Isk. 37 - Yus Papí: Shuarja̱i̱ Yus Yamaram Chicham Najanamu

Ukunch káararu iwiaaku ajasárma

¹ Uunt Yusa kakarmari̱ winí̱ wayá̱ nuṉka pakanam aentsu ukunchí̱ tsakiṉmakar tepet tepet ajainiamunam ajapén Uunt Yusa Wakaní̱ jurukí̱ awajtúsmai.

² Tura ukunch matsatmanum nuke ayamach iniaṉkatkimiai tura nusha tí káakaru núnisaṉ pakanam tí untsurí irunmiai.

³ Tura chichartak “Maa, aentsu uchiri̱yá ¿ju̱ ukunch ataksha iwiaaku ajasárminkiait?” turutmiai. Nuna túrutkui wi ayakun “Maa, Uunt Yusru, aya Amek nuka nékame” tímiajai.

⁴ Nuyá̱ Uunt Yus chichartak “Winia naar pachisam jú̱ ukunch chicharainiakum ‘Ukunch káakaru árumna nútiram Uunt Yusa chichame̱ antuktarum.’

⁵ Uunt Yus Ashí Aentsu Uuntri̱ jú̱ ukunchi̱n chicharainiak ‘Iwiaaku pujutai̱ wakaní̱n atumín eṉketáttajrume túram iwiaaku ajastatrume túramprume.

⁶ Túran ya̱a̱pe̱ncha aya̱shi̱ncha susattajrume nuyá̱ nuape̱ja̱i̱ aya̱shi̱n nukurkartatjai túran iwiaaku wakaní̱n eṉketáttajrume. Tura iwiaaku pujusrum Wi Úunt Yusaitjiana nu nekaattarme túramui’ titiá” turutmiai.

⁷ Uunt Yus núnisam titiá túrutkui wisha núnisnak tímiajai. Tura nuna tú wajai̱ṉ téter ajakí̱ ú̱u̱rkamai. Túrunamtai ukunch tsakiṉmakar tepet tepet ajarma nusha íkiararmai.

⁸ Tura ukunch tepetar ajainiayat ya̱a̱prurar tura aya̱shtin ajasár nuáptin ajainian wáinmiajai túrasha wakaní̱ atsakui iwiaakcha armai.

⁹ Nuyá̱ chichartak “Aentsu uchiri̱yá, iwiaaku mayái̱ untsukaram chicharainiakum ‘Uunt Yus Ashí Aentsu Uuntri̱ chichaak “Wakaní̱ mayái̱ tatai arakaani̱ tura nuṉkaani̱ núnisaṉ etsa̱ tatainmaani̱ nuyá̱ etsa̱ akatainmaani̱ ainia nuyá̱ táarum aya̱sh jákaru ainia nu eṉkemtuatarum iwiaaku ajasarat” túramprume’ tiartá” turutmiai.

¹⁰ Nuyá̱ Uunt Yus titiá turutmia núnisnak tímiajai. Nuna takui̱ wakan taar aya̱shí̱n eṉkemtuawarmai. Túram iwiaaku ajasár wajakiarmai túrasha nekapmarchamnia tí untsurí suntar armai.

¹¹ Nuyá̱ Uunt Yus chichartak “Maa, aentsu uchiri̱yá, ju̱ ukunchkia ashí Israer shuara núnis áiniawai. Nisha chichainiak ‘Ii ukunchí̱ṉkia káakarai. Tuma asar iikia peṉké antrar ajasáruitji. Warí, ashí emeskachmakaitiajⁱ’ tuíniawai” turutmiai.

¹² Nuya̱sha chicharainiakum Uunt Yus Ashí Aentsu Uuntri̱ chichaak “Wí shuartiram nekaatarum, atumí iwiarsamuri̱ya̱ ashiin jusattajrume. Túran Israer shuara nuṉke̱n awaiṉkin ikiankattajrume.

¹³ Wi shuará, atumí iwiarsamuri̱ya̱ urain jusattajrumna nui̱ Wikia Úunt Yusaitjiana nusha nekaattarme.

¹⁴ Winia wakantrun atumí eṉketáttajrume túran ataksha iwiaaku awajsattajrume. Tura atumí nuṉke̱ni̱ṉ matsastatjarme. Nui̱ṉkia Wi Uunt Yus tiniu asan túraitiajna nu nekaattarme” tawai Uunt Yus.

Jutaja̱i̱ tura Israer ataksha iruntratin

¹⁵ Nuyá̱ Uunt Yus winia chichartak

¹⁶ “Maa, aentsu uchiri̱yá, numi achikiam ju̱ka Jutanuiti tura Israer shuara uchirí̱ Jutaja̱i̱ pujuinia núnaiti tusam nú numinmaṉka aartá. Núnismek chíkich numisha achikiam ju̱ka Eprainkia wái̱ri̱niuiti Jusenu tura ashí Israer shuar Eprainji̱a̱i̱ pujuinia núnaiti tusam chíkich numinmaṉka aartá.

¹⁷ Nuya̱ṉka nú numi apatkam chikichik awajsata túram chíkichkia nútikiam takustatme.

¹⁸ Nuyá̱ amé shuara uchirí̱ chichartamainiak ‘Ame áitkiamna nusha ¿warinia nakumea nuka etserkashtatmek?’ turamainiakuiṉkia

¹⁹ chicharainiakum ‘Kame Uunt Yus Ashí Aentsu Uuntri̱ chichaak “Jusé wai̱ri̱ Eprainkia uwejé̱n tura ashí Israer shuarnum ana nú numin achikian Jutá shuara numiri̱ji̱a̱i̱ apatkan chikichik awajsattajai. Túran chíkichkia nútiksan takustatjai” tawai Uunt Yus’ tiartá.

²⁰ Kame numi aarma ainia nuka ashí iimiainiamunam paant takustatme.

²¹ Tura chicharainiakum ‘Uunt Yus Ashí Aentsu Uuntri̱ chichaak “Yamaikia Israer shuaran yajá nuṉkanam tsakiṉmakarun ataksha awakearan ni nuṉke̱ni̱ṉ ikiankartatjai” tíniuiti Uunt Yus’ titiá.

²² Núnisnak Israer shuarnaka ni náintri̱ni̱ṉ tura ni nuṉke̱ni̱ṉ chikichik nuṉkak awajsaran chikichik akupniuk awajtúsartatjai. Tura atakka kanakar jimiará nuṉka ajasár akupniúrtinkia ajaschartatui.

²³ Nu arantka ni ántar yusri̱ ainia núja̱i̱ṉkia mui̱jmiainkia ajaschartatui, kajenka umichuka áchartatui. Tura ni umichu ajasár kajen ajasár tunáa túrawarmia núnaka asaktúraran péṉker awajsartatjai. Nuiṉkia wi shuar ártatui. Núnisaṉ Wikia ni Yusri̱ átatjai.

²⁴ Nuiṉkia Winia takartin Tawitiak úunt akupin tura niṉki ashí wáinin átatui. Nuyá̱ Wi akupkámu umiktin chichamnasha uminiak péṉker túrawartatui.

²⁵ Winia takartin Jakupan nuṉkan susamiaj nui̱ matsasártatjai tura ni we̱a̱tri̱ matsamtainmaṉ pujusártatui. Nui̱ṉkia ni uchirí̱sha nuyá̱ nuna uchirí̱sha tura ashí ni shuarak nui̱ṉ tuke pujusártatui, tura Winia takartin Tawit ni úuntri̱ṉkia átatui.

²⁶ Nu arant aṉkant pujusárat tusan nu shuarja̱i̱ chichaman najanattaj nuka peṉké amukashtatui. Tura nui̱ pujusár pampaṉkarmatai ni pujuiniamunam Yus Shiir Awajtai̱ Je̱a̱run tuke nui̱ átinia nuna apujtusartatjai.

²⁷ Túran ni pujuiniamunmaani̱ pujustatjai. Wisha ni Yusri̱ átatjai tura nisha Wi shuar ártatui.

²⁸ Tura Yus Shiir Awajtai̱ Winia Je̱a̱r nui̱ tuke pujusmatai Israer shuarnaka Wi tunaari̱ncha awajáiniaj nuna chíkich nuṉkanmaya̱ aentssha nekaawartatui” tímiayi.