Isk. 18 - Yus Papí: Shuarja̱i̱ Yus Yamaram Chicham Najanamu

Israer shuar túratniua nu

¹ Uunt Yus chichartak

² “Átumka métektaku chichamja̱i̱ chichasrum ‘Apa uwa churuinian yuíniawai túrasha uchirí̱ churumainiawai’ tárumna nusha ¿urukamtai Israer nuṉkasha tárum?

³ Wi Ashí Aentsu Uuntri̱ Uunt Yus iwiaaku Yus asan Israer shuarnumka ju̱ métektaku chichamka awaiṉkirum atakka peṉké chichakchattarme tajai.

⁴ Warí ashí aents apasha tura uchisha winia áiniawai tura tunaan tura nuka jakattawai.

⁵ Tura aents péṉkerka nekasa nuna túrak péṉkeran túriniaiti.

⁶ Tuma asa najankamu yusan nainnium shiir awajsatai tusar námper nájatmanumsha pachiniak yurumchaiti tura Israer shuara najanamu yusri̱ncha peṉké enentáimtichuiti núnisaṉ ni írutramuri̱ nuwe̱ncha yajauch awajtichuiti nuyá̱ nuwa̱ jatairi̱ jeamtai jáakui̱sha tsanichuiti.

⁷ Núnisaṉ yanaksha itiurchat awajeak wáitkiachuiti tura tumashmakui akirkákmin awaṉtukmijiam tusa warirí̱n juruksha awaṉtiniaiti nuyá̱ kasamtancha kasamchaiti. Tsukamainiancha yurumkari̱n súwiti tura misú áiniancha pushin aentsniuiti.

⁸ Kame kuítian íkiamkusha patakam akirkata tíchaiti tura pátasrik awaṉtamash achichuiti núnisaṉ tunaanumia̱sha arant ajawiti. Ántsan nuamtak aentsun súmamtikiaksha tuke nekasa nuja̱i̱ métek naka túriniaiti.

⁹ Nu aentska Winia akupkámurja̱i̱ métek túrawai tura Winia akupkámurnasha tí peṉker umíawai. Nuka ti nekas péṉkeraiti tuma asa iwiaaku pujustatui” tawai Uunt Yus Ashí Aentsu Uuntri̱.

¹⁰ “Túrasha nu áishmaṉ uchi kajenan tura maṉkartinian yajutmarka nuyá̱ túrashtin áiniana nuna túrakka,

¹¹ ni aparí̱ṉkia túrachu ai̱ṉ nainnium najankamu yus shiir awajsatai tusar nampermamunam pachinkiuṉka tura ni írutkamuri̱ nua̱ri̱n yajauch awajeakka,

¹² nuyá̱ najankamu yus ainia nuna enentáimtak mui̱jmiainian túrakka núnisaṉ kuítrincha atsuma nuna kasareak wáitkiakka tura aents tumashmakuisha ‘akirkákmin awaṉtukmijiam’ tusa wariṉkísha jurukíat awaṉtachkuṉka,

¹³ tura patasam awaṉturkimnium tusa kuítian ikiamniusha tura pátasrik awaṉtamsha achinia nu uchisha ¿iwiaaku pujustatuak? Atsá, iwiaaku pujuschattawai. Kame, nu mui̱jmiai̱ áiniana nuna ashí tura asa tí nekas jákatniukete. Warí ímia niṉki makumaruiti.

¹⁴ Tura ju̱sha nekaata. Nu aents uchi yajutmarma ni aparí̱ tunaari̱n ashí wainiak ashamak niṉkia núnaka túrutsuk

¹⁵ antsu najankamu yusan nainnium shiir awajsatai tusar námper nájatmanumsha pachiniak yurumtsuk tura Israer shuara ántar yusri̱ncha peṉké enentáimtutsuk núnisaṉ ni írutramuri̱ nuwe̱ncha yajauch awajtutsuk,

¹⁶ nuyá̱ yanaksha itiurchat awajeak wáitkiachuka tura tumashmancha akirkákmin awaṉtukmijiam tusa warirí̱nkisha jurichuka nuyá̱ kasamtancha kasamchaka tura tsukamainiancha yurumkari̱n suuka núnisaṉ misú áiniancha pushin aentsniuka,

¹⁷ nuyá̱ tunaanumia̱sha árantak ajaaka ántsaṉ kuítian íkiamkusha patakam akirkata tíchaka nuyá̱ pátasrik awaṉtamash achichuka Winia akupkámurja̱i̱ métek túrak Winia akupkámurnasha tí peṉker umía asa ni aparí̱ tunaari̱n jákashtatui antsu tí nekas iwiaaku pujustatui.

