Isk. 5 - Yus Papí: Shuarja̱i̱ Yus Yamaram Chicham Najanamu

Isekiára intiashí̱sha susuri̱ji̱a̱i̱ awasamu

¹ Uunt Yus chichartak “Yamaikia aentsu uchiri̱yá, susu tsupitiai̱ péṉker atsakamu achikiam intiashmísha núnisaṉ susurmesha awá awasam kijin nekapmatai̱ achikiam ame intiashim nekapmam menaint akantrata.

² Tura péprun téntakar matsamtúkar umíamu tsawantinkia intiash menaint akantrámua nu chikichik akankámu achikiam pepru ajapéri̱n áesata. Nuyá̱ chíkich akankámuka puya̱ja̱i̱ awatkim pepru a̱a̱ri̱ téntakta. Tura chíkich akankámuka nasenam naṉkimiam tsakiṉmakta. Túrawakmin nuna úkuri̱ṉ puya̱ja̱i̱ iwiarnatrattajai.

³ Túrattam nuyá̱ intiash ishichik achikiam ame pushirmi tsakari̱n jiṉkiata.

⁴ Tura nuya̱ṉ ishichik intiash achikiam jinium apeam áesata. Tura nu keak Israer shuarnaka ashí amuktatui.

⁵ Nuyá̱ Uunt Yus ashí aentsu Uuntri̱ jú̱nis tíniuiti ‘Ju̱ka ashí nuṉka ajapéri̱ atí tusan tura pepru ayamach írunna nui̱ ajapén Wi apujsamiaj nú Jerusaréṉkaiti.

⁶ Tura nisha Wi akupkámun umiktinian peṉké nakitra asa chíkich nuṉka áiniana núja̱i̱sha naṉkaamas sumamaiti. Núnisaṉ Wi akupkámu umiktin chichaman umikcharu ásar nui̱ ayamach matsatainiana núja̱i̱sha naṉkaamas umichu áiniawai.’

⁷ Tuma asamtai Uunt Yus ashí aentsu Uuntri̱ ju̱na tíniuiti ‘Atumíin ayamach aents matsatainiana núja̱i̱sha naṉkaamas yajauch átumka túraitrume. Nu arantcha Wi akupkámusha peṉké umichuitrume. Warí, nu arant aents atumín ayamach matsatainia nuna túrutairi̱ akupkámuksha peṉké umikchaitrume.’

⁸ Tuma asamtai Uunt Yus ashí aentsu Uuntri̱ ju̱na tawai ‘Wisha núnisnak Jerusaréṉká ámin kajerkattajme tura chíkich nuṉkanmaya̱ aents iimiainiamunmaṉ asutiáttajme.

⁹ Átum tí yajauch mui̱jmiai̱ tura asakrumin yáunchusha túrushtai̱n tura ukunmasha núninkia peṉké túrunashtinian atumín yamaikia túrattajai.

¹⁰ Tuma asamtai apasha uchirí̱n yuáwartatui tura uchisha aparí̱n yuáwartatui. Tura nekasa nuja̱i̱ métek túrakun iwiaaku juákarua nunasha tsakiṉmakartatjai.’

¹¹ Tuma asamtai Uunt Yus ashí aentsu Uuntri̱ chichaak ‘Wikia nekas Iwiaakuitjiai túrasha atumí yusri̱ najankamu mui̱jmiai̱ ainia nuja̱i̱ Winia Je̱a̱r mui̱jmiai̱ awajtúrsa asakrumin Wisha atumniaka peṉké waitnentsuk emeskan amuktatjarme.

¹² Tuma asamtai atumíya̱ menaintiú akankámua nuyá̱ chikichík akankámuk suṉkurja̱i̱ tura tsukaja̱i̱sha jákartatui. Tura chíkich akankámu ártatna nuka ni nemasri̱ téntakar matsamtiartatna nui̱ṉ máwartatui. Nuyá̱ amúamu akankámu ainia núnaka Wikia yajá tsakiṉmakaran Winia puya̱run ukuinkian apapékartatjai.

¹³ Nu túruna naṉkaamasmatai Winia kajekmar amukáttawai tura Winia kajetair nekanati tusan ni yajauch túramuja̱i̱ métek asutiáwartatjai. Nuna túran Wikia suíran mikirtatjai. Antsu nu ashí uminkiamtai Wi Uunt Yus tunaaja̱i̱ matsamsara̱i̱ tusan tí akasma asan túramaj nuna paant nekaawartatui.

¹⁴ Núnisnak emeskan peṉké atsá awajsattajme. Túrunawakmin aents atumín tíjiu̱ch pujuinia nu naṉkatamainiak wáinkiar wishiktai̱ awajsattajme.

¹⁵ Wi Uunt Yus asan ju̱na tajai, Wi kajekan asutián ashí emeskamajrumna nuna pachittsar aents atumíin ayamach matsatainia nu átumka katsektai̱ tura áujmattsar wishiktai̱ núnisrik atumsha aneartarum tutai nuyá̱ nu enentáimtusrikia sapijmiatai ajastatrume.

¹⁶ Tura naṉki ekenkamu tsuumai̱ winianá núnisnak atumín tsukaja̱i̱ emeskan asutiáttajrume. Atumín emeskattsan ti tsukamtikiattajrume nuya̱ṉka atumí yúatniuri̱sha peṉké atsuttawai.

¹⁷ Atumniaka tsukan tura yajasma yukartin ainia nuna akuptúktatjarme tura atumí uchirí̱n atantramkittiarme. Nuyá̱ suṉkurnasha tura puya̱ja̱i̱ mantamnatniuncha itiartiatjarme.’ Wi Uunt Yus asan nekas tajai” tímiayi.