Isk. 4 - Yus Papí: Shuarja̱i̱ Yus Yamaram Chicham Najanamu

Jerusaréṉ jú̱niktatui tusar nakumkamu

^1-3 Aentsu uchiri̱yá nuwe pakamámu achikiam Jerusaréṉ pepru nakumkam meset jurusar tarir mánaiktaj tusar matsamtúkar warí itiurtain nu najatkam ashí téntakta. Tura namincha jiru pakamámu achikiam jiruja̱i̱ wénuimiua nútisam ámiji̱a̱i̱ pepru ana nui̱ ajapén ikiusta túram ámeka nu ii pujutá. Kame ame túram nuka Israer shuar túrunawartatna nu nakumkattame.

^4-8 Nuya̱ṉka traisiantu nuwintia tsawant menaarmini̱ iniantasam tepestatme nu chikichik tsawantka Israer shuar chikichik uwí yajauch túramun nakumui. Tura umikiam untsuurumini̱ iniantasam kuaraintia tsawant tepestatme. Nusha Jutá shuar timianú uwí yajauch túrawaru asamtai chikichík tsawant chikichík uwin nakumu asamtai nuka túrattame. Timianú tsawant umimiám muchitki̱a̱i̱m tusan Wi jiṉkiaran wainkiattajme. Nuya̱ṉka Jerusaréṉ nakumkamua nuní̱ íimsam uwejém takuim Jerusaréṉ jú̱niktatui tusam etserkattame.

^9-13 Túram tríkiuja̱i̱ paṉ najankam ichiṉnanam chumpíata tepestatmena nu umimiám yuámnium. Chikichík tsawantin painti sikru jeá yuáttame. Tura entsasha nekapmasma umittiame. Kame paṉka aentsú iji̱n ji ikiapáram iniaram yútatme tímiayi Uunt Yus. Nu arantcha Uunt Yus chichaak “Chíkich nuṉkanam pujusártatna nui̱ nuja̱i̱ métek paṉ surimkiámun mui̱jmiai̱ ajakarun Israer shuar yuáwartatui” tímiayi.

¹⁴ Túrutkui Uunt Yusan chicharkun “Wikia uchinmaya̱n wariṉkísha yajauchin yúakun surimkiámun mui̱jmiai̱ ajatsuk tsakaruitjiai. Túmaitiatnasha ¿urukamtai túrattaj?” tímiajai.

^15-17 Nuya̱ṉka Uunt Yus chichartak “Antsu aentsú ijiji̱a̱i̱ iniartsuk paṉka waaka ijiji̱a̱i̱ ikiapáram iniarkam yuátá. Túrasha Jerusaréṉnumka yurumkasha táastatui. Túmamtai yurumkancha nekapmasman kúntuts enentáimshím yuáwartatui. Tura entsancha núnisaraṉ nekapmasman sapijmiashim umarartatui. Núnaka yurumkari̱n iisar tura umutairi̱sha atsakui sapijmiakar ní yajauchiri̱ni̱ṉ kaji̱nkiar amukarat tusan túrattajai” turutmiai.