Isk. 47 - Yus Papí: Shuarja̱i̱ Yus Yamaram Chicham Najanamu

Yusa Uunt Je̱e̱ya̱ entsa jiinmia nu

¹ Nuiṉkia Yusa Uunt Je̱e̱ wá̱i̱ti̱a̱i̱ri̱n awaṉtukmiai. Nui̱ Yusa Uunt Je̱e̱ á̱a̱ri̱ṉkia etsa̱ tatainmaani̱ aa asamtai Yusa Uunt Je̱e̱n waya̱kur wá̱i̱ti̱a̱i̱ri̱ wakenmari̱ya̱ entsa jiini̱ etsa̱ tatainmaani̱ akaimiai. Kame Yusa Uunt Je̱e̱ nuṉkaani̱ yantam jíiniuk éntsaka Yus áestutai̱ nuṉkaani̱ yantamén naṉkaamamai.

² Nuya̱ṉka Yusa Uunt Je̱e̱ arakaani̱ jintiai̱ jintianmaani̱ jurukí̱ ji̱i̱rkimiai tura ipijtiúki̱ Etsa̱ Tatainmaani̱ waiti á̱a̱ri̱ni̱ itiarmiai. Nui̱ nuṉkaani̱ yantamén entsa jiinmiai.

³ Tura nui̱ áishmaṉ etsa̱ tatainmaani̱ nekapkan takaku jiinkimiai tura kiniantu mitru nekapmamtai entsá wanusrua a̱i̱ṉ amumtikrua ikiantukmiai.

⁴ Nuyá̱ ataksha kiniantu mitru nekapmamtai entsa tikishrua imia amutamai. Tura ataksha kiniantu mitru nekapmamai nuiṉkia entsa emenmamkarua imiai amutamai.

⁵ Núnisaṉ chíkich kiniantu mitru nekapmamtai entsa tí nujaṉkrua wajaar katiṉchamnia, antsu aya yukuakar katiṉmin ajasmai.

⁶ Nuya̱ṉka chichartak “Aentsu uchiri̱yá, ame wainkiam nu ¿nekaamek?” turutmiai. Nuyá̱ jurukí̱ ataksha entsá yantam awaṉtukmiai.

⁷ Nui̱ waketkin entsá mai̱ yantamén numi untsurí irunmia nuna wainkiamjai.

⁸ Nuyá̱ chichartak “Jú̱ entsaka etsa̱ tatainmaani̱ akawai tura Arapánam jeá nuyá̱ jeakú nayantsanam ama̱a̱ entsan tsuwawai.

⁹ Tuma asamtai ju̱ entsa tui̱ jeá nui̱ṉkia ashí yajasma ainia nu pujusártatui. Núnisaṉ ju̱ entsa ímianai amamá tsuármatai tí untsurí namak pampaṉkartatui.

¹⁰ Enketinmaya̱ juárkiar Enekráimia ímianai namakan achin ártatui nui̱sha ni nekarí̱ncha u̱ju̱jiártatui. Tura nui̱ṉkia náṉkamas namak nayantsanam irunainiana ímiainisaṉ iruniartatui.

¹¹ Antsu kuchá kucharmatka tura antumiaṉkri̱ntin ainia nui̱ṉkia entsa tsuárchamu ásar wee juaku ártatui.

¹² Nui̱ṉkia entsá mái̱ yantamén yutai̱ numi tsapakartatui. Tura ni nuke̱sha kaar peṉké kakechu ártatui, nerektinniasha peṉké taamcha ártatui. Ashí nantutin nerek tsamáa wajáu ártatui. Nuka entsa Yusa Uunt Je̱e̱ya̱ jiinkí̱ ukatma asa túmattawai. Tura nere̱ṉka yutai̱ átatui. Núnisaṉ núke̱ṉka tsuámatai ártatui.