Isk. 16 - Yus Papí: Shuarja̱i̱ Yus Yamaram Chicham Najanamu

Jerusaréṉ tsanirma nuwa̱ núnis túriniaiti

^1-7 Yúsnan etserniun Uunt Yus chichareak “Mui̱jmiai̱ túrutairi̱ Jerusaréṉ nékamtikiam jú̱nisam titiá tusa akupkámiayi. Ámeka Jerusaréṉká, Kanaan nuṉkanmaya̱itme tura ápaka Amur áentsuiti nuyá̱ núkuka Jet áentsuiti. Iwiaaku akiiniawakmin nakitramar ajapramawarmiayi tura yaaksha peṉké waitnentrampracharmiayi. Túrasha aminí̱ ayamach naṉkamakmiajai tura ame untuchminkia tsupikchamu péper ajá tepemame. Tura chichaakun ¡iwiaakui! tusan tsakatmarmajme túram natsamarmame.

^8-14 Tura tsakaram anaṉkratamnia ajasákmin nekasan umiktatjai tusan ámiji̱a̱i̱ chichaman najanamjai nuya̱ṉka Winia awajsámjame. Pushincha áentsramjame tura sapatnasha awemtikiamajme núnisnak kuriji̱a̱i̱ iwiarmamtai najankamuja̱i̱ ti shiir iwiaramjame. Yurumkasha tí peṉker iwiarkamu yuámame tura tí shiirmach ajasam naṉkamantu páantin ajasmame. Tí shiirmach awajsámjamna nuja̱i̱ ashí nuṉkanam nekarmawarmai tawai Uunt Yus Ashí Aentsu Uuntri̱.

^15-19 Túrasha shíirmach asam amek enentáimtumasmame núnismek páantin asam ame aya̱shim kuitji̱a̱i̱ súrin ajasmame. Tura pushisha núnisaṉ iwiarmamtai kuriji̱a̱i̱ najankamusha nuyá̱ Winia kurirsha yaruakam ántar yus nakumka najankam pushí irumprar najankamun amasármaj nu áentsrarmame. Túram yurumkarsha asuitirsha nuyá̱ míshkirsha yaruakam nú yus mayatak péṉker enentáimprati tusam áestuamame tawai Uunt Yus Ashí Aentsu Uuntri̱.

^20-25 Nu arantcha ame uchiram Winia takusarmamna nu áishmaṉchisha tura nuwa̱chisha achikiam ame yúsrum áestuattsam mantuawarmame. Nu túrakmesha ame uchich asam misú ame untuchmíni̱ṉ tuniṉkiá tepemam nuka peṉké enentáimprachmame. Nu túrakum náṉkamas aents yujainia aya̱shim tsaṉkateakum ame aya̱shim núkap súrakum shíirmachitiatam mui̱jmiai̱ ajasmame.

^26-34 Ame aya̱shim ti súrakum akajtukmame. Tuma asakmin kajerkan asutiámjame túran muí̱jramainia nui̱ surukmajme. Yamaikia nusháa ajasume tura iiji̱a̱i̱ tsanirmatai tusasha seatmacharmayi tura akirmatnasha akirmákcharmayi antsu ame tumá akikmakmame.

Ni túramuja̱i̱ métek Jerusaréṉkan Yus asutiáttawai

^35-43 Tuma asamtai aya̱shí̱n súrin nuwa̱á, Uunt Yusa chichame̱ antukta. Ame tsanirum tura najankamu yúsrum aya̱shim tsaṉkatka asakmin núnismek ame uchirmi numpé̱ ukaráru asakmin ame tsanirumin tura muí̱jramainiana nunasha irurartatjai. Tura iruraran misú ái̱rtatjame. Túran nuwa̱ tsanirmamtai itiur asuttiain nútiksanak túrattajme. Túran ni uwejé̱e̱n íktusartatjame. Nuya̱ṉka untsurí aentsun ikiatramkartatui tura untsurí nuwa̱sha iimiainiamunmaṉ ame je̱e̱min áesturmawartatui tura ame túraitmena nuja̱i̱ métek asuttiámawartatui. Nuna túran ame akikmakam aya̱shim surutaiṉkia inimiamtiksattajme. Nuya̱ṉka Winia suir kaje̱ntkamursha naṉkaamasmatai tsaṉkuran atakka kajekchattajai.

Jerusaréṉka Samariaja̱i̱ tura Sutumaja̱i̱sha naṉkaamas nétsete

^44-52 Túrasha Jerusaréṉká, métektaku chichamja̱i̱ nukurí̱ urukuit nawantri̱sha núninkete turamartatui. Warí nukurí̱sha núnisaṉ nawantri̱sha áishri̱n uchirí̱ji̱a̱i̱ muí̱jkiarmai. Iwia̱i̱ri̱ṉkia Samariaiti. Nisha ame káimiti tura arakaani̱ pujawai. Tura nuṉkaani̱ṉkia iniaṉnamu kaim Sutuma pujawai. Warí Jerusaréṉká, ámeka ame nawantrumji̱a̱i̱ túraitmena timianú yajauchinkia Sutumaka ni nawantri̱ji̱a̱i̱ṉkia túracharuiti tawai Uunt Yus. Ámeka Jerusaréṉká, tí yajauch mui̱jmiai̱ tura asakmin ame kaimkia wariṉkísha túracharua núnisar juákaruiti. Ame tunaarumji̱a̱i̱ apatka íismaka ame kaimkia tíniuṉka túracharuiti. Tuma ásar ámiji̱a̱i̱ṉkia naṉkaamas péṉker áiniawai. Tuma asam yamaikia natsa̱a̱rta, warí ame túramurmiji̱a̱i̱ ame kaimkia peṉké umikmatcha núni̱ṉ ajasáruiti.

^53-59 Tuma ai̱ṉ achirar yajá yaruakma árumni̱ṉ Wiki awakeartatjarme. Kame ame kaim Sutumancha ni nawantri̱ji̱a̱i̱ tura kaim Samariancha nawantri̱ji̱a̱i̱ tura amincha Jerusaréṉká, núnisnak ame túraitmena nu enentáimsam natsa̱a̱rai tusar achirar yajá yaruakmaitrume. Túrasha nuya̱ṉka shiir enentáimsak tusan Wiki awakeartatjarme. Tura Wi nekas túrattajai tusan chícham najanamu nakitiakum itiurkamam núnisnak amincha túrattajme.

Jerusaréṉ enentáimpramtai ataksha iwiarkamu

^60-63 Túrasha Jerusaréṉká, ame natsa asakmin Wi chichaman ámiji̱a̱i̱ najanamiaj nuna Wikia enentáimprattajai tura tuke amukashtin chichaman ámiji̱a̱i̱ najanattajai. Túramtai Wi Úunt Yusaitjiana nu nekaattame. Tura ame yajauch túrawakmin nuna akikmaktaj tusan túrattajna nuja̱i̱ enentáimpram natsa̱a̱rtatme” tawai Uunt Yus Ashí Aentsu Uuntri̱.