Isk. 3 - Yus Papí: Shuarja̱i̱ Yus Yamaram Chicham Najanamu

¹ Nuya̱ṉka Yus chichartak “Ámeka aentsu uchiri̱yá papí pénuimiu wainkiamna nu yuátá. Tura jú̱ papí yuam Israer shuar werim chicharkarta” turutmiai.

² Nuya̱ṉka waṉkamtai nú papí pénuimiun ayurtuamai.

³ Tura chichartak “Ju̱ papí pénuimiu amaajna ju̱ yuam ejemaram kaka̱a̱rta” túrutkui yuan wenuruí̱ mishkia imianú yuminian nekapramjai.

⁴ Núnisaṉ chichartak “Aentsu uchiri̱yá, yamaikia Israer shuarnum weme Wi títiatjamna nu ujakárta.

⁵ Warí, yajaya̱ aentsnum niisháa chichamtin anturkarsha nekaachmin ainia nui̱ṉkia akupeatsjame antsu ame shuarumini̱ṉ Israer shuarnumaṉ akupeajme.

⁶ Untsurí pepru niisháa chichamtin anturkachmin tura chichaschamnia nuyá̱ peṉké nekaachmin ainia nui̱ṉkia akupeatsjame. Antsu Wi ámin nui̱ akupeakuiṉkia Winia chichamur etserkakmin nekas anturtamkarainti.

⁷ Túrasha Israer shuarka tútaisha peṉké anturtamkachartatui. Warí, Winia anturtuktinniasha nakitiáiniawai. Ashí Israer shuarka ántichu ajasárai tura enentáisha kaya núnin kátsuram áiniawai.

⁸ Nekaata, yamaikia ni urukua ainia núnisnak niisháa iirka kaya imianú katsuram enentáimkia ainia nuní̱ iirka amincha awajsattajme túran ame enentáimmianka níniuja̱i̱ métek ikiatsuámtikrattajme.

⁹ Wiki peṉké kayaja̱i̱ naṉkaamas tiamanti kaya imianú katsuram awajsattajme. Ámeka peṉké ashamkaip tura sapijmiatcha sapijmiakaip. Warí niṉkia ántichu asar aya kajen áiniawai” turutmiai.

¹⁰ Nu arantcha chichartak “Ámeka aentsu uchiri̱yá, ashí Winia chichamprun títiatjamna nu kuíshmiji̱a̱i̱ péṉker antukam enentáimji̱a̱i̱ nekaata.

¹¹ Amé shuar achirar yaruakma ainia nui̱ weme ámin anturtamkartatkiuisha tura anturtamkachartatkiuisha chicharainiakum ‘Uunt Yus ashí aentsu Uuntri̱ túramprume’ tiartá” turutmiai.

¹² Nuya̱ṉka Yusa kakarmari̱ awajtúkmiai tura winia ukunmarui̱ni̱ u̱u̱rua ímianu téter ajan antukmajai. Tumai̱ chichaak “Uunt Yusa winchari̱ ni pujamunmaya̱ shiir atí” timiai.

¹³ Tura téter ajama nuka aentsua nuní̱ iira nanape̱ mai̱ ántiniai̱ ajainiak túmarmai tura tenté akaṉkétai̱ niní̱ ayamach wajasar téter ajainiak tura úreawatska tumai̱ ajarmai.

¹⁴ Nuya̱ṉka Yusa kakarmari̱ achirak awajtúkmiai. Túrutamtai nu arant wikia kúntuts enentáimprayatan wakantruja̱i̱ṉkia suir enentáimpramjai. Túrasha Uunt Yuska uwejé̱ja̱i̱ kaki emettuamai.

¹⁵ Tura Képar entsa yantamén Tirapípnum Jutanmaya̱ shuar achirar ju̱ nuṉkanam jukimiu pujuarmia nui̱ jean niji̱a̱i̱ siati tsawant tákamtak tura warintiajak nunasha nékatsuk pujumjai.

Yus Isekiáran jintia íistinia núnis apujsamiayi

¹⁶ Siati tsawant amúamunam Uunt Yus winia chichartak

¹⁷ “Aentsu uchiri̱yá, Wi ámin jintia íistinia nútiksan Israer shuar wáinkiarta tusan apujsaitjiame. Kame Wi ámin títiatjamna nu antukam Israer shuarka ujatrúkartatme.

¹⁸ Tura Yusan enentáimtichu ainia nuna chicharkun ‘Nekas jakattame.’ Wi tama Yusan enentáimtichu iwiaaku pujusárat tusam anearta. Ame táchakmeka núja̱i̱nchuka ni yajauch wekaamuri̱ṉsha nékamtikiachkumka nú aentska ní yajauchiri̱ni̱ṉ jákartatui. Túrasha áminkia nu aents jakamunam Wi makuttajme.

¹⁹ Antsu ame yajauch shuara nu jintintiamaitiat nu yajauch túratniun iniaiyachkuiṉkia ni tunaarí̱i̱n jákartatui túrasha ámeka jákarmataisha aṉkant átatme.

²⁰ Núnisaṉ shuar péṉker enentáimniuitiat ni péṉker enentáimtai̱n iniais yajauchinmaani̱ wéakuiṉkia wi nin tukumkatniun apujtustatjai tura yajauchin túraṉka jakattawai. Túrasha ame ujakchamu asa ní tunaarí̱i̱n jakattawai. Kame ni péṉker túramu ainia nusha peṉké enentáimtunsashtatui túrasha ni jákatniuri̱n ámin íktustatjame.

²¹ Tura péṉker enentáimkia chicharkam tunaan túrachkuṉka ame chichammin antuku asa iwiaaku pujustatui nu túrunamtaiṉkia amesha aṉkant ajastatme” tímiayi.

Isekiár muut ajasma

²² Nuya̱ṉka Uunt Yus nui̱ṉ uwejé̱n awantrus chichartak “Yamaikia pakanam wetá nui̱ ámiji̱a̱i̱ chichastatjai” turutmiai.

²³ Túrutkui nuya̱i̱k pakanam wémajai tura nui̱ Uunt Yusa winchari̱ Képar entsa yantamén wainkiamaj núninniak nui̱sha wainkiamjai. Nuya̱ṉka tikishmaran tsuntsuman nijia̱i̱ruja̱i̱ nuṉká antiṉkian piniakum tepesmajai.

²⁴ Nuya̱ṉka Yusa kakarmari̱ eṉkempruta awajtúki̱ chichartak “Je̱e̱min waya̱m epemitia.

²⁵ Túrasha aentsu uchiri̱yá nekaata, áminkia chapikji̱a̱i̱ jiṉkiatmárartatui. Túrutmawarmatai aentsnum jíinkitniusha tujintkiattame.

²⁶ Tura ame iniaimincha kayakpátrumi̱i̱n anujtúktatjame túran muut awajsattajme. Túrunamka nú shuara chicharniuri̱ áchattame. Warí niṉkia aya kájen ántichu áiniawai.

²⁷ Túrasha Wi ámiji̱a̱i̱ chichasa umikian ataksha chichamtikiattajme nuya̱ṉka chicharainiakum ‘Jú̱naka Uunt Yus tawai.’ Ántana nuka antukti tura antuktinian nakitiakka antukchati. Warí, ju̱ aents umiktinian nakitín áiniawai” Uunt Yus turutmiai.