Isk. 17 - Yus Papí: Shuarja̱i̱ Yus Yamaram Chicham Najanamu

Métektaku chichamja̱i̱ churuwian úwancha tura sétruncha páchiamu

^1-6 Nuyá̱ Uunt Yus chichartak “Maa aentsu uchiri̱yá métektaku chichamja̱i̱ Israer shuar chicharainiakum ‘Uunt churuwia sétur numi nuke̱n kupik súrin matsatainia nu nuṉkanam jukimiai tura suruktinian unuimiátka matsatainia nu péprunam ejemai. Núnisaṉ araknasha yaruak tí peṉker nuṉkanam entsasha núkap írunmanum matsasmai. Tura uwa núkap kanawearma tsapaimiai nuyá̱ kanaweṉka uunt churuwianmaani̱ iimkiamai’ tiartá” tímiayi.

^7-10 Tura chíkich uunt churuwia wantinkiamai túrunamtai uwa kaṉkapénka tura kanawe̱sha nuní̱ iimkiarmai. Nuyá̱ Uunt Yus chichaak “¿Nusha tsakartimpiash? Warí núnaka kaṉkaptuk uunt churuwia ukuinkiashtatuak túramka neretsuk kukarchattawak” tímiayi.

^11-15 Tura Israer shuar chicharainiakum “¿Warí tusa ju̱sha taa nuka nekachukaitrum? Papirúnia úunt akupniuri̱ Jerusaréṉnum taa úunt akupniun tura unuimiáku ainia núnaka achir Papirúnianam yaruakarmai. Núnisaṉ akupniu uchirí̱ ainia nuya̱n chikichkiniak achik nekas umiktatme tusa nuja̱i̱ chichaman najanamai. Kame nu nuṉkanmaya̱ ataksha wajararai tusa kakaram ainia núnaka achir yaruakarmai. Túrasha kawain tura aentsun núkap surusarat tusa Ejiptunam ni takarniúri̱n akupú pujái̱ nu aents ataksha wajararmai. ¿Nunasha nupetmakartatuak. Nuna túrincha uwemprartatuak. Papí najanamun iniaisáyatcha wariṉkísh itiurkachma péṉker juákartatuak?

^16-21 Atsá, nuka peṉké túrunashtatui. Antsu úunt akupin awajsámiania tura nekas umiktatjai tímiancha nakitiar núnisaṉ chícham najanamuncha iniaisámiania nu péprunmaṉ Papirúnianam jakattawai tawai Uunt Yus. Ejiptunmaya̱ Parauṉsha timiá untsurí suntari̱nniuitiat úunt akupin nu aentsun asutiáttsa winiakuiṉkia yáiṉtinian tujintkiattawai. Warí Uunt Yus chichaak ‘Winia nekarja̱i̱ áreṉkartatjai tura Papirúnianam ikiankan Winia muí̱jrukar nakitruru ásarmatai sumamtikiawartatjai’ titiá” tímiayi.

Númia nútikia nekapmamuja̱i̱ Yus Israeran yaya̱wai

²² Tura Uunt Yus Ashí Aentsu Uuntri̱ jú̱nis tíniuiti “Setru numi tí yakí̱ tsakarua nuna tsakari̱n Wiki kupikian araattajai. Kanawe̱ tí peṉker je̱e̱karun chikichkiniak nekas peṉkeri̱n kupikian naint yakí̱ tsakarua nui̱ araattajai.

²³ Israernum naint naṉkaamas tsakarua nui̱ araattajai. Túram ukat ukatin ajas nerek séetur tí uunt ajastatui. Túrunamtai chiṉkisha tura náṉkamas nanamtin áiniana nusha nui̱ matsamsartatui.

²⁴ Túrunamtai ashí numi kampunniunam írunna nuka Wi Uunt Yus asan numi waantu enentáimtumanka ajakmajai. Tura numi imianchanka tsakatmarmajna nuna nekaawartatui. Núnisnak numi sameknasha kukamtikramjai tura kukaruncha kuku̱jrumtikiamjana nunasha paant nekaawartatui. Uunt Yus chichaak ‘Wi nekas chichaku asan nekas umiktatjai’ tawai” tímiayi.