Isr. 9 - Yus Papí: Shuarja̱i̱ Yus Yamaram Chicham Najanamu

Yusa Je̱e̱ nayaimpinmasha tura ju̱ nuṉkanmasha

¹ Yamaikia nekaata, emka chicham najanamuka Yus itiur enentáimtustiniait tura Yus Shiir Awajtai̱ Je̱a̱ ju̱ nuṉkanam amia núnan jintiimiayi.

² Kame Yus Shiir Awajtai̱ Je̱a̱sha ju̱ní̱ najanamuyi. Émkaka Shiir Tesamua nui̱ṉkia shirikip ekentai̱ tsáapin awajtai̱sha tura awa̱tai̱niam Yus iiji̱a̱i̱ pujawai tama paṉsha awamniuyayi.

³ Nuyá̱ tarach ejamu á̱a̱wini̱ṉkia Tí Shiir Tesamu ámiayi.

⁴ Nui̱ kuṉkuin áestutai̱sha núnisaṉ Yus Aentsja̱i̱ Chícham Najanamu Eṉketai̱sha takamtsuk kurimpramu pujuarmiayi. Kame nú eṉketai̱niam init piniṉ kúriji̱a̱i̱ najanamunam maná yurumak eṉkeamu tura Arauna wai̱ri̱ je̱e̱rmia nusha núnisaṉ jimiará kaya pakanam Akupkámu Chicham Yus áarmasha nui̱ eṉkemármiayi.

⁵ Kame Yusa winchari̱n nakumainia nú kirupín nui̱ pátatek wajasar Tunaan Akikmatrukmatai Tsaṉkurnatai̱ ni nanape̱ja̱i̱ nukuarmiayi. Túrasha nu yamaikia tímiatrusar jintiarar áujmattsachminiaiti.

⁶ Núnis aa asamtai Shiir Tesamunam ashí Yúsnan pujurin tuke wainiak Yúsnan takasarmiayi.

⁷ Tura Imiá Shiir Tesamunmaṉka aya Yúsnan pujurniu uuntri̱ wá̱i̱niuyayi. Tura nisha ashí uwitin aya chikichik tsawant wá̱i̱niuyayi. Waya̱k ni yajauchiri̱ncha tura ashí shuara yajauchiri̱ncha tsaṉkurnarat tusa taṉkú numpe̱n Yus súsatniuya nuna juu wémiayi.

⁸ Núja̱i̱ṉkia Yusa Wakaní̱ ju̱na paant ujakúyayi. Yus Shiir Awajtai̱ Je̱a̱ tuke pujakui ashí aents Imiá Shiir Tesamunam waya̱tniun tujintkiarmiayi.

⁹ Nusha yamái pujuiniajⁱ nuna enentáimtikrampratniuitji. Shuar Yus shiir enentáimtikratniun taṉkun maa suíniaksha nu shuar ni yajauch túrutairi̱ji̱a̱i̱ tuke itit enentáimtumarmiayi.

¹⁰ Warí aya yurumátniusha umartincha nijiartincha tura ashí núnisaṉ túratniuja̱i̱ aya pátatek ásarmatai enentáiniam írunna nuna iwiarachmin áiniawai. Antsu Yus nú túratniunka yapaji̱átniuyayi. Tuma asamtai yapajniátsa̱i̱ṉ túratin ármiayi.

¹¹ Antsu Krístuka Yúsnan pujurniu uuntri̱ asa Yúsnan takastinian pujurniuiti. Yusa Uunt Je̱e̱n tí uuntan tura tí peṉkera nui̱ṉ waya̱iti. Nu je̱a̱ aents najanachmauyayi tura nuṉkaya̱ najanawarmia núja̱i̱sha naṉkaamas tí péṉkeraiti. Kame ju̱ nuṉkanmaya̱nchuiti.

¹² Tura Kristu Imiá Shiir Tesamunam chipiu áishmaṉ tura waaka yamatskama numpe̱ja̱i̱sha waya̱chuiti antsu ímia ni numpe̱ja̱i̱ṉᵏⁱ waya̱iti. Tura aya chikichkí wayá̱ ii yajauch túrutairi̱n asaktúrmar iniaṉnatsuk uwemtikrampramiaji.