¹⁸ Antsu ni aparí̱ṉkia yajauch awajkartin asa tura akikmak umitmákchan sumamtikiak umitmakun aṉkant awajin asa tura ni pépruri̱ncha péṉkeran túrichu asa ní tunaari̱ji̱a̱i̱ṉ jakattawai.

¹⁹ Tura átum chichaakrum ¿urukamtia uchi apá tunaari̱n akikmatsu tíchatarmeash? Túrasha úchikia nekas péṉker tura asa nuyá̱ Wi akupkámun ashí umikiu asa iwiaaku pujustatui.

²⁰ Kame uchi apá tunaari̱n akikmakchamniaiti núnisaṉ apasha uchí tunaari̱n akikmakchamniaiti. Aents péṉkeran túrinkia péṉkera túraksha níniukete tura aents Yusan enentáimtichu yajauchin túraksha nusha níniukete. Tuma asamtai tunaan túrinia nuke jakattawai.

Uunt Yuska péṉkera nuja̱i̱ métek naka túriniaiti

²¹ Kame Yusa enentáimtichu ashí ni tunáa túrutairi̱ya̱ kanakí̱ Wi akupkámun ashí umíakka tura péṉkera nuna ímiatrusaṉ túrakka ti nekas játsuk iwiaaku pujustatui.

²² Núnisaṉ ashí ni yajauch túramuri̱sha atakka enentáimtuntsashtatui. Antsu nekas ímiatrusaṉ péṉker tura asa nuja̱i̱ iwiaaku pujustatui.

²³ Kame Yusa enentáimtichu jakati tusan ¿Wi wakerajak? Antsu Wikia áyatik ni yajauch túrutairi̱ya̱ kanakí̱ iwiaaku pujusat tusan ¿wakeratsjak?” tawai Uunt Yus Ashí Aentsu Uuntri̱.

²⁴ “Túrasha aents péṉkeran túrin péṉker túrutairi̱n iniais ashí mui̱jmiainian Yusa enentáimtichu túrin áiniana nuja̱i̱ métek túraksha ¿iwiaaku pujusminkiait? Ashí péṉker túraitkiusha nuka peṉké enentáimtuntsashtatui. Antsu yajauchin túrak umitsuk tunaan tura asa ni tunaari̱ji̱a̱i̱ṉ jakattawai.

²⁵ Túrasha átumka chichakrum ‘Uuntka péṉker túratsui’ tárume. Tuma asarum yamaikia Israer shuartiram antuktarum ¿Wi túramuka yajauchikiait? ¿Nekaska átum túramuchuk imiankaska yajauchit?

²⁶ Tuma asamtai aents péṉkera túrin péṉker túratniunmaya̱ kanakí̱ yajauchin túrakka nú turamuja̱i̱ṉ jakattawai.

²⁷ Antsu Yusan enentáimtichuka yajauch túrutairi̱ya̱ kanakí̱ péṉkera túrak ímiatrusan umíakka, ni iwiaakmari̱n uwemtikrattawai.

²⁸ Antsu ashí yajauch túramuri̱n enentáimtus nuyá̱ kanakiṉkia ti nekas játsuk iwiaaku pujustatui.

²⁹ Túmaitkiuisha Israer shuartirmeka chichakrum ‘Uuntka péṉker túratsui’ túrutrume. Israerá ¿Wi túramuka nekasaṉ yajauchit? ¿Antsu átum túramuchuk imiankaska yajauchit?

³⁰ Tuma asamtai Israerá, atumí túramuri̱ji̱a̱i̱ métek aṉkant aṉkant sumamtikiattajrume” tawai Uunt Yus Ashí Aentsu Uuntri̱. “Núnisrumek ené enentáimiu ajasrum atumí yajauch túrutairi̱ iniaisatarum núja̱i̱nchuka atumí tunaari̱ṉ makurmartatrume.

³¹ Tura átum tunáa túraitrumna nuya̱ṉka kanakrum ashí iniaisatarum. Túrunarum yamaram enentai tura yamaram enentáimtairam achiktarum. Warí ¿urukamtaik Israer shuartirmesha jakatarum?

³² Kame jáiniana nunasha jákara̱i̱ṉ tusan Wikia peṉké nakitiajai. Antsu ené enentáimiu ajasrum atumí tunaarí̱ iniaisatarum. Túrakrumka iwiaaku pujustatrume” tawai Uunt Yus Ashí Aentsu Uuntri̱.