Isr. 1 - Yus Papí: Shuarja̱i̱ Yus Yamaram Chicham Najanamu

Yus ni Uchirí̱ji̱a̱i̱ ni chichame̱n ujatmákma

¹ Yáunchuka Yúsnan etserniuja̱i̱ chichas Yus ni enentáimmian ii úuntri̱n ujakmiayi. Tura untsurí nuṉkanmasha tura untsurí uwitincha niisháa niisháa chichas ujakmiayi.

² Kame amúamu tsawantin pujajnia ju̱i̱ṉkia Ni Uchiri̱i̱ní̱ chichartamkaitji. Tura ashí írunna nunasha Niini̱ najanka asa Ni nérentin ajasti tusa Uchirí̱n ashí súsaiti.

³ Níyaiti Yusan imiá métek nakumeana nu. Tura Níyaiti Yus naṉkaamas shiira nuna paant awajeana nu. Nisha aya ni chichame̱ja̱i̱ kakarma nuja̱i̱ ashí írunna nuna wáiniuk emeta pujurui. Tura ii yajauch túramuri̱n nijiatramak akupin pujutai̱nium Yusa untsuurí̱ni̱ pujusuiti.

Yusa suntari̱ji̱a̱i̱ Kristu naṉkamantuiti.

⁴ Yusa Uchirí̱ asa ni naari̱ nayaimpinmaya̱ suntarja̱i̱ imiá naṉkamantu awajnásuiti. Tura tí naṉkamantu asamtai Yus nayaimpinmaya̱ suntarja̱i̱ tí naṉkaamas Nin ti shiir awajtawai.

⁵ Wátsek nayaimpinmaya̱ suntaran chikichkinkesha ju̱na tútsuk Krístun tímiayi. “Ame winia Uchiruitme. Túmaitkiui yamaikia winia iwiaakmarun súsaitjiame.” YKan. 2:7 Tura núnisaṉ tímiayi “Wi ni aparí̱ átatjai tura Ni winia uchir átatui.” 2 Sam. 7:14

⁶ Tura jú̱ nuṉkanam ni Iwia̱i̱ri̱n akupeak tímiayi “Ashí Yusa suntari̱ tikishmátrarti.” YKan. 97:7; 1 Pit. 3:22

⁷ Nayaimpinmaya̱ suntarnan jú̱nis chicharui “Nayaimpinmaya̱ suntari̱n takartursarat tusa násea áintsaṉ awajsaiti. Ni suntari̱n charpia áinis akupeawai.” YKan. 104:4

⁸ Antsu ni Uchirí̱niun tímiayi “Ame, Yusá, tuke amutsuk akupniuitme. Ame akuptáirmesha aya péṉkeraiti.

⁹ Péṉkera nu anenaitme tura yajauchia nu muí̱jniuitme. YKan. 45:6-7 Tuma asakmin Yus, ame Yúsrum ame írutramuram ainia nuja̱i̱ naṉkaamas waratai̱ asuitiji̱a̱i̱ anaitiamkaiti.” Isa. 61:1,3

¹⁰ Nu arantcha tawai “Uuntá, yámankamtaik Ame ju̱ nuṉka najanamiame. Túram ame uwejmiji̱a̱i̱ nayaimpisha najanaitme. YKan. 102:25

¹¹ Nusha mai̱ amuukarmataisha Ame tuke pujutniuitme. YKan. 102:26 Tarachji̱a̱i̱ métek mamurartatui. Isa. 50:9

¹² Tura ipijram ikiustatme. Pushiya áintsam yapaji̱áttame. Túrasha Ámeka núnismek átatme. Játsuk tuke pujuttame.” YKan. 102:25-27

¹³ Ataksha tímiayi “Akupin pujutai̱nium winia untsuurui̱ni̱ pujusam nákarsata. Ame nemasrumin nupetkan ámin umirtamkarti tusan amastatjai.” YKan. 110:1 Núnisaṉ nayaimpinmaya̱ suntaran peṉké tíchamiayi.

¹⁴ Antsu Yusa suntari̱ wakan áiniak ashí shuar uwemprartatna nuna yaiṉkiarat tusar Yus akupkámu áiniawai.