¹³ Nekas taṉkú numpe̱sha tura áesamu yuṉkunmiri̱sha shuara yajauchiri̱n aya pátatek ukatkámu aya pátatek shiir awajsámniuyi.

¹⁴ Antsu Kristu peṉké tunaarinchaitiat tuke jáchatai Wakaní̱ kakarmari̱ji̱a̱i̱ jákatniunam Yusai̱ surumakmiayi. Tuma asamtai Kristu numpé̱ ii yajauchiri̱n peṉké asakáru asamtai yamaikia ii tunaarí̱ jákatniunam júana nuja̱i̱ itit enentáimtumatsuk nekas iwiaaku Yus ¿shiir umirkachminkiaitiajⁱ?

¹⁵ Nu asamtai Jesukrístu yamaram chichaman shiir takarniuiti. Yaunchu chichamja̱i̱ yajauch túramu nekas tsaṉkurachma asamtai Kristu jaka nu tunaancha tsaṉkurarmiayi. Nuja̱i̱ ashí Yus shuarti Yus achikma asar Yus tsaṉkatramajnia nu wáinkiar tuke wararsattaji.

^16-17 Shuar ni kuítri̱n akantratak chichaman najanatniuiti. Tura jáatsa̱i̱ṉ nu kuit akantrashtiniaiti. Aya ni jakamtai nu chicham najanamu uminkiatniuiti.

¹⁸ Nu asamtai emka chicham Muisaisja̱i̱ najanamusha maamu numpé̱ ukatramuja̱i̱ akupkámuyayi. Núja̱i̱sha taṉkun mátniuyayi.

¹⁹ Muisais nu akupkámun ashí shuaran ujakármiayi. Nuyá̱ ure kapa̱a̱kuja̱i̱ tura isupu nupa̱ja̱i̱sha taṉkú numpé̱ entsaja̱i̱ pachimiar aya̱k akupkámu papincha ashí shuarnasha tsakiṉmatkarmiayi.

²⁰ Tura tiármiayi “Ju̱ numpaja̱i̱ Chícham Yus akuptúrmarmena nu nekas umiktiniaiti tawai.” Jiin. 24:8; Muis. 29:12-13; Mat. 26:28

²¹ Nuyá̱ nu numpaja̱i̱ Yus Shiir Awajtai̱ jutai̱ Je̱e̱ncha ashí nui̱ takastin irunmia nunasha ukatkarmiayi.

²² Nu akupkámuja̱i̱ peṉké ishichik numpa ukatkachmaja̱i̱ shiir awajsámniaiti. Túmaitiat numpaja̱i̱nchuka yajauch túrutai̱ peṉké asakárchamniaiti.

Kristu jakamuja̱i̱ yajauch asakárminiaiti

²³ Tuma asamtai Muisais najanamu aya nayaimpiniam írunna nuna nakumenak taṉkú numpe̱ja̱i̱ shiir awajsatin ármiayi. Antsu nekas nayaimpiniam írunna núnaka nuna kakaram numpaja̱i̱ shiir awajsatniuyayi.

²⁴ Kame Krístuka Yusa Je̱e̱n aents najanamu nayaimpinmaya̱ṉ aya nakumea nui̱ waya̱tsuk antsu nekas nayaimpiniam Yus pujamunam wayá̱ iin áujturmaji.

²⁵ Yaunchu Yúsnan pujurniu uuntri̱ ni numpe̱ja̱i̱nchu ashí uwitin Imiá Shiir Tesamunam wa̱i̱n ármiayi. Antsu Krístuka tuke wa̱i̱ pujuchmiayi.

²⁶ Kame wa̱i̱ pujutniuitkiuiṉkia nuṉka yama naṉkammanumia̱ṉ juárkiniaitkiuṉka ataksha awaiṉki̱ ajá puju̱a̱yi. Túrasha yamaikia tunáa amukatniun nuṉka amuumam jákatniunam Krístuka chikichkí surumakuiti.

²⁷ Ashí shuarsha chikichkí jakar nuyá̱ ni túrukarman Yusai̱ nekamatin áiniawai.

²⁸ Núnisaṉ Kristu chikichkí jákatniunam surumak untsurí shuara tunaari̱n asakáruiti. Tura atakka aents yajauch túrukarman asakártinian wantinkiashtatui. Antsu ni tátintri̱n nákainia nuna uwemtikrattsa wantinkiattawai.