Isk. 43 - Yus Papí: Shuarja̱i̱ Yus Yamaram Chicham Najanamu

Uunt Yusa tsáapnintri̱ Yusa Uunt Je̱e̱n wáketma

¹ Nuya̱ṉka Etsa̱ Tatainmaani̱ waiti amia nuní̱ jurukmiai.

² Tura Israer shuara Yusri̱ tsáapnintri̱ṉkia etsa̱ tatainmaya̱ winian wáinmiajai. Tura antursamsha entsa nujaṉkruk téter ajana tímiatrus ajamai tura nuṉkancha ni tsáapnintri̱ji̱a̱i̱ tsáapin awajmiai.

³ Kame pepru emesrataj tusa tarinian ímiaja̱i̱k wainkiamaj nusha nuyá̱ Képar entsanam ímiaja̱i̱k wainkiamaj núnisnak ju̱na ímiaja̱i̱k wáinmancha métek wainkiamjai. Túran wisha tikishmaran tsuntsumamjai.

⁴ Tura Uunt Yusa tsáapnintri̱ Yusa Uunt Je̱e̱n etsa̱ tatai wáitiri̱ni̱ waya̱mtai

⁵ nuya̱ṉka Yusa Wakaní̱ awajtúki̱ init iruntai̱niam jurukmiai. Nui̱ṉkia Uunt Yusa tsáapnintri̱ Yusa Uunt Je̱e̱n piákuyi.

⁶ Tura áishmaṉsha wi wajamunam ayaam wajái̱ Yusa Uunt Je̱e̱ya̱ chíkich chichamun antukmajai.

⁷ Nisha chichartak “Aentsu uchiri̱yá, wi wajajna ju̱i̱ṉkia winia uunt pujutái̱ruiti. Tuma asamtai Israer shuar pujuinia nui̱ tarimian tuke pujustatjai. Nuya̱ṉka Israer shuarka ímia nisha tura ni akupniúri̱sha yamái túruinia núnisarka túrachartatui. Warí, ni najankamu yusri̱ ni akupniúri̱ji̱a̱i̱ métek jákarun untsurí naint ainia nui̱ enentáimtuiniak tsanirmatniua núniniawai.

⁸ Tura nú arantcha nuna je̱e̱ncha Winia Je̱a̱rui̱ ápatnik ni wáitiri̱ Winia Wáitirja̱i̱ tura ni pauri̱ Winia paurja̱i̱ ayamach je̱a̱mkarmatai aya tanishja̱i̱ṉ tesamu áiniawai. Nuna túruiniak ni mui̱jmiai̱ri̱ji̱a̱i̱ Winia tunaarincha Náarun yajauch awajsarmatai ti kajerkaran amukármajai.

⁹ Tura yamaikia ni najankamu yusri̱ ni akupniúri̱ji̱a̱i̱ métek jákaru ainia nuja̱i̱ tsanirmatairi̱ncha iniaisarti. Túrawarmatai Wikia niin tuke pujursartatjai.

¹⁰ Tuma asamtai aentsu uchiri̱yá, ámeka Yusa Uunt Je̱e̱ je̱a̱mtin nakumkamu wainkiam nuka nekapmamuri̱ji̱a̱i̱ métek je̱a̱mtin nakumkamun Israer shuar iisar nekaama ni tunaari̱n natsa̱a̱rarat tusam paant ujakárta.

¹¹ Tura nuní̱ túram ni yajauch túrutairi̱n enentáimtusar natsa̱a̱rarmatai Yusa Je̱e̱ je̱a̱mtin nakumkamua nu tura itiur je̱a̱mnatta núnisaṉ ni wá̱i̱ti̱a̱i̱ri̱sha, jintiai̱ri̱sha ashí uruku ártata nu ashí ujakáram enentáimtikrarta. Nuyá̱ akupkámu umiktin chicham nisha iimiainiai̱ṉ áatraram itiur túrawartata nusha ashí jintintrarta. Kame núnaka nisha ashí péṉker nekaawar tímianuja̱i̱ métek takasarmi tusam túrata.

¹² Ju̱i̱ti Yusa Uunt Je̱e̱ naintia pakari̱n je̱a̱mnatin jintíamu tura ashí ju̱na yantampri̱ṉkia peṉké shiir átatui. Tuma asa Yusa Uunt Je̱e̱ je̱a̱mtin jintíamu jú̱nisaiti” tímiayi Yus.