Isk. 38 - Yus Papí: Shuarja̱i̱ Yus Yamaram Chicham Najanamu

Kuk túrunatin etserkamu

¹ Nuya̱ṉka Uunt Yus winia chichartak

² “Maa aentsu uchiri̱yá, Makuk nuṉkanmaani̱ íimsam Misekan tura Tuparan akupniu uuntri̱ Kuk urukattawa nu etserkata.

³ Tura chicharkum Uunt Yus Ashí Aentsu Uuntri̱ chichaak ‘Misekan tura Tuparan akupniu uuntri̱ Kuká nekaata. Yamaikia áminkia kajerkajme.

⁴ Tuma asan Wikia jaṉke̱nam tseṉkenja̱i̱ awaṉtuktinia áitkiasan ayantran suntari̱ntiuk kawairi̱ntiuk tura kawainium ekemtan unuimiátra ainia nunasha ashí iwiarmampramurtiuk ti untsurí aents tantarnasha tura ayamprumatai̱ncha núnisaṉ puya̱ncha ashí takarainian ji̱i̱raran yaruakartatjai.

⁵ Pírsiasha Itiupíasha nuyá̱ Ríwianusha niji̱a̱i̱ iruntrartatui. Núnisaṉ tantarnasha tura mesetnum etseṉkrutai̱ncha ashí takusartatui.

⁶ Tura Kúmirsha ashí ni suntari̱ji̱a̱i̱ tura Pitukárma araki̱a̱ ti jeashtanmaya̱sha ashí suntari̱ntiuk tura chikitcha untsurí nuṉkanmaya̱ ámiji̱a̱i̱ pujuartatui.

⁷ Tura ámeka ashí aents iruntrarainia nuja̱i̱ iwiarnaram aya ajasta. Túrunam nu aentsu uuntri̱ atá.

⁸ Kame ju̱ya̱ṉka núkap tsawant naṉkaamasmatai untsukma átatme. Núnisaṉ untsurí uwí naṉkaamasarmatai chíkich nuṉka mesetnumia̱ atak iwiarnarua nú nuṉkanam tátatme. Tura nú nuṉkanmaya̱ aents untsurí nuṉkanmaya̱ Israera náintri̱n yáunchuya̱ aya emestai̱ armia nui̱ ikiankamu ártatui. Tura untsurí nuṉkanmaya̱ ikiankamu ásar itiurchat enentáimtsuk ti shiir matsatainiawai.

⁹ Tura ámeka winiakum, yumi naseja̱i̱ winiana ímianikiam winittiame. Núnismek ashí ame suntarumji̱a̱i̱ núnisaṉ chíkich nuṉkanmaya̱ suntarja̱i̱ iruntrarum winiakum yuraṉkim nuṉká utsanar nukúa nútikiattame túramui Uunt Yus’ titiá” turutmiai.

¹⁰ Uunt Yus Ashí Aentsu Uuntri̱ tuke chichaki̱ wéak “Nu tsawantinkia ti yajauch túratniua nu ame enentáimin tarutrámtatui.

¹¹ Túram ‘Aents ayamprumakchamnia wenuktichu wáitirtichu tura asakmamachu aṉkant pujuinia nuja̱i̱ mániktaj’ tátsumek.

¹² Tu enentáimkium ‘Warirí̱sha atantrar kuítri̱sha kasarartai’ tátsumek. Kame nuṉka ajapa ikiukmia amia nui̱ ashí uunt mátsatkamunmaya̱ aents waketar taar matsamás yamaikia piákarai. Túrunawar waakartin ajasár matsatainiawai. Túrawarmatai ‘nuṉká ajapéri̱n pujuinia nu atantrar emeskatai’ tátsumek.

¹³ Warí, Shíwianmaya̱ tura Tetanumia̱sha núnisaṉ Társesnumia̱ sumau ainia nu tura ashí nuṉkanmaya̱ aents anintrútmasartatui. Tura chichartamainiak ‘¿Kuit yaruaktaj tusamek taum. Ata̱rma yaruaktaj tusamek ame untsuríram tí nukap irurum, tura kuitcha, kurisha, waakasha tura ni warirí̱ írunna nuna yaruakan kuítriniataj tusamek taum?’ turamiartatui.

¹⁴ Aentsu uchiri̱yá, maa yamaikia Yus Kúkan túratta nu ujakum Uunt Yus Ashí Aentsu Uuntri̱ chichartamuk ‘Nu tsawantai̱ Israer shuar Winia ainia nu itit awajsachma aṉkant ti shiir matsamsartatna nuka ¿ámeka nekashtatmek?’ túramui.

¹⁵ Nuyá̱ Uunt Yus tuke chichaki̱ wéak ‘Ámeka arakaani̱ nuṉka náṉkatkamu ame pujutái̱rmiya̱ tátatme. Ame winiakmin untsurí nuṉkanmaya̱ aents aya káwai̱ji̱a̱i̱ṉ nekapmarchamnia suntar tí untsurí ámiji̱a̱i̱ káunkartatui.

¹⁶ Túrunarum Wi shuarja̱i̱ mánaiktaj tusarum yuraṉkim nuṉká utsantra núniktatrume. Nuka amukatin tsawant jeakui túrunattawai. Kame ámin Kuká, túrattajmena nuna iisar uunt nuṉka mátsatkamu ainia nusha Wi Tunaarinchaitjiana nuna amiini̱ nekarawarat tusan Winia nuṉkar itiurchat awajka̱i̱ tusan áminkia itiattajme’ tawai” tímiayi.

Kuk asutiámu

¹⁷ Uunt Yus Ashí Aentsu Uuntri̱ jú̱nis chichaak “Winia takartin Israernumia̱ Yúsnan etserniun chicharainiakun ‘Wi aentsun itiurchat awajkartinian ikiatkartiniaitjiai’ tutai yaunchu etserkarmia nuka ¿ámechukaitiam?” tawai.

¹⁸ Uunt Yus tuke chichaki̱ wéak “Tura Kuk Israer shuaran itiurchat awajkattsa tarimtaiṉkia Uunt Yus Ashí Aentsu Uuntri̱ asan naṉkaamas kajektatjai.

¹⁹ Nu tsawantinkia Wi nekas Yúsaitjiana nuna iniaktusan tura ashí yajauchin ti kajerkan Israer nuṉkanam ti kakaram ú̱u̱rmamtikiattajai.

²⁰ Nuyá̱ nayantsanam namak írunusha tura nayaimpinmaya̱ nanamtincha ántsaṉ kampunniunmaya̱ yajasmasha nuyá̱ nuṉká japinias wekain ainia nusha núnisaṉ ashí nuṉkanam aents matsatainia nusha Winia ashampruiniak kurainiak tákeer ajartatui. Naint ainia nusha metsaṉkrukartatui. Kaya sáisaintiak ainia nusha yumpuntrar kakerartatui tura kayá tánishsha ashí sanakiartatui.

²¹ Winia ashí náintiur áiniana nui̱ Kúkan itiurchat awajsarat tusan puya̱n untsurkartatjai tawai Uunt Yus Ashí Aentsu Uuntri̱. Túramu ásar nuamtak mai̱ maanai ajartatui.

²² Túran suṉkurja̱i̱ núnisnak mantamnatniuja̱i̱ ni túrawarua nuja̱i̱ métek ninkia asutiáwartatjai. Kame nincha núnisnak ni suntari̱ncha tura untsurí nuṉkanmaya̱ aents niji̱a̱i̱ pujuinia nui̱sha naṉkaamas yútumtikiattajai. Tura micha kaya najanakarusha tura jisha nuyá̱ asuprisha kakekartatui.

²³ Nuní̱ túran untsurí aentsun Wi Tujintkiachu tura Tunaarinchaitjiana nuna iniaktusartatjai. Nuna túramtai Wi Uunt Yusaitjiana nuna nekaawartatui” tímiayi.