Isk. 19 - Yus Papí: Shuarja̱i̱ Yus Yamaram Chicham Najanamu

Israera uuntri̱ ainia nuna Isekiár enentáimtus wáitiamu

^1-9 Yamaikia Isekiará Israer shuara uuntri̱ kúntuts enentáimtusar wáitiamu titiá tura chicharainiakum “Ame núkuka Jerusaréṉka úunt ya̱wa̱ nuwa̱ uchirí̱n matsas tsakatmainia núnisaiti túrasha chikichkiniak timiá peṉker wainkiamai. Túram tsakar namaṉken chikichnian atankitniun nekáa aentsnasha yúawarmai. Nusha ashí nuṉkanam antukamai túrasha achikiar tseṉkenja̱i̱ awaṉtukar Ejiptunam júkiarmai. Túrunamtai uchirí̱n nákas tujintiak chíkich uchirí̱n ataksha tsakatmarmai. Nisha núnisaṉ chikichnian atankitniun unuimiátar aentsun yuíniak ashí emesak nuṉkancha aya jú̱nik awajsamai. Túmakui̱ ashí aents irunturar achikiar jiru najanamunam eṉkeawar Papirúnia úunt akupniuri̱ pujamunam júkiarmai. Tura shiniamuri̱sha atakka Israernumka peṉké antukashti tusar sepunam eṉkeawarmai.

Israer shuar kanawe̱a núnisaiti tama

^10-14 Ame núkuka uwa tí peṉker nerena núniniauyi tura entsá supichik wajá asa ni kanawe̱sha tí nukap armai. Nuna numiri̱sha tí katsuram akupin akupeakur takutai̱ naṉki najanamnia armai. Túrasha kajerkar ukuinkiarmai tura numiri̱ kátsuram arma nusha kupiniararmai. Nuyá̱ yamaikia atsú nuṉkanam araamuiti. Nuiṉkia numiri̱ kátsuram akupin akupkur takutai̱ naṉki najanamniaka atsawai. Ju̱ kántaka kúntuts enentáimtusar wáitiakur támaiti tura wáitiakur kúntuts enentáimkiur títiniaitme” Uunt Yus tíniuiti.