Isr. 5 - Yus Papí: Shuarja̱i̱ Yus Yamaram Chicham Najanamu

¹ Tura Yúsnan pujurniu úuntri̱ṉkia shuar anaikiamuiti tura ni takatrí̱ jímiaraiti. Yusai̱ shuarnan chicharsatniuiti. Nuya̱sha Yus suíniamun súsatniuiti tura núnisaṉ taṉkun maa Yusan súsatniuiti shuara yajauchiri̱n asakátratniun.

² Tura Yúsnan pujurniu uuntri̱ nisha shuar asa ni tujintiamun nékak shuar nékachuncha tura waak yujainia nunasha waitnentramniaiti.

³ Tura nisha tujintia asa ni yajauchiri̱ncha chikichnaja̱i̱ métek tsaṉkurnarat tusa taṉkun maa Yusan súsatniuiti.

⁴ Shuar ni enentái̱ji̱a̱i̱ṉkia Yúsnan pujurniu uuntri̱ ajaschamniaiti. Antsu Yus nu shuaran anaikiatniuiti. Núnisaṉ Araunan anaikiamiayi.

⁵ Núniskete Krístuja̱i̱. Nisha ni enentái̱ji̱a̱i̱ Yúsnan pujurniu uuntri̱ ajaschamiayi. Antsu Yus Nin anaik nuja̱i̱ shiir awajsámiayi. Tura tímiayi “Ame winia Uchiruitme. Túmaitkiui yamaikia winia kakarmarun átakeajme.” YKan. 2:7

⁶ Tura ataksha Yus Papinium jú̱nis tawai “Mirkisetékka Yúsnan pujurin amia núnismek Amesha tuke Yúsnan pujurin átatme.” YKan. 110:4

⁷ Kristu jú̱ nuṉkanam pujak kakantar úutuk Yusan ti seamiayi. Nin jákatniunmaya̱ uwemtikramnia asamtai seamiayi. Tura Yusa wakeramuri̱n tuke enentáiji̱a̱i̱ enentáimtakui Yus anturak ti yáiṉmiayi.

⁸ Nuja̱i̱ Kristu Yusa Uchirí̱ntiat ni wáitsatniuja̱i̱ umirkatniun unuimiármiayi.

⁹ Tura imiá peṉker awajnas nekas Uwemtikin ajasmiayi. Nin enentáimtuinia nuna uwemtikiar tuke iwiaaku apujsatnium nérentin ajasmiayi.

¹⁰ Túramtai Yus Nin Yúsnan pujurniu uuntri̱ Mirkisetékja̱i̱ métek awajsámiayi.

Yusai̱ya̱ kanakip. Anearta

¹¹ Ju̱ tí nukap áujmatsatin awai. Túrasha ántichu asakrumin mash paant ujakchamniaitjiarme.

¹² Átumka yaunchu mash nekamaintrume. Túmaitiatrum ataksha yaitias Yúsnan jintintruat tusarum atsumarme. Warí kuirchia núniniaitrume. Kátsuram yútsuk muntsu muntsúatniuitrume.

¹³ Kuírchikia uwempratin chichaman áujenak péṉker unuimiainiatsui. Tiṉkiamnumia̱ ásar tujintiainiawai.

¹⁴ Apatuk kátsurman aya uunt yuámniaiti. Uunt ainia nuka péṉkernasha tura yajauchincha apatkar paant nékainiawai.