Isk. 36 - Yus Papí: Shuarja̱i̱ Yus Yamaram Chicham Najanamu

Yus Israeran ataksha péṉker matsasárma

²⁴ Uunt Yus chichaak “Wisha atumín chíkich nuṉkanam pujuiniatirmin ashí juuka iruran atumí nuṉke̱ni̱ṉ awakearan matsastiniaitjiarme.

²⁵ Tura péṉker entsaja̱i̱ ukatran ashí yajauchia nuyá̱ atumí tunaari̱ncha tsaṉkurattajai. Nuyá̱ najankamu yus enentáimtutai̱nmaya̱sha aṉkant awajsattajrume.

²⁶ Núnisnak atumín yamaram péṉker enentái̱mtain amasáran yamaram enentáimtairmincha ikiursattajrume. Tura péṉker enentáin amaakun katsuram enentáinkia juruktiatjarme.

²⁷ Kame átum umiktin chichaman wi akupeaj nu ímiatrusrumek umikrum wekasaku tusan Winia Wakantrun atumín ikiursattajrume.

²⁸ Tura Wi atumí we̱a̱trí̱n yaunchu nuṉkan susamiaj nui̱ pujustatrume. Atumsha wi shuar átatrume tura Wikia atumí Yusri̱ átatjai.

²⁹ Kame atumí tunaarí̱ya̱ ashí aṉkant awajsattajrume. Túran atumí tríkiuri̱ncha núkap awajtústatjarme tura atakka átum tsukamátniuṉka akuptúkchattajrume.

³⁰ Núnisnak numí nere̱ncha tura ajarmincha tí nukap neremtikiartatjai. Chíkich mátsatka ainia nu tsukamakrumin wishikramainiakui natsanmai̱ aja̱i̱rum tusan túrattajai.

³¹ Nui̱ṉkia yajauch jintianmaani̱ wekaamu tura atumí túrutairi̱ péṉkercha nusha enentáimturtatrume. Túrarum atumí tunaarí̱ tura mui̱jmiai̱ túrutai̱ armia nu atumek muí̱jkiattarme.

³² Israerá, jú̱ ti paant nekaatarum. Wi Uunt Yus Ashí Aentsu Uuntri̱ asan átum péṉker asakrumin jú̱naka jú̱tikiatsjai. Maa, Israer shuará, jú̱ nekaarum átum yajauch túramu nekamarum natsa̱a̱rum kúntuts enentáimpratarum” Yus tawai.

³³ Nuya̱ṉka Uunt Yus Ashí Aentsu Uuntri̱ chichaak “Wi atumí tunaarí̱ya̱ imiatkincha awajsartatjana nu tsawantinkia péprunmaṉka ataksha aents matsamkartatui. Núnisaṉ pepru yaunchu emeskamu ataksha iwiarnakartatui.

³⁴ Aents naṉkaamainia iisaram nuṉka ajapa ikiukmia armia nuka ataksha arakma ártatui.

³⁵ Nuna wáinkiar chichainiak ‘Nuṉka ajapamu armia nu yamaikia Eten aja núnin ajaschaik. Tura ju̱ péprusha emeskar ajapamu armia núchak yamaikia iwiarkar wénuimiunam ataksha aents matsatainia’ tiártatui.

³⁶ Tura mátsatkamu atumí téntatmakar matsatainia juákarmia nusha wi Uunt Yus asan pepru emeskamuncha iwiartukaruitjiana túran nuṉka ajapamu áiniancha aratáwaruitjiana nunasha nekaawartatui. Wi Uunt Yus tiniu asan nuna túrattajai” tíniuiti.

³⁷ Tura Ashí Uuntri̱ Uunt Yus chichaak “Israer shuar e̱a̱tkarat tusan tsaṉkatkartatjai. Túmainiakui̱ṉkia murik pampainiak urukainia núnisnak imianú untsurí awajsartatjai.

³⁸ Murik Yus susamu kame Jerusaréṉnumia̱ murik nampertin urukawa imianú untsurí aentska uunt pepru emeskamu armia nuiṉkia matsamártatui. Nuja̱i̱ Úunt Yusaitjiana nuna nekarawartatui” tímiayi.