Isr. 7 - Yus Papí: Shuarja̱i̱ Yus Yamaram Chicham Najanamu

Mirkisetékja̱i̱ naṉkaamas Jesuska Yúsnan pujurniuiti

¹ Nu Mirkisetéksha Sarem nuṉkanam akupniuyayi. Tura naṉkamantu Yúsnan pujurniuyayi. Tura Aprajám chíkich akupniun mesetja̱i̱ awakak winiakui iṉkiuṉtajtsa jiintiuki̱ péṉker pujutnum yumiṉkramiayi.

² Túramtai Aprajám nupetmakar kuit jukimiun tias akantúk susamiayi. Mirkisetéka naari̱ tana ju̱ka “tí peṉker úunt akupin” tawai. Tura Saremka “itit awajsachma ti shiir aṉkant pujustin” tawai. Tura Mirkiseték Sarema akupniúri̱ asa “ti shiir aṉkant pujú akupin” tawai.

³ Apartincha tura nukurtincha núnisaṉ ni úuntri̱sha atsawai. Ni akiiniamuri̱ncha ni jakamuri̱ncha ujaatsui. Tuma asamtai Yusa Uchirí̱a áintsaṉ tuke iniaṉnakchatniun Yúsnan pujurin ajasuíti.

⁴ Mirkiseték nekas páantniua nu enentáimprata. Ii uuntri̱ Aprajámsha nupetmakar kuit jukimiun tias akantúk susamiayi.

⁵ Muisais akupkámuja̱i̱ Riwí weanmaya̱ Yúsnan pujurin anaikiamu áiniakuisha nisha ashí Israer shuarja̱i̱ métek Aprajám wea áiniawai. Túmaitiatar peṉké Israer shuar ni warirí̱n tias akantúk Yúsnan pujurniun suu ármiayi. Muisais tu akupkámiayi.

⁶ Túrasha Mirkiseték Riwí weachuitiatnak Aprajám tiásan akantúk nin susamiayi. Warí, Aprajáman Yus tí nukap anajmatramaitiat Mirkisetékka Aprajáman péṉker pujutnum yumiṉkramiayi.Naṉ. 14:18-20; 17:4-7; Kar. 3:16

⁷ Imiá nekas Mirkiseték Aprajáma naṉkaamas páantin asa Aprajáman shiir awajsámiayi.

⁸ Israer shuarti tias akankámun súajnia nú shuar aya aents ásar tuke pujuschamin áiniawai. Antsu Mirkiseték jakamun Yus Chicham peṉké ujaatsui.

⁹ Yamái Riwí wea shuar kuit akankámun achiktin áiniawai. Túrasha Aprajám Mirkisetékan súakui Riwí wea nuja̱i̱ susa áiniawai.

¹⁰ Aprajám wea áiniak ni aya̱shí̱a áinis enentáimtusmin áiniawai.

¹¹ Muisais akupkámunam Riwí shuarnumia̱ aya Araun wea shuar Yúsnan pujurin ármiayi. Nisha Muisais akupkámu timia nuja̱i̱ métek peṉké shuarja̱i̱ takasarmiayi. Tura Riwí shuarnumia̱ Yúsnan pujurniu takatrí̱ji̱a̱i̱ yajauchin nekas asakárminiaitkiuiṉkia Yúsnan pujurin yamarmaka Araun weachu anaikiashtin ainti. Túrasha Yus Jesusan Mirkiseték amia áinis Yúsnan pujurniun anaikiaiti. Nusha Araun weachuiti.

¹² Tura Yúsnan pujurin yapajniámtai Muisais akupkámusha yapajniátniuiti.

^13-14 Nu arantcha ii Uuntri̱ Jesukrístu Riwí shuarcha antsu Jutá shuarauyayi. Tura Muisais akupkámuja̱i̱ Jutá shuarnumia̱ Yúsnan pujurin atsutniuiti. Antsu nuna takatrí̱n peṉké túrashtiniuyi. Tuma asamtai núja̱i̱sha Muisais akupkámu yapajniátniuiti.

¹⁵ Nú paantcha awajsámniaiti. Wats Yúsnan pujurin yamarma nuka Mirkisetékja̱i̱ métekete.

¹⁶ Niṉkia Riwí shuar asa Yúsnan pujurin ajaschamiayi antsu jákashtin asa nu kakarmaja̱i̱ Yúsnan pujurin ajasmiayi.

¹⁷ Tuma asamtai ju̱na Yus Jesusan áujmatui “Mirkisetékka Yúsnan pujurin amia núnismek Amesha iniaṉnatsuk Yúsnan tuke pujurin átatme.” YKan. 110:4

¹⁸ Nuja̱i̱ yaunchu akupkámu péṉker awajsatin peṉké tujintiak japirmaiti.

¹⁹ Muisais akupkámuka shuaran péṉker awajsachminiuyayi. Antsu Yus iin ti shiir awajtámsattajnia nu nákaji. Nuja̱i̱ Yusai̱ ti shiir jeawitji.

²⁰ Nunasha Yus “nekas tajai” tusa Niṉki pachimias tumammiayi.

²¹ Riwí shuarnumia̱ Yúsnan pujurin Yusa naari̱ pachittsuk ái̱kiamu ármiayi. Antsu jú̱ Yúsnan pujurniunka Yus imia Niṉki pachimias anaikiamiayi. Tura Nin jú̱nis tímiayi “Uuntka imia Niṉki pachimias tiniu asa peṉké yapaji̱áshtatui. Nisha Mirkisetékka Yúsnan pujurin amia núnismek Amesha tuke Yúsnan pujurin átatme” YKan. 110:4 tímiayi.

²² Tuma asamtai Jesuska nekas uwemtikrattajai tusa yaunchu amia nuja̱i̱ naṉkaamas péṉker chichaman iwiarturuiti.

²³ Yaunchu Yúsnan pujurin untsurí ármiayi. Chíkich jakamtai chíkich tuke takaarmiayi.

²⁴ Antsu Jesus tuke jákashtin asa chikichan ikiurkishtatui.

²⁵ Tuma asa tuke iwiaaku pujak ni shuari̱n tuke Yusan áujtusminiaiti. Tuma asa shuar Nin enentáimtusar Yusai̱ weantkarun tuke uwemtikramniaiti.

²⁶ Tuma asa Jesus Yúsnan péṉker pujurniu uuntri̱ asa ii atsumajnia núkete nisha. Nisha ti shiir asa peṉké tunaarinchaiti. Ashí yajauchinmaya̱ kanakniuiti. Tura Yusja̱i̱ métek Uunt ajasuíti.

²⁷ Nisha yaunchu Yúsnan pujurniu uuntri̱ armia núninchaiti. Yaunchua nuka murikiun máwar ashí tsawant Yusan suu ármiayi. Nuja̱i̱ emka ni yajauchiri̱n nuyá̱ ashí shuara tunaari̱ncha asakátin ármiayi. Tura Jesuska jákatniunam chikichkí surumak ashí shuara yajauchiri̱n asakátramiayi.

²⁸ Kame Muisais akupkámu chichamka peṉké shuarnak tuke péṉkercha ai̱ṉ Yúsnan pujurniu uuntri̱ ánaiyawai. Túrasha nuna ukunam yapaji̱áchmin chichaman Yus timia nuka Ni Uchirí̱n imiá peṉker awajsamua nuna Yúsnan pujurniu uuntri̱ tuke iniaitsuk anaikiaiti.