jerusaréṉnum iruntratin tsawant tesamu jeamtai tsawantka páintitin nántuka nuíwitin Yusa Je̱e̱n aṉkant tépakna nui̱ iruntrarmiayi. Tura nui̱ áujmatnastatna nuna enentáimsar núnisaṉ yumisha yuta asamtai ashí kurainiarmiayi.

¹⁰ Nuya̱ṉka Yúsnan pujurin Ístras wajaki̱ chichaak “Yajaya̱ nuwa̱ nuatka asarum átum tunáa túraitrume túrakrum Israer shuara tunaarí̱ nuna nukap patatkarme.

¹¹ Yamaikia átumka atumí aparí̱ Yus tunaarum ujaakrum Jiuwá shiir awajkuram Ni wakeramu túratarum. Tura chíkich nuṉkanmaya̱ aentsnumia̱ṉka tura nuwa̱nmaya̱sha kanaktiarum” tímiayi.

¹² Nuyá̱ ashí irunar matsatainia nuka kakantar aimiainiak “Ee ame támena nuka tímiatrusrik umiktatji,

¹³ túrasha untsurí ásar núnisaṉ yumisha yuta asamtai aaṉka wajastin jeatsji. Tura takat túratniua nusha chikichik tsawantak tura jimiará tsawantkesha amukchamniaiti warí ju̱ tunáa túraitiaj nu ti núkapetji.

¹⁴ Antsu ii uuntri̱ ainia nuka ii náari̱n ju̱i̱ juákartinkia péṉkeraiti. Tura ashí aents ii pepruri̱n pujuinia yajaya̱ nuwa̱n nuatkaru ainia nuka tsawant tesamu jeamtai ni pépruri̱n uuntri̱ tura sumamtikin ainia nuja̱i̱ iruntrar ii túramuja̱i̱ ii Yusri̱ suira ka̱e̱ kajen kamuri̱ tsaṉkumam ju̱i̱ káunkarti” tiármiayi.

¹⁵ Áyatik Asaera uchirí̱ Junatán tura Tikpa uchirí̱ Jasías núnaka nakitrarmiayi núnisaraṉ Riwí shuarsha Misurámja̱i̱ Sapetai núna útsuarmiayi.

¹⁶ Nuya̱ṉka achirar yaruakarma waketrar káunkaru armia nuka túratai tiarmia núnaka tímiatrusan umikiarmiayi. Túrawar Yúsnan pujurin Ístrasan tura ní aparí̱ shuari̱n úuntri̱n armia núnaka wárumchikniak akankarmiayi. Tura anaikiarmaka tias nantu jeamunam emka tsawantin nuna péṉker ashí iwiarkatai tusar pujursarmiayi.

¹⁷ Ashí yajaya̱ nuwa̱n nuatra armia nu sumamtikiatniunka nantu yama juármanum emka tsawanta nui̱ amukármiayi.

Chíkich nuṉkanmaya̱ nuwa̱ nuatramu

^18-44 Chíkich nuṉkanmaya̱ nuwa̱n nuatraruka Yúsnan pujurniu uchirí̱ṉkia tiasisiáti ármiayi. Nuyá̱ Riwí shuarka sais ármiayi núnisaṉ kantamin armia nuya̱ṉka chikichik ámiayi tura waiti wáinniuka menaint ármiayi. Núnisaṉ Israer shuar náṉkamas armia nuka uchaintia ármiayi. Kame ashí ju̱ aentska chíkich nuṉkanmaya̱ nuwa̱n nuatkaru ásar chíkichkia uchincha yajutmaku ármiayi.