Isk. 20 - Yus Papí: Shuarja̱i̱ Yus Yamaram Chicham Najanamu

Israer shuar najankamu yusan enentáimtusarma

^1-9 Tura uwí siátitin nantu seṉku tura tsawantka tiástin Israer shuarnumia̱ uunt armia nu Isekiár anintrúsar Uunt Yusa chichame̱n nekaatai tusar tariarmiayi. Túrasha Uunt Yuska anintrúttsara̱i̱ṉ tusa nakitrámiayi tura chicharainiak “Wikia Israer shuaran achikiármajai núnisnak Ejiptunam pujuarma nui̱ nuna nekamtikiawarmajai. Tura Ejiptunmaya̱ṉka ji̱i̱ran tí peṉker nuṉka asa ashí árak tsapáu asamtai muntsu míshkiji̱a̱i̱ entsa núnis akamunmasha atumnia anajmarma ana nui̱ matsastatjarme tiármajai. Núnisnak chicharainiakun ‘Najankamu yus mui̱jmiai̱ ainia tí peṉker enentáimtusrum anearmena nuka utsaṉtarum túrarum Ejiptunmaya̱ ántar yus ainia nuja̱i̱ mui̱jmiai̱ ajasá̱i̱rum’ tiármajai. Túrasha Winia tumá kajertukarmai. Antsu ántar yus najankamu áiniana nunasha tura Ejiptunmaya̱ yusnasha iniaisacharmai. Nuiṉ Ejiptunmaṉ asutiátniuṉka enentáimturarmajai túrasha Wikia Ejiptunam matsatainian ji̱i̱ran yarumainiakun Wi túramun wáinkiarma nu shuar yajauch enentáimturara̱i̱ṉ tusan Wiki enentáimtumasan pachischarmajai” tímiayi.

^10-26 “Nuya̱ṉka Ejiptunam matsatainian ji̱i̱raran atsú nuṉkanam Wi ikiankarmajai. Wi akupkámu tura umiktin chichamnasha nékamtikiawarmajai tura aents nuna umíana nuka nuja̱i̱ nekas iwiaaku wekasattawai. Núnisnak ayamtai̱ tsawantnasha niji̱a̱i̱ Wi chícham najanawarma paant atí tura Wiki Uunt Yus asan tunaarincha awajeajna nunasha nekaawarti tusan túramjai. Túrasha Israer shuarka atsamunam Winia kajertukarmai. Túmainiak Wi akupkámuja̱i̱ métek wekasacharmai núnisaṉ umiktin chichamnasha nakitrarmai tura Winia ayamtai̱ tsawantruncha mui̱jmiai̱ awajkarmai. Túrasha chíkich nuṉkanmaya̱ aents iimiainiamunam kajerkaran asutiáwartaj táyatnak nuyá̱ aents yajauch enentáimturara̱i̱ṉ tusan Wiki enentáimtumasan pachischarmajai. Tura nuna uchirí̱n chicharainiakun ‘Atumí aparí̱ umirainiana nú akupkámuka átumka umikiairap. Warí Wíkichukaitiaj Uunt Yus atumí Yusri̱nkia. Átumka Wi akupkámua nuja̱i̱ métek wekasatarum’ tiármajai. Túrasha uchirí̱sha núnisaraṉ Wíniaka kajertukarmai. Kame uwejruṉka takuriariatnak Wiki enentáimtumasan pachischarmajai. Tura chicharainiakun ‘Wi akupkámu umiktin chicham umikcha asakrumin ashí nuṉkanam tsakiṉmaktatjarme’ tusan ujakármajai. Tura amukáran jú̱nik awajsartaj tuíniaknasha Wikia Úunt Yusaitiajna nunasha paant nekaawarat tusan ashí iwia̱i̱n áesainiakuisha mui̱jmiai̱ iisariatnak pachischarmajai.