Isk. 34 - Yus Papí: Shuarja̱i̱ Yus Yamaram Chicham Najanamu

Israer shuara wáinin ainia nu 1. Ántar wáinin ainia nu

¹ Uunt Yus winia chichartak

² “Aentsu uchiri̱yá, Israer shuar murikiun wáinin ainia nu chicharainiakum ‘Uunt Yus chichaak “Murikiu wáinin niiṉki wáinmamainiana nuka aneararti. Warí, murikiu wáinniuka murikiun wáinkiachartinkiait” túramprume’ tusam murikiu wáinin ujakárta” tawai.

³ Nuyá̱ Uunt Yus tuke chichaki̱ wéak “Átumka murikkia péṉker wáintsuk, nekas péṉker nuéram áiniana nu máarum yúakrum nuna ure̱ja̱i̱ṉkia pushí najanarum entsarme.

⁴ Tura átumka murik kakarmachu ainia nusha waitnenchaitrume núnisaṉ jaasha tsuáchuitrume. Kame murik kupiniakusha wáiniatrumek jáanchji̱a̱i̱sha penuartaj tíchaitrume. Nuyá̱ murik waakusha ni ai̱ matsatna nui̱sha awakechuitrume. Tuma asarum murik meṉkakasha e̱a̱ktaj tíchaitrume antsu nuka túrutsuk kajershím wáiniakrum kakarmaja̱i̱ nawamniuitrume.

⁵ Winia murikruka wainniuri̱ atsá ásarmatai yajá tsakiṉmakar kampunniunmaya̱ yajasma yukartin áiniana nu yuamnia ajasár yujainiawai. Warí, tsakiṉmakarusha.

⁶ Kame Winia murikruka waakaar ashí naint tura naintiar naintiar ainia nui̱sha yujainiawai. Túrunawar ashí nuṉkanmaani̱ tsakiṉmakarai. Túmainiakuisha peṉké enentáimtuiniatsui núnisaṉ nuna e̱a̱kartincha peṉké atsuiniawai.

⁷ Maa, tuma asamtai murikiu wainniu, Uunt Yusa chichame̱ antuktarum.

⁸ ‘Kame Winia murikru wainniuri̱ atsá ásarmatai kasamkamnia tura kampunniunmaya̱ yajasma yukartin áiniana nu yuamnia ajasáruiti. Túrasha Winia murikrun wáinniuka páchitsuk niṉki yurumáiniak Winia murikrunka ayuracharuiti. Nuka aneararti. Wats, Wi Uunt Yus Ashí Aentsu Úuntri̱ntjiai Wikia nekas iwiaaku pujú Yus asan tájarme.’

⁹ Maa, murikiu wáinin árumna nútirmeka Uunt Yusa chichame̱ anturkatarum.

¹⁰ Uunt Yus chichaak ‘Yamaikia murikiu wáinniun peṉké kajerkarjai túran Winia murikiur túramunmasha níniak makurartatjai. Núnisaṉ Winia murikrunka yamaikia wáinkiachartatui túramu asa murikiu yuíniak imia niṉki wáinmamkachartatui. Tura Winia murikrun yuinia ásarmatai ataṉkiártatjai tura atankímkia atakka peṉké yúachartatui’ Yus túramprume” tímiayi Isekiár.

2. Israer shuaran nekas wáinin

¹¹ Tura nekas Uunt Yus Ashí Aentsu Uuntri̱ chichaak “Ju̱ya̱ṉka Winia murikrunka e̱a̱karan Wiki waitmaktatjai.

¹² Kame murikiu péṉker wáinin ni murikrí̱n yuraṉkim utsantramunam nuyá̱ kashi ajasmánumsha tsakiṉmakarun ti enentáimtana núnisan Wisha winia murikrun ti enentáimtustatjai. Túran ashí nuṉkanam awakmamak tsakiṉmakarmia nuya̱ntka aṉkant awajsartatjai.

¹³ Tura péprunmaya̱ṉka ji̱i̱raran ashí nuṉkanmaya̱ṉ irurartatjai túran ni nuṉke̱ni̱ṉ ikiankartatjai. Tura Israernum naint írunna nui̱sha núnisaṉ ashintsanmasha nuyá̱ aents matsatainia nui̱sha péṉker wainiainiakun ayurawartatjai.

¹⁴ Tí peṉker sá̱a̱knium matsasáran ayurawartatjai tura Israernum naint tí tsakaru áiniana nui̱ ni sa̱a̱kri̱ṉkia iruniartatui. Tura Israernumka nainniumsha sa̱a̱kkia tí nukap írunu asamtai péṉker yurumáwar tí peṉker sá̱a̱kniumsha ayamprartatui.

¹⁵ Winia murikrunka Wiki wainiu asan péṉker ayamtikrartatjai. Núnis tawai Ashí Aentsu Uuntri̱ Uunt Yus.

¹⁶ Murik meṉkaka tura waaku ainia nunasha e̱a̱karan ni ai̱ matsatainia nui̱ awaiṉki̱ itiartatjai. Tura kupiniaku ainia nunasha penuarartatjai núnisnak jáiniancha ikiaká̱rartatjai. Nuyá̱ unuerma tura kakaram ainia núnaka amukártatjai” tawai Uunt Yus.

¹⁷ Tura Uunt Yus Ashí Aentsu Uuntri̱ chichaak “Winia murikiur árumna nútirmeka ju̱ nekaatarum. Wikia murik áishmaṉnaka nuamtak muriknak tura murik áishmaṉ chipiu áishmaṉja̱i̱sha ní turawaru ainia nuja̱i̱ métek akikiártatjai turamniuitrume.

¹⁸ ¿Warí, átum péṉker sa̱a̱k yúarmena nuka máakchakait? ¿Urukamtaitsuk nu arant ampiniárusha najatra ikiúarum tura núnisaṉ entsasha saawi úmayatrum utsantuarum ukusmarum?

¹⁹ ¿Tura Winia murikruka átum najatramunak yúawartata núnisaṉ entsancha átum ukusmákmanak umarartata?

²⁰ Nu asamtai Uunt Yus chichartamuk ‘Maa, nekas imia Wiki murik jaermancha tura murik watsaruncha ni túrawaru ainia nuja̱i̱ métek akikiártatjai.

²¹ Warí, átumka ashí murik pimpiráru ainia nu páemiji̱a̱i̱ tura yakaimiji̱a̱i̱sha shitiarum núnisaṉ kachurmiji̱a̱i̱sha ijiurum ji̱i̱ra yajá akuprámu tsakiṉmakaruiti.

²² Yamaikia Winia murikrunka Wi uwemtikrartatjai. Tura kasartukarti tusancha iniaisachartatjai túran murik áishmaṉnaka nuamtak muriknak ní turawaru ainia nuja̱i̱ métek akikiártatjai.

Yamaram akupeamu átatna nu

²³ Kame Winia murikru wáinkiatniunka chikichkiniak anaikian Winia takartin Tawitian apujsattajai. Tura niṉkia tí peṉker wainiainiak nú murikiu wainniuri̱ átatui. Jṉ. 10:16

²⁴ Wikia Uunt Yus asan ni Yusri̱ átatjai tura Winia takartin Tawitkia ni uuntri̱ átatui. Wi Uunt Yus asan jú̱naka tajai.’

²⁵ Tura níji̱a̱i̱ṉkia aṉkant matsamsatin chichaman najanattajai. Núnisnak yajasma emesma nuṉká írunna nunasha ashí emeṉkártatjai. Túramtaikia kampuntin atsú nuṉkanmasha itit awajsachma aṉkantniunam tí peṉker matsamsartatui tura kampunniunmasha sapijmiatsuk kániartatui.

²⁶ Kame Winia naintru yantamén nuṉka írunna nunasha tura nui̱ pujuinia nunasha péṉkernum yumiṉkrartatjai. Nuyá̱ yumisha tsawant nekapmatamua nuja̱i̱ métek yútak Winia péṉker yumiṉkruka yumi yuta ajattawai. Riw. 26:4

²⁷ Núnisaṉ numisha nereartatui tura nuṉkasha yurumkan tí peṉker sútatui. Túmakui̱ aṉkantniunam ti shiir ní nuṉke̱ni̱ṉ matsamsartatui. Tura ni wáitiamuri̱ya̱sha núnisaṉ takamtikiainia nuya̱sha aṉkant awajsaram Wikia Úunt Yusaitjiana nuna ti paant nekarawartatui.

²⁸ Túrunamtaiṉkia chíkich nuṉkanmaya̱ aents itiurchat awajtai̱ matsamin áiniayat atakka peṉké túrachma matsamsartatui. Tura yajasma yukartin ainia nusha yúchartatui. Nui̱ṉkia ti shiir aṉkant pujuiniak yaaksha awakkachma matsamsartatui.

²⁹ Tura tí peṉker páantin ajanam apujsartatjai. Túramu ásar pujuartatna nui̱ṉkia atakka tsukaikia peṉké amukachartatui. Núnisaṉ chíkich aentssha natsanmai̱ awajkur wishiktasha wishikrachmin ajasártatui.

³⁰ Kame Israer shuarka Wikia Uunt Yus ni Yusri̱ asan ni pujuiniamunam Wisha pujajna nuna tura nisha Wi shuar ainia nunasha nekamawartatui tawai Uunt Yus Ashí Aentsu Uuntri̱.

³¹ Átumka, murikru, Winia sa̱a̱krui̱ya̱ murikiuitrume. Núnisrumek átumka áentsuitrume tura Wikia atumí Yúsri̱njiai” tawai Uunt Yus Ashí Aentsu Uuntri̱.