Isk. 6 - Yus Papí: Shuarja̱i̱ Yus Yamaram Chicham Najanamu

Israernum naint írunu urukawartata nu étserma

^1-7 Uunt Yus iniaktus chichaak “Jú̱nisam titiá” tutai Isekiár chichaak “Israernum naint írunearmena nu Uunt Yusa chichame̱ antuktarum Uunt Yus chichaak ‘Náintirmesha muratirmesha ashintsatirmesha tura paka tépakutirmesha nekaatarum. Wiki puya̱ja̱i̱ emeskattajrume. Najankamu yus enentáimtutai̱ áiniancha áestutai̱ncha emeskan aya jú̱nik awajsartatjai. Túran Israer shuara uchirí̱ kaji̱ṉkiarunka ni ántar yusri̱ nakumkar najanamu ainia nui̱ṉ tepetar amukártatjai tura ukunchínkia áestutai̱ ainia nui̱ṉ utsaṉkartatjai. Núnisaṉ matsatainia nu pépruncha emeskaran aya jú̱nik juámtikiawartatjai. Túram najanamu yus enentáimtutai̱sha meṉkakattawai. Tura nuja̱i̱ Wikia Úunt Yusaitiaj nu nekarattarme.

^8-10 Túrasha ashikia amukchartatjai. Jákacharuka chíkich nuṉkanam achikia yaruakma matsamsar ni túrawarman enentáimtumasar niṉki muí̱jmiamkartatui. Tura Wikia Úunt Yusaitiajna nuna nekarawartatui núnisaṉ peṉké ántrantka jú̱tikiattajrume tíchamiaj nunasha nekaawartatui.

^11-14 Uunt Yus ashí mui̱jmiai̱ áiniana nuna asutiakui chíkichkia maamu chíkichkia suṉkurja̱i̱ tura chíkichkia tsukaja̱i̱ kaji̱nkiartatui. Paant pujuiniaka suṉkurja̱i̱ tura tíjiu̱ch pujuiniaka maamu ártatui nuyá̱ tenta matsamtuka eṉkeamuka tsukái jákartatui. Nu ashí naṉkaamasmatai Winia kajekmar naṉkaamastatui. Tura najanamu yus enentáimtutai̱ nainnium tura naintiar naintranmasha jákaru tepetar ajainiakui Wikia Úunt Yusaitiajna nuna nekarawartatui. Túran nuṉka kampuntin atsú tépakua nuyá̱ juárkiniak Tiprat nuṉka tímianai ashí amukáran aya jú̱nik júamtikiamtai Wikia Úunt Yusaitiajna nuna paant nekarawartatui’ tawai Uunt Yus” tímiayi.