Isr. 4 - Yus Papí: Shuarja̱i̱ Yus Yamaram Chicham Najanamu

¹ Nu asamtai ii waya̱tin tsaṉkatkamu áyatar Yusja̱i̱ shiir pujustinnium páchitkiachu a̱i̱j tusar aneartiniaitji.

² Yaunchu nu shuaran ujakármia núnisaṉ iincha uwempratin chichaman ujatmákuitji. Nu shuar Yusan enentáimtutsuk antukaru ásarmatai nu chicham yáiṉcharmiayi.

³ Antsu iikia Ni chichame̱ enentáimta asar Yusja̱i̱ shiir pujustinnium nekas waya̱ji. Tura chikichan Yus tímiayi “Nu asamtai kajerkan nekas tákun ‘Wi ayampratniun amaajna nuna peṉké pachischartatui’ tímiajai” YKan. 95:11 tímiayi. Kame Yus jú̱ nuṉkan najana umik nuyá̱ shiir pujus ayampramiayi.

⁴ Yus Chichamnum ayampramun jú̱nis tawai “Yus sais tsawant takakmas nuyá̱ tsawantai̱ ayampramiayi.” Naṉ. 2:2

⁵ Tura ataksha tawai “Wiji̱a̱i̱ shiir pujustinnium wayá̱ ayamprashtatui.” YKan. 95:11

⁶ Shuar nui̱ waya̱war ayampratin tuke awai. Tura emka uwempratin Chichaman antukarmia nuka umichu ásar waya̱charmiayi.

⁷ Nu asamtai ataksha Yus waya̱tin tsawantan áaṉturmaitji. Nusha yamái tsawantaiti. Wats Israer shuar ni nuṉké̱ Yus susamunam waya̱warmiayi. Tura nuna ukunam uunt Tawit timiaja̱i̱ Yus ni chichame̱n ujatmaji “Yamaikia Yus tana nu ántakrumka nakittsuk shiir anturkatarum.” YKan. 95:7-8

⁸ Kame Jusuí Israer shuaran ni nuṉke̱e̱n awayá̱ ayamtikraitkiuiṉkia Yus ukunam ataksha tsawantan áaṉturmacha̱a̱ji.

⁹ Nuja̱i̱ páantaiti ashí Yus shuar Yusja̱i̱ shiir pujusár ayampratin tuke awai.

¹⁰ Yusja̱i̱ ayampra nu ni kakarmari̱ji̱a̱i̱ takastinian ayampraiti Yus ni takatrí̱ji̱a̱i̱ ayampramia núnisaṉ.

¹¹ Nu asamtai iisha Yusja̱i̱ shiir pujustinnium pachinkiacha̱i̱j tusar Yus shiir enentáimtusar kakaram ajastiniaitji. Israer shuar yaunchu Yus táman nakitrarua núnis ajaschatniuitji.

¹² Yusa Chichame̱ iwiaaku chichamaiti, imiá kakarmaiti. Puyá̱ mai̱ érea núniniaiti. Tuma asa shuara enentái̱n init wayá̱ ashí ni enentáimmian tura wakeramuri̱n ti paant awajtawai.

¹³ Yus najanamuka peṉké Nin u̱mprukchamniaiti. Ashí írunna nu Yus íimmianum misúa áintsaṉ paant áiniawai. Tura ii túramu ashí paant ujakártatji.

Jesus nekas Yúsnan pujurniu úuntri̱nti.

¹⁴ Jesus Yusa Uchirí̱ nekas Yúsnan pujurniu uuntri̱ ajas Yusai̱ wayá̱ íiniun chichartamji. Nu asamtai iniaitsuk tuke nekas enentáimtustiniaitji.

¹⁵ Nisha iiji̱a̱i̱ métek ashí yajauchiji̱a̱i̱ nekapsamuiti. Túrasha yajauchin peṉké túrachmiayi. Tuma asa ii tujintiaj nuna paant nékak ii itiurchatri̱n waitnentramniuitji. Tura Yúsnan pujurniu uuntri̱ asamtai

¹⁶ Yus waitneṉkratakur akupin pujutai̱niam shiir enentáiji̱a̱i̱ arantutsuk weantúktiniaitji. Tura Yus iin anenma asa waitnentramak itiurchat pujajnia nui̱ yaintmaktatji